SCD Malpica

LIGA DA COSTA 22ª XORNADA: SCD MALPICA 2 - BAIO 1

2012-02-13T14:07:00.001+01:00

SCD MALPICA: Suso, Charlie, Miguel Avelino, Iago, Marco, Rancaño, Neucha (Charro min.71), Cheo, Tato, Pablo (Manu Pardo min.81), Andrés.

CD BAIO: Manuel, Matías (Fredy min.90), José Antonio, Iván (Bieito min.81), Mario, Ramón, Martín MC, Javi Suárez, Canay, Alberto (Rubio min.85), Eloy (Fachal min.70).

Árbitro: Melián Otero. Mal. Sempre contemplou o xogo dende moi lonxe e mostrouse reacio á hora de sacar cartóns en varias faltas que semellaban merecedoras de tarxeta. O Malpica reclamou unha posible falta de Javi Suárez sobre Suso na acción do gol visitante e tamén un penalti sobre Pablo na primeira metade cando o dianteiro se dispoñía a rematar no corazón da área. Non houbo expulsións.

Incidencias: Tarde despexada, fría e con un vento forte que condicionou o xogo. Boa entrada na Pedra Queimada, cuns 200 espectadores que se mostraron moi activos durante os 90 minutos. O xogador do Baio Alberto tivo que abandonalo terreo de xogo no min.85 ao sufrir mareos tras un choque fortuíto co malpicán Cheo.

Goles: 0-1 (min.21): Centro de José Antonio dende a banda esquerda cara o segundo pao, o gardameta local Suso semella que atalla o esférico pero Javi Suárez choca con el aproveitando que o balón queda morto para anotar. 1-1 (min.51): Centro de Cheo dende a banda dereita á altura do punto de penalti, o porteiro Manuel choca con Tato intentando despexar pero erra na súa saída, caéndolle o balón a Neucha que estaba libre de marca no segundo pao que anota a pracer. 2-1 (min.64): Saque de esquina que bota Rancaño dende a esquerda, a defensa do Baio non consegue despexar, Pablo controla no segundo pao e marca de tiro cruzado.

Crónica: A Pedra Queimada acollía a un dos partidos máis atractivos da 22ª xornada da Liga da Costa (con permiso do Club do Mar - Camariñas) xa que se medían a SCD Malpica e o Baio, dous dos conxuntos máis en forma do campionato (os malpicáns sumaban oito triunfos consecutivos, mentres que os visitantes acababan de derrotar ao líder na xornada precedente). O adestrador da SCD, David Baña, acumulaba as seguintes ausencias: Óscar Moscoso, Dani (con molestias muculares) e Víctor (por motivos laborais). O partido comezou cun ritmo moi alto e con moita intensidade dende o pitido inicial, cos dous equipos tratando de dominar o mediocampo, pero pronto o Malpica se fixo co dominio territorial, metendo ao Baio bastante atrás. Sen embargo, o forte vento (soplaba a favor dos locais na primeira metade) que axudaba a ese dominio territorial dificultaba a circulación do esférico, provocando algúns erros en controles e pases relativamente sinxelos. As mellores oportunidades foron dos malpicáns, destacando as seguintes: un disparo de Rancaño dende a frontal que atallou Manuel; unha internada de Cheo ola dereita que culmina cun remate que saiu rozando o primeiro pao; e un balón que quedou en terra de ninguén tras un saque de esquina na mencionada xogada do posible penalti a Pablo. A partir do 0-1 a contenda trabouse un pouco, e ainda que o Malpica continuaba presionando e atacando non tivo accións claras para marcar. Polo que atinxe ao Baio, tratou de defender con orde, pero mostrou dificultades para sair co balón controlado e apenas puxo a proba a Suso, salvo na xogada do gol e nun disparo de Eloy que saiu alto tras un saque de esquina.

Na segunda parte as cousas non pintaban ben para a SCD, pois á desvantaxe no marcador había que sumalo factor vento, que agora soplaba en contra. Sen embargo, os locais saíron coa idea moi clara de remontar, e tras uns compases iniciais de igualdade volveron a facerse donos do encontro, presionando ben en tódalas líñas e xogando o balón con criterio, volvendo a meter ao Baio no seu propio campo en boa parte do segundo período. A mellor oportunidade do conxunto costeiro estivo nas botas de Tato mediante un disparo dende o pico dereito da área que saiu lambendo o pao esquerdo da portería defendida por Manuel. Pola súa banda, os visitantes tiveron a oportunidade de empatar nun man a man que Suso lle gañou a Canay nunha gran intervención do gardameta. Nos últimos minutos de encontro o Baio apretou mediante un fútbol directo, pero o Malpica soubo sufrir para quedarse cos tres puntos.

Partido vibrante o disputado entre o Malpica e o Baio, cun equipo local que se amosou moi serio durante os 90 minutos, sen practicamente deixar maniobrar aos perigosos atacantes rivais (é o equipo que máis goles leva a favor) e mostrándose superior a un dos mellores conxuntos da categoría. Tras esta vitoria, que suma a novena consecutiva, os malpicáns afiánzanse na 4ª posición da táboa clasificatoria (con 43 puntos) o que os libera de calquera tipo de apuro clasificatorio. A vindeira semana a SCD deberá afrontar un dos partidos máis complicados da tempada, xa que se enfrentan ao Camariñas (colíder empatado co Club do Mar).

PRENSA

2012-02-09T23:41:00.000+01:00

Anxo Garrido entrevista en quepasanacosta.com aos adestradores da SCD Malpica e do Cee xuvenís, Piña e José Carlos respectivamente. Aquí se pode ler.

LIGA DA COSTA 21ª XORNADA: O PINDO 0 - SCD MALPICA 1

2012-02-06T13:51:00.001+01:00

O PINDO: Garrido, Diego Trillo, Juan Vilela (Bicho min.81), Lolo, Juan de Dios, León, Eloy, Manolito (Ángel min.80), Diego Riolo (Carlos min.46),Carlos Leis, Pato.

SCD MALPICA: Suso, Charlie, Víctor, Iago, Marco, Rancaño, Neucha (David Álvarez min.90), Cheo, Charro (Miguel Avelino min.85), Tato (Daniel Varela min.88), Pablo (Marcos Amado min.75).

Árbitro: España Andrade. Mal. Estivo moi caseiro durante todo o encontro (especialmente durante a primeira metade) onde se deixou influenciar polos xogadores locais e sen criterio á hora de amosar cartóns amarelos. Anuloulle dous goles á SCD Malpica, o primeiro deles a Pablo por un fóra de xogo non existía. Preto do descanso sinalou penalti a prol do Pindo por unhas mans involuntarias de Tato cando se atopaba formando parte da barreira nun lanzamento de falta. Non houbo expulsados.

Incidencias: Tarde soleada e cunha temperatura bastante agradable en Lombáns. Moi pouco público asistiu ao partido, cuns 25 espectadores. Non houbo lesionados de gravidade.

Goles: 0-1 (min.28): Centro de Cheo dende a banda esquerda cara o primeiro pao onde aparece Pablo que se adianta á defensa e ao gardameta locais para anotar de cabeza.

Crónica: Visitaba o Malpica a O Pindo despois de gañar tódolos encontros disputados en xaneiro nun partido dos denominados "trampa", pois se ben é certo que o cadro carnotán é o colista (suma tan só unha vitoria) non ía ser unha tarefa tan sinxela coma algúns puidesen pensar, pois moitos equipos pasaron dificultades nas últimas xornadas ante este equipo. A SCD contaba coas baixas de Óscar Moscoso, Dani (por problemas musculares) e Andrés (sancionado). A contenda comezou ben para os malpicáns, dominando e encerrando aos locais na súa metade de campo, contando o Charro cunha oportunidade nada máis comezar que Garrido despexou cos pés. Sen embargo, a medida que pasaban os minutos caeron en certa relaxación, abusaron en exceso do xogo directo, mostraron menos claridade á hora de circulalo esférico e deixáronse influenciar polo mal arbitraxe do colexiado. A SCD tivo algunha oportunidade para marcar máis goles, pero a falta de acerto nos seus remates non no fixo posible. A pesar de non disputar unha boa primeira metade, O Pindo só creou perigo nas xogadas a balón parado onde Suso se mostrou moi seguro e na xa mencionada xogada do penalti que Suso lle detivo ao lanzador local.

Na segunda parte os xogadores adestrador por David Baña sairon cunha actitude máis positiva, mostrando máis agresividade facendose donos por completo do encontro. Froito disto foron as numerosas oportunidades coas que contaron tódolos homes de ataque, pero unhas veces a falta de puntería e outras as intervencións do gardameta Garrido (o mellor home do partido na tarde do sábado) provocaron que a renda non fose maior, destacando as seguintes: remate de Charro que semellaba colarse na portería pero rebota en Neucha que estaba en posición de fóra de xogo anulando o colexiado o gol; xogada de Cheo por banda dereita, centra raso cara Pablo que estaba só en boca de gol pero faise un pequeno lio e atalla Garrido; unha falta botada por Neucha que de novo Garrido desvía a saque de esquina; xogada individual de Cheo pola dereita, penetra na área pero dispara ao lateral da rede; saque de esquina que cabecea Tato pero un defensor local despexa na mesma líña de gol; etc. Na recta final do encontro as interrupcións foron constantes debido as faltas dos locais, feito que beneficiaba a un Malpica que apenas sufriu defensivamente nos segundos 45 minutos onde O Pindo non tirou a porta.

Novo triunfo da SCD que acumula oito de xeito consecutivo e dez xornadas sen perder, ainda que o resultado quedouse demasiado curto visto as oportunidades dun e doutro equipo. Despois dun tramo de campionato onde o Malpica se enfrentou aos equipos da zona media-baixa da táboa clasificatoria, entramos nunha fase que semella será decisiva para coñecelo verdadeiro potencial do equipo, pois nas próximas xornadas os rivais serán os da zona alta, comezando polo Baio que visita a Pedra Queimada o vindeiro domingo. Os malpicáns están agora no 4º posto da clasificación (empatados co Corme a puntos) a dous puntos do 3º posto que ocupa o Fisterra.

EXPOSICIÓN

2012-02-02T21:39:00.000+01:00

Na Facultade de Ciencias da Educación da Universidade da Coruña estase a celebrar unha exposición que ten á SCD Malpica como protagonista. Estará aberta ao público de xeito gratuíto ata o vindeiro 14 de febreiro en horario de 10:00 a 21:00 horas. A iniciativa lévase a cabo gracias a Héctor Pose, coautor (xunto con Luis Porto) do libro sobre a historia da SCD Malpica.

En webs como quepasanacosta.com ou piratasdemuxia.es amplian esta información.
http://www.quepasanacosta.com/?p=12658
http://www.piratasdemuxia.es/novas/index.php?name=News&file=article&sid=5886

LIGA DA COSTA 20ª XORNADA: SCD MALPICA 2 - CORCUBIÓN 0

2012-01-30T14:09:00.001+01:00

SCD MALPICA: Suso, Charlie, Víctor, Iago, Andrés (David Álvarez min.69), Rancaño, Neucha, Cheo (Miguel Avelino min.73), Pablo (Casais min.63), Tato (Manu Pardo min.78), Charro.

UD CORCUBIÓN: Andrés (Cristian min.73), José, Papi, Conguito (Jony min.60), Sergio Manín (Paulo min.60), Alán (Balucho min.53), Eduardo, Alberto, Mario (Terrenla min.65), David Lourido, Miguelón.

Árbitro: Hermo Alonso. Moi ben. Controlou perfectamente o encontro sen abusar dos cartóns, seguio o xogo sempre de cerca e mostrouse valente nas posibles accións polémicas. Anulou dous goles, un a cada equipo, por sendos fóras de xogo do visitante Mario (min.30) tras un saque de falta e do dianteiro local Pablo (min.56) tras plantarse só ante o gardameta Andrés. Non houbo expulsados.

Incidencias: Tarde despexada pero fría na Pedra Queimada. Unhas 150 persoas asistiron ao encontro. Non houbo lesionados de gravidade. Ao comezo do partido, os dous conxuntos fixéronlle o "pasillo" ao equipo xuvenil da SCD Malpica, que o sábado se proclamara campión do Grupo 4º da Primeira Autonómica.

Goles: 1-0 (min.12): Tato recibe o esférico case no mediocampo, avanza con el sen que ningún defensa visitante lle saia a tapalo paso e dispara dende a media lúa da área entrando o balón pegado ao pao esquerdo. 2-0 (min.37): Xogada individual de Cheo por banda dereita, chega a líña de fondo centra cara Pablo que dispara pero despexa o meta Andrés, o balón vólvelle a caer ao dianteiro malpicán que cede a Tato para que éste marque dende o borde da área con suspense pois o balón toca no pao dereito e no gardameta antes de entrar.

Crónica: A Liga da Costa segue o seu curso para a SCD Malpica que recibía na Pedra Queimada ao Corcubión, conxunto recén ascendido pero que xa puxera en dificultades aos malpicáns na primeira volta. Apenas había baixas no cadro local, tan só o lesionado de longa duración Óscar Moscoso e Dani con problemas musculares. O equipo adestrado por David Baña saiu moi metido no encontro, facéndose rapidamente co control do esférico ante un Corcubión que acumulaba moita xente na parcela defensiva (son un equipo que concede poucos goles, levaban 6 goles encaixados nos últimos 10 partidos disputados). O Malpica desenvolveu unha gran primeira metade, movendo con criteiro o balón e chegando con certa comodidade ás inmediacións da área visitante, tanto en xogadas combinativas como en balóns ao espacio. Así chegaron os goles e unha serie de oportunidades que non lograron materializar: un disparo de Neucha que Andrés despexa; unha acción de Rancaño que non atina a definir ante o gardameta; un centro de Neucha dende a esquerda que se pasea pola área pequena sen atopar rematador; e un disparo de Pablo que marchou alto dende o pico dereito da área pequena. O Corcubión apenas creou perigo nestes primeiros 45 minutos, amosando moitas dificultades para superala presión local e incapaces de aproximarse á portería defendida por Suso salvo nalgún balón parado.

Na segunda parte, o guión foi semellante durante os primeiros 15 minutos, cun Malpica que aglutinaba a maior parte da posesión pero con menor profundidade. Sen embargo, a partir do minuto 60 o partido nivelouse, quizáis debido á relaxación dos malpicáns, aproveitando o Corcubión para sumar máis xente ao ataque e presionar máis arriba, pero tampouco tiveron claridade como para crear excesivos problemas á defensa local. No tramo final da contenda o dominio volveu a ser claro por parte da SCD, que tocaba e tocaba case a pracer na zona do mediocampo ante un equipo visitante que non lograba presionar con efectividade. Non houbo grandes oportunidades de gol, destacando as seguintes para os malpicáns: un lanzamento de falta que bota Neucha dende o borde da área e que Andrés despexa a saque de esquina; unha semivolea de Manu Pardo dende a parte esquerda da área que se marchou alta; e unha nova falta esta vez executada por Manu Pardo que Andrés desvía con moitos apuros.

Nova vitoria do Malpica que remata o mes de xaneiro da mellor maneira posible, pois gañaron os catro encontros que se xogaron neste 2012 (xa van sete de xeito consecutivo), disputando unha gran primeira metade onde practicamente non deixaron sair ao Corcubión da súa metade de campo. A vindeira semana teñen que xogar fronte a O Pindo (encontro que en principio está programado para o sábado).

XUVENÍS

2012-01-27T13:49:00.000+01:00

Derradeira xornada de liga para os xuvenís da SCD Malpica tendo de novo a posibilidade de ser campións. Para iso, deben cando menos empatar mañá aás 16:00 horas na Pedra Queimada ao Dumbría "B", conxunto que é o 2º clasificado a 3 puntos do Malpica.

Queremos desexarlle moita sorte ao equipo de Piña, pedindo o apoio da afección para animalo equipo durante todo o encontro.

AXENDA PARA O FIN DE SEMANA

2012-01-27T13:46:00.002+01:00

AFECCIONADOS: SCD MALPICA - CORCUBIÓN, domingo 29 ás 16:00 horas.

XUVENÍS: SCD MALPICA - DUMBRÍA "B", sábado 28 ás 16:00 horas.

CADETES: SCD MALPICA - CEE, sábado 28 ás 11:00 horas.

LIGA DA COSTA 19ª XORNADA: CASTRIZ 0 - SCD MALPICA 2.

2012-01-23T14:21:00.001+01:00

SD CASTRIZ: Herrera, Michel, Sergio Pose (Prego min.59), Álex, Toniño (Sergio Gerpe min.82), Mauri (Jhony min.79), Martín (Pablo min.46), Toño, Sebas, Iván, David Agra.

SCD MALPICA: Suso, Charlie, Víctor, Iago, Marco (Marcos Amado min.46), Rancaño, Neucha, Cheo (Daniel Varela min.80), Pablo (Manu Pardo min.86), Charro (Miguel Avelino min.67), Andrés.

Árbitro: Fernández Iglesias. Regular. Non tivo unha incidencia directa no resultado, pero si tivo moitos erros de apreciación (especialmente na segunda metade) e apenas sacou cartóns en accións que as merecían. Non houbo expulsados.

Incidencias: Tarde fría co ceo nubrado pero sen choiva. Pouco público en San Pedro, con apenas 50 espectadores. O defensa malpicán Marco abandonou o terreo de xogo con problemas musculares.

Goles: 0-1 (min.14): Marco envía en longo cara a frontal da área local, Pablo anticípase á defensa, controla, penetra na área polo pico dereito e bate a Herrera cun gran disparo cruzado. 0-2 (min.45): Cheo centra dende a banda dereita cara o segundo pao onde aparece Neucha que anota cunha espectacular semivolea cando apenas tiña ángulo.

Crónica: Primeiro desprazamento da SCD Malpica neste 2012 despois de comezar forte como local (seis puntos en dous encontros). O rival era o Castriz, conxunto que a pesar de estar na zona media-baixa sempre resulta un equipo difícil de vencer, sobre todo no seu terreo de xogo debido ás reducidas dimensións do mesmo. Nesta xornada, David Baña contaba coas seguintes ausencias: Óscar Moscoso, Tato (sancionado), Dani (con problemas musculares) e Casais (mancado nunha man). A contenda comezou igualdada, cos dous conxuntos sen correr riscos, predominando o xogo directo e sen accións de perigo. Sen embargo, a partir do minuto 10 o Malpica fíxose co control, contando con máis presencia ofensiva e chegando con perigo ás inmediacións da área de Herrera, destacando as seguintes oportunidades: Pablo aproveita un erro de Toniño para facerse co balón pero o gardameta local salva in extremis; Charro remata dende o punto de penalti tras un centro raso de Neucha dende a esquerda pero Herrera despexa cunha boa estirada; e de novo Charro volve a rematar pero o seu tiro frouxo é atallado polo gardameta. O Castriz apenas se aproximou á área malpicán, tendo que intervir Suso tan só nun disparo de Toniño dende fóra da área que detivo sen dificultades.

No segundo tempo a SCD continuou ben plantado no terreo de xogo, sen dar apenas opcións a un Castriz que se estirou algo máis en ataque pero apenas tivo profundidade. A pesar da vantaxe, os malpicáns non renunciaron ao ataque, e tiveron varias aproximacións perigosas pero non foron capaces de concretalas, destacando sobre todo unha ocasión de Rancaño que se planta ante Herrera pero a súa vaselina saiu por encima do longueiro. Tamén as interrupcións foron protagonistas, pois en varias fases do partido apenas se xogou, xa que houbo varias faltas nas que xogadores dos dous bandos tardaron en recuperarse. A medida que pasaban os minutos, o Malpica arriesgaba menos, tratando de aproveitalos contragolpes que provocaban os saques de Suso, tendo Manu Pardo a mellor opción na recta final do encontro a través dunha vaselina que marchou desviada. Polo que atinxe ao Castriz, abusou do xogo directo e pecou de falta de claridade, ainda que tivo algunha oportunidade a balón parado, especialmente nun cabezazo de Álex que Suso despexou nunha gran intervención.

Partido moi completo do Malpica, cunha gran primeira metade, onde controlaron por completo o encontro e apenas deron opcións ao Castriz. Os malpicáns seguen coa gran xeira de resultados nas últimas xornadas, pois acumulan seis triunfos consecutivos e oito partidos sen perder. A vindeira semana reciben na Pedra Queimada ao Corcubión.

RESULTADOS DAS CATEGORÍAS INFERIORES

2012-01-22T13:42:00.000+01:00

XUVENÍS: Coristanco 3 - SCD Malpica 3 (Goles de Eme -2- e Martín Maradona). Con este resultado, o equipo de Piña encara a última xornada de liga coa necesidade de sumar polo menos un empate para conquistalo título.

CADETES: Outes 3 - SCD Malpica 1. O gol malpicán foi obra de Pitís.

XUVENÍS

2012-01-20T14:42:00.001+01:00

Os xuvenís da SCD Malpica disputan mañá sábado a penúltima xornada de Liga, podendo proclamarse campións se logran a vitoria (ou se o Dumbría non consegue gañar). Dende a directiva do Malpica queremos darlle moitos ánimos ao adestrador Piña e aos xogadores para que logren o título ligueiro.

AXENDA PARA O FIN DE SEMANA

2012-01-20T14:37:00.000+01:00

- AFECCIONADOS: Castriz - SCD Malpica, domingo 22 ás 16:30 horas.

- XUVENÍS: Coristanco - SCD Malpica, sábado 21 ás 16:00 horas.

- CADETES: Outes - SCD Malpica, sábado 21 ás 10:30 horas.

LIGA DA COSTA 18ª XORNADA: SCD MALPICA 3 - NANTÓN 2

2012-01-16T14:10:00.001+01:00

SCD MALPICA: Suso, Charlie, Andrés (Charro min.63), Marco, Rancaño, Neucha, Cheo, Dani (Iago min.46), Tato, Pablo (Miguel Avelino min.75).

CD NANTÓN: Ernesto, Lareo, Diego, Félix, Sito, Carlos Vidal (Eloy min.80), Fabio, Cristian, Luis, Manolo Cruceiro, Martín Suárez (Iván min.55).

Árbitro: Goyeneche García. Mal. Na primeira metade os visitantes pediron mans de Pablo no gol do dianteiro, ademais de protestar varios fóras de xogo sinalados aos seus atacantes. No segundo tempo, foron os malpicáns os que pediron unhas claras mans de Félix na recta final do encontro tras un disparo dende a frontal. Por outra parte, o colexiado interrompeu moito o xogo, mostrándose excesivamente dialogante e dirixíndose en reiteradas ocasións aos banquillos. Expulsou ao local Tato (min.53) por un codazo sobre Martín Suárez cando trataba de protexerse das sucesivas faltas que lle estaba a facer e ao adestrador do Malpica David Baña (min.86) por protestar unha decisión súa.

Incidencias: Tarde moi fría na Pedra Queimada, con choiva e granizo intermitente durante o encontro. Máis de 100 espectadores presenciaron a contenda. O xogador da SCD Dani tivo que abandonalo terreo de xogo por un pinchazo muscular. Tamén o visitante Martín Suárez tivo que ser sustituído polo golpe que sufriu na acción da expulsión de Tato.

Goles: 0-1 (min.7): Perda de balón no mediocampo do conxunto malpicán, o balón chégalle a Luis que tira dende uns 35 metros entrando esférico preto do pao dereito dun sorprendido Suso. 1-1 (min.12): Tato centra dende a banda dereita, Cheo entra dende a segunda líña e remata dende o punto de penalti sen deixar que o balón toque o chan. 2-1 (min.15): Tato bota un saque de esquina, prodúcese un rexeite caéndolle o esférico a Pablo que controla e remata a bocaxarro. 2-2 (min.47): Balón dende a líña de tres cuartos de Cristian cara Luis que lle gaña as costas á defensa local e bate a Suso cunha gran vaselina que entra rozando o longueiro. 3-2 (min.65): Saque de banda en longo de Cheo cara a área visitante, Sito intenta despexar pero introduce o balón na súa propia portería.

Crónica: A SCD Malpica comezaba a segunda volta da Liga da Costa 2011/12 recibindo na Pedra Queimada ao Nantón, conxunto recén ascendido e que a pesar da súa mala clasificación non era un rival nada sinxelo (de feito eliminara aos malpicáns na pasada edición da Copa da Costa). O técnico local, David Baña, recuperaba a varios efectivos, tendo unicamente dúas baixas: Óscar Moscoso e Gonzalo (cun esguince de nocello). O Malpica comezou algo apático, en contraposición a xornadas anteriores onde a intensidade foi unha das súas principais virtudes, e o Nantón aproveitouse desta circunstancia, anotando o primeiro gol en apenas 5 minutos. Sen embargo, nos seguintes 15 minutos os malpicáns reaccionaron, comezando a crear perigo, a presionar con máis efectividade, marcando dous goles case seguidos e contando con outras dúas oportunidades moi claras: un tiro de Rancaño alto dende o punto de penalti con todo ao seu favor tras un pase raso de Tato e unha semivolea de Neucha que Ernesto mandou a saque de esquina cunha espectacular estirada. O Nantón amosou moita intensidade, cun fútbol directo e tivo varias accións de perigo mediante balóns en profundidade, destacando dúas: Manolo Cruceiro plántase ante Suso pero dispara frouxo e unha falta dende a frontal que Suso saca cunha gran parada. Na recta final da primeira metade, o Malpica tivo outra boa ocasión nun disparo de Andrés que marcha rozando o pao dereito.

O segundo tempo non podía comezar peor para os malpicáns, xa que encaixan o empate no min.47 e cinco minutos despois Tato é expulsado, pero o Nantón non fixo notar a súa superioridade numérica e o Malpica continuou atacando, con pouca claridade pero con gañas, contando con algunha acción para marcar: unha falta botada por Neucha dende a frontal que Ernesto despexa e cun cabezazo de Cheo que sae desviado. A partir do 3-2, o Nantón acumulou máis xente na parcela ofensiva, continuando co seu fútbol directo, pero a pesar de crear perigo non contou con oportunidades claras de gol. Por outro lado, a SCD trataba de mantela posesión cando recuperaban o esférico, intentando sair ao contragolpe, e mesmo tiveron outra ocasión preto do final do encontro nunha internada de Charro pola esquerda pero o seu disparo raso foi atallado por Ernesto noutra gran parada.

Partido moi igualado entre dous conxuntos con estilos diferentes pero que se coñecen moi ben (levan catro encontros entre eles en apenas 8 meses), onde houbo pouco fútbol combinativo e moitas interrupcións no xogo. O Malpica non amosou a intensidade e concentración de outras datas, e a punto estivo de deixarse puntos ante un rival da zona baixa da clasificación. A nota positiva foi o resultado, que permite seguir acumulando vitorias (xa van cinco de maneira consecutiva) e manterse na zona alta (a SCD está na 6ª posición a dous puntos do cuarto). A vindeira semana visitan ao Castriz.

PRENSA

2012-01-09T14:56:00.000+01:00

O diario Depor Sport faise eco da fichaxe de Tato pola SCD Malpica. Aquí se pode ler.

LIGA DA COSTA 17ª XORNADA: SCD MALPICA 3 - MAZARICOS 0.

2012-01-09T14:27:00.002+01:00

SCD MALPICA: Suso, Charlie, Víctor, Andrés, Marco (David Álvarez min.83), Rancaño, Neucha, Cheo (Miguel Avelino min.73), Dani (Daniel Varela min.68), Tato (Iago), Pablo.

MAZARICOS CF: Juan, Sergio (Chico min.46), Tuco (Brais min.32), Matías, Marcos, Oreiro, Ramón (Macata min.46), Pereiro, Aldo (Ferreiro min.54), Cristian (Kevin min.32), Stefano.

Árbitro: Lens Ares. Ben en líñas xerais, ainda que na primeira metade tivo algún erro de apreciación relativamente grave pero que non tivo unha incidencia directa no resultado. Os malpicáns reclamaron cartón vermello na acción do penalti cometido sobre Pablo ao entender que o defensor do Mazaricos era o último home pois o dianteiro local encaraba só a Juan.

Incidencias: Tarde despexada e cunha temperatura bastante agradable. Pouco público na Pedra Queimada, cuns 100 espectadores. Debutou Tato coa SCD Malpica. O defensa local Marco abandonou o terreo de xogo por molestias nun xeonllo. Os xogadores do Malpica luciron camisetas en apoio a Alfredo (que recentemente anunciou a sua retirada do fútbol debido ás lesións); os afeccionados tamén mostraron unha pancarta en homenaxe ao mesmo xogador.

Goles: 1-0 (min.19): Tato recibe no pico dereito da área, desfaise de dous contrarios nunha gran xogada individual e bate a Juan de tiro raso que se cola polo primeiro pao. 2-0 (min.49): Saque de esquina que bota Tato, a defensa visitante despexa en primeira instancia pero o rexeite cáelle a Andrés que dispara dende o borde da área anotando de tiro raso. 3-0 (min.89): Saque de falta dende a altura do mediocampo que colga Víctor sobre o punto de penalti, a defensa falla, Pablo controla libre de marca co peito e marca coa perna esquerda de semivolea.

Crónica: Despois do parón debido ás festas de Nadal, volvía o fútbol á Pedra Queimada. A SCD Malpica recibía ao Mazaricos, coa idea de comezalo ano como rematara o anterior (acumulaban tres vitorias consecutivas); para tal tarefa, debía de vencer ao Mazaricos, equipo que acaba de ascender á Segunda Autonómica e que se atopa na parte baixa da táboa clasificación. O técnico local, David Baña, contaba coas seguintes baixas: Óscar Moscoso, Marcos Amado (mancado nunha man), Charro (por problemas bucodentais), Manu Pardo (con molestias muculares) e Gonzalo (cun esguince de nocello). O partido comezou cos equipos un pouco adormilados, con moitas imprecisións en ámbolos dous bandos. O Malpica tratou de presionar moi arriba, provocando que os visitantes non sacasen a pelota con claridade, e apenas pasaron apuros defensivos. En ataque os malpicáns acumularon moita xente en campo contrario, creando dificultades a unha feble defensa do Mazaricos, pero houbo algunha imprecisión que non permitiu materializala superioridade local. A SCD tivo tres grandes oportunidades para marchar cunha vantaxe máis cómoda ao descanso: un disparo de Pablo que marcha desviado cando se atopaba libre de marca no punto de penalti; Pablo manda ao pao unha pena máxima cometida sobre el mesmo; e xusto antes do descanso Cheo cabecea ás mans de Juan cando se atopaba en boca de gol. Polo que atinxe ao Mazaricos, tratou sempre de sair co balón controlado, pero faltoulle precisión, mentres que cometeu algún erro defensivo importante e apenas creou perigo durante os primeiros 45 minutos.

A segunda metade non podía comezar mellor para o Malpica, pois en apenas 5 minutos anotou o segundo gol dando moita tranquilidade para o resto do encontro. Tamén nos primeiros compases da segunda parte unha xogada entre Pablo e Tato rematou cun tiro deste último que rexeitou o longueiro e un remate de cabeza de Neucha tras un saque de esquina marchou rozando o poste esquerdo da meta de Juan. Non obstante, co paso dos minutos os locais baixaron algo a presión, igualándose o encontro, ainda que en ningún momento o Mazaricos deu a sensación de poder remontar. Os visitantes sumaron dúas accións de gol: un saque de falta botada por Kevin que Suso despexa cunha gran intervención e un disparo case sen ángulo do propio Kevin que Suso despexa a saque de esquina.

Novo triunfo da SCD Malpica para rematala primeira volta da liga (agora marchan na sexta posición), nun partido que sempre ten un certo risco debido ao parón de 2 semanas sen competición. O Malpica leva catro triunfos consecutivos, amosando un gran potencial ofensivo e sumando tres xornadas sen encaixar. A vindeira semana comeza a segunda volta, recibindo na Pedra Queimada ao Nantón.

FICHAXE

2012-01-04T15:18:00.000+01:00

A SCD Malpica incorporou oficialmente ao dianteiro Tato, xogador que o ano pasado militara no Atlético Arteixo.

FELIZ ANO 2012

2011-12-31T13:18:00.000+01:00

Dende este blog queremos desexarvos un feliz ano 2012 a tódolos nosos/nosas seguidores/seguidoras, con moita saúde para todos e no tema deportivo oxalá que poidamos dar alegrías cada fin de semana.

BO NADAL

2011-12-23T15:56:00.000+01:00

Tódolos membros da SCD Malpica queremos deserxarlle a tódolos seguidores do equipo e do blog un bo nadal.

LIGA DA COSTA 16ª XORNADA: SAN LORENZO 0 - SCD MALPICA 3

2011-12-19T14:24:00.000+01:00

SAN LORENZO: Sergio, Javi (Ánxo min.46), Adrián, Canteiro, Puñal, Jorge Pichel, Santi (Bolón min.46), Cachizo (Miguel min.66; Eloy min.71), Marcos Bartolo, Dani Fuentefría, Carliños.

SCD MALPICA: Suso, Charlie, Casais, Miguel Avelino (David Álvarez min.49), Marco (Gonzalo min.75), Rancaño, Neucha, Cheo, Charro (Juny min.76), Martín (Daniel Varela min.65), Víctor.

Árbitro: Vázquez Pasanante. Moi ben na tarde de onte, estivo acertado en case tódalas decisións que tomou e non tivo ningún erro grave. Expulsou ao xogador local Marcos Bartolo no min.83 por empurrar a un visitante tras unha pequena liorta entre varios xogadores. A raíz desa xogada, tamén foi expulsado o adestrador do San Lorenzo.

Incidencias: Tarde moi fria e soleada nas Pedreiras. 100 espectadores presenciaron o partido. Houbo varios xogadores lesionados durante o encontro: por parte local Miguel e Jorge Pichel, e por parte do Malpica Miguel Avelino (cunha sobrecarga) e Marco (tras apoiar mal nun salto). Cabe destacalo debut de dous xuvenís co primeiro equipo da SCD: Martín e Juny.

Goles: 0-1 (min.4): Saque de esquina dende a dereita que bota Martín e cabecea Neucha á rede cun bo remate. 0-2 (min.18): Novo saque de esquina executado por Martín que remata Charlie tamén de cabeza. 0-3 (min.21): Falta no lateral da área que saca Cheo directamente a porta, e entra rozando o longueiro tras salvala barreira.

Crónica: Derradeiro encontro de liga para a SCD Malpica, que viaxaba ata Verdillo para enfrontarse ao San Lorenzo (equipo que ocupa a penúltima posición na táboa clasificatoria), nunha contenda complicada debido ás características do terreo de xogo: dimensións reducidas e firme moi irregular. O técnico da SCD Malpica, David Baña, contaba con numerosas baixas para esta xornada: Óscar Moscoso, Alfredo, Manu Pardo (cunha tendiditis no tendón de aquiles), Dani (con problemas musculares), Andrés (operado na boca esta semana), Pablo (con molestias nun xeonllo), Marcos Amado (mancado nunha man) e Iago (cunha contractura muscular). O Malpica comezou o partido moi concentrado, mostrándose serio en tódalas facetas do xogo e sabendo adaptarse moi ben ás complicadas condicións do terreo de xogo que non favorecen ás súas careacterísticas. Ademais mostraron unha gran efectividade a balón parado, e en apenas 20 minutos xa contaba cunha importante vantaxe no marcador que ao final foi definitiva. Ademais dos goles, contaron con varias oportunidades máis de gol: un disparo de Martín dende fóra da área, un centro de Cheo dende a dereita que Miguel Avelino remata frouxo ás mans de Sergio, e un man a man de Neucha que Sergio saca co pé nunha gran intervención. O San Lorenzo non entrou no partido ata que recibiu o terceiro gol en contra, deixando unha mala imaxe e con moitos problemas defensivos, mentres que en ataque apenas inquedou a Suso, tendo a mellor acción de ataque nun remate alto de Santi.

Na segunda metade o partido decaeu en intensidade, cun Malpica que controlou o xogo sen complicarse, mentres que creaba perigo mediante contragolpes aproveitando a rapidez dos seus atacantes, pero non estiveron atinados para ampliala direfencia: unha internada de Charro pola banda esquerda pero o seu tiro é rexeitado por Sergio a saque de esquina; unha xogada de Cheo pola dereita que remata cun tiro que sae rozando o primeiro pao; e unha acción de Juny pola esquerda pero que dispara fóra. Os locais non deron a sensación de poder remontar en ningún momento, sen contar con accións de perigo, salvo nun disparo á altura do punto de penalti que saiu alto tras un centro dende a esquerda.

Partido moi completo o que desenvolveu o Malpica, sen grandes alardes pero moi efectivo, conscientes de que o campo non permitía moito máis. A nota positiva foi o debut de Martín e Juny que deixaron moi boas sensacións. Os malpicáns rematan o ano nunha xeira positiva de resultados, pois acumulan tres vitorias consecutivas e dúas xornadas seguidas sen encaixar (dous feitos que non se deran anteriormente nesta tempada). A vindeira xornada será xa en 2012, onde a SCD recibe ao Mazaricos para rematala primeira volta.

BAIXA: NANDO DEIXA O MALPICA.

2011-12-13T15:03:00.000+01:00

A semana pasada confirmouse a marcha do mediocentro Nando tras solicitala "carta de liberdade". O xogador chegara aos modestos da SCD Malpica hai aproximadamente un ano procedente do San Tirso.

Queremos darlle as gracias a Nando pola labor desenvolvida como futbolista e tamén pola calidade humana que amosou durante os meses nos que estivo no Malpica. Tamén lle desexamos moita sorte no futuro en tódolos ámbitos da vida.

LIGA DA COSTA 15ª XORNADA: SCD MALPICA 2 - MUROS 0.

2011-12-12T13:51:00.001+01:00

SCD MALPICA: Suso, Charlie, Casais, Iago (Miguel Avelino min.59), Víctor, Andrés (Daniel Varela min.76), Neucha, Cheo, Charro (Manu Pardo min.70), Pablo (Gonzalo min.89), Dani.

MUROS SD: Rubén, Gael, Iván, Mayuyo, Dani, Mingos (Javi min.76), Alberto, Gelo, Yanky, Óscar, Jesús.

Árbitro: Pardo Pose. Estivo ben, nun encontro onde apenas houbo xogadas polémicas. Sen embargo, os locais pediron a expulsión na primeira metade dun defensor visitante tras cometer unha falta sobre Dani cando encaraba libre de marca á área de Rubén. Non houbo expulsados.

Incidencias: Tarde moi fría na Pedra Queimada, con choiva na recta final do encontro. Sobre 100 espectadores. Os malpicáns Andrés e Iago tiveron que abandonalo terreo de xogo por sendos problemas musculares.

Goles: 1-0 (min.35): Saque de esquina dende a dereita que saca Cheo rematando Charlie de cabeza no borde da área pequena tras adiantarse ao seu par. 2-0 (min.45): Falta no borde da área que semellaba propicia para un diestro, pero que bota Neucha a perna cambiada anotando un golazo tras superala barreira e colándose preto da escadra dereita da portería.

Crónica: Despois de lograla vitoria fronte ao Zas na xornada precedente, a SCD Malpica volvía a disputar un encontro na Pedra Queimada cun doble obxetivo: por un lado acercarse á zona alta da táboa clasificatoria (o Muros marchaba cuarto a seis puntos dos malpicáns), e por outro melloralos números como local (só sumaban un triunfo na casa). Para esta tarefa, contaban con varias baixas: Óscar Moscoso, Alfredo, Marcos Amado (lesionado nunha man), Marco (por motivos persoais) e Rancaño (por enfermidade). Os primeiros minutos de partido foron de tanteo entre dous conxuntos que se coñecen bastante (de feito, o ano pasado disputaron catro choques), sen que ningún deles asumise excesivos riscos. Pero pouco a pouco o Malpica foi facéndose co control do partido, presionando ben a saída do balón visitante, adiantado líñas, metendo ao Muros no seu campo e creando numerosas accións perigosas de gol, tanto en xogadas a balón parado como en xogadas colectivas. Ademais dos dous goles, os malpicáns contaron con varias oportunidades claras: un disparo de Cheo tras un saque de esquina que dou no longueiro; unha xogada de Neucha pola esquerda pero o seu centro pasa polo corazón da área sen atopar rematador; un tiro de Andrés dende o borde da área tras un rexeite visitante que pasa preto do poste dereito; un centro-chut de Neucha que case sorprende a Rubén; e un centro de Charro dende a banda dereita que Neucha remata de cabeza ao longueiro en boca de gol. Polo que atinxe ao Muros, apenas creou perigo, salvo nun disparo de Yanky dende fóra da área que despexou Suso e un cabezazo de Iván tras varios rexeites que Suso salvou moi atento.

Na segunda metade, os xogadores adestrados por David Baña continuou na líña amosada nos primeiros 45 minutos, pero sen asumir riscos innecesarios, sabendo administrala renta da que disfrutaban. O Muros aumentou a intensidade, acumulando máis xente na parcela ofensiva, o que provocou moitos espacios ás costas da súa defensa, feito que trataron de aproveitar os locais pero faltoulles algo de precisión nos metros finais para anotar máis goles. As mellores oportunidades de gol volveron a ser do Malpica, destacando as seguintes: un centro raso de Cheo dende a banda dereita ao que Charro non chega por centímetros no segundo pao; un pase en profundidade cara Pablo que penetra na área pero o seu disparo é rexeitado por un defensa; e unha gran xogada entre Daniel Varela e Manu Pardo no borde da área que acaba cun disparo do primeiro que sae fóra por pouco. Os visitantes non lograron combinar, abusaron do fútbol directo e tan só conseguiron inquedar algo na recta final do encontro mediante xogadas a balón parado e rexeites, pero sen ter oportunidades claras.

Importante vitoria da SCD Malpica ante un rival da zona alta, desenvolvendo un encontro moi completo en tódalas facetas. Ademais, conseguiron os tres puntos por segunda vez na Pedra Queimada no que vai de curso futbolístico (o outro triunfo fora ante O Pindo no mes de setembro), sendo a primeira vez que non encaixan gol como locais. O vindeiro fin de semana enfróntanse ao San Lorenzo en Verdillo, no que será o derradeiro encontro oficial para os malpicáns neste 2011, coa oportunidade de seguir mantendo as boas sensacións e lograr 3 vitorias consecutivas por primeira vez na tempada.

PRENSA

2011-12-12T13:10:00.000+01:00

O diario Depor Sport publicaba o pasado venres unha reportaxe sobre a retirada de Alfredo Suárez, reproducindo a carta que el mesmo colgou neste blog o mércores. Aquí se pode ler.

Carta os seareiros de Alfredo Suárez

2011-12-08T03:34:00.002+01:00

Din que unha retirada a tempo é coma unha victoria. Pois logo de coñecer o alcance da miña lesión decidín tomar esta dificil pero necesaria decisión. Non é algo que faga en quente, xa que desgraciadamente rondara antes pola miña cabeza, pero desta vez si que non hai volta atrás. O fútbol leva na miña vida moito tempo e creo que disfrutei del, que foi o que sempre quixen. ¿Puiden chegar máis lonxe? Pois pode ser, pero cando deixas de entender o fútbol como unha diversión eu son dos que pensa que non paga a pena perder o tempo. Por iso sempre fixen o posible por pasalo ben e disfrutar ca xente que me aprecia.

Nunca olvidarei os meus anos no Malpica compartindo vestiario cos meus mellores amigos, cos cales gañei unha liga inolvidable. Nunca olvidarei o meu debut con 15 anos sendo cadete contra o Imperator en Preferente, temporada na que puiden marcar un gran gol. Tampouco poderei olvidar os dous fantásticos anos que pasei no Ponteceso, donde puiden gañar a liga da costa, pero gañei moito máis coñecendo a xente do clube.

Mirando cara o pasado creo que non me podo queixar xa que vivín grandes experiencias xogando en División de Honra cadete co Orillamar, División de Honra Xuvenil co Montañeiros e Liga Nacional Xuvenil no Bergantiños, temporada donde fun o máximo goleador dun gran equipo.

Na miña vida futbolística marquei mais de 300 goles (algunha tempada de infantiles falta por ahí no libro e contabilizando o de outros clubes), ainda que non sexa para presumir pois polo menos espero que quede na memoria dalguén (na miña).

Era asiduo nas convocatorias da Sub-15 e Sub-16 Coruñesa, outra experiencia na que empecei a aprender que por moi bo que foses sempre pode faltarche "algo" que algún outro tiña, cousa que me abriu os ollos da realidade do fútbol.

Pero en canto pasei a modestos algo empezou a cambiar, pese a que a primeira tempada fun capaz de anotar 19 goles en liga (Dumbria, Soneira, Camariñas, Cee... gran ano en segunda) xa sufrín unha lesíon no nocello.

Seguiulle un esguince no xeonllo, e na seguínte tempada un esguince no xeonllo, cruzado... na segúinte o hombreiro, outro ano máis tarde en Ponteceso o nocello de novo, rotura de fibras, e finalmente o de este ano.

Os medicos foronme claros que son 25 anos e hai que ter un pouco de cabeciña, xa que o día de mañá podeme costar un disgusto, tanto na vida laboral coma no tempo de ocio, vamos que os meus xeonllos xa non están para máis e menos para a práctica do fútbol.

Querolle dar as gracias a xente que fai posible o fútbol na costa xa que creo que entre todos formamos unha gran familia da cal nos podemos sentir orgullosos coa nosa forma de pensar e entender este deporte. Gracias a todolos clubes que me acolleron e que me aturaron, asi como rivais e amigos que fun facendo polo camiño. E especialmente os seareiros e compañeiros de equipo, xa que gracias a eles chegan a tremerche as pernas nestes "campiños" facendote sentir importante, por eles me decidín a escribir estas palabras.

Gracias a todos polo voso tempo e perdoade a "vara" que vos din.

Un saúdo e ata sempre.

Alfredo Suárez

PARTE MÉDICO DE ALFREDO SUÁREZ

2011-12-07T14:11:00.000+01:00

Tras unha nova consulta no Hospital Sta. Teresa da Coruña confirmaronse os peores augurios para o xogador malpicán Alfredo Suárez, que se perderá toda a tempada. O parte di o seguinte:

-Rotura completa do ligamento cruzado anterior
-Desirserción do menisco interno
-Esguince do ligamento lateral interno

Asi mesmo queda pendente de nova revisión unha posible lesión do ligamento arcuato, que tamen parece dañado, o que podería provocar outro tipo de ciruxía tamen na altura do peroné.

LIGA DA COSTA 14ª XORNADA: ZAS 2 - SCD MALPICA 3

2011-12-05T14:56:00.006+01:00

SPORTING ZAS: Damián, Martín (Ramón min.78), Óliver, Lagoa, Javito, Touriñán, Pablo (Diego min.74), Peque, Rubio, Pichín, Pablo Muíño.

SCD MALPICA: Suso, Charlie, Víctor, Iago, Marco (Gonzalo min.60), Andrés, Neucha (Miguel Avelino min.86), Rancaño, Charro (Daniel Varela min.81), Pablo, Dani (Manu Pardo min.72).

Árbitro: Luis Ossorio Astray. Regular na tarde de onte. Estivo ben na primeira metade, mantendo un mesmo criterio durante os 45 minutos e mostrandose valente á hora de indicar dous penaltis a favor do Malpica: o primeiro por unhas mans dun defensa local tras un centro de Charro, e o segundo por unha patada sobre Charro no pico da área. Na segunda parte, o colexiado estivo moi caseiro, e mesmo inclusive indicou unha pena máxima a prol do Zas por un presunto empurrón máis que dubidoso de Gonzalo sobre Pablo Muíño. Na recta final do encontro, anuloulle un gol a Manu Pardo por un fóra de xogo tras un disparo de Pablo que non semellaba tal. Non houbo cartóns vermellos.

Incidencias: Tarde fría en San Andrés, con choiva leve durante todo o encontro. Sobre 100 espectadores, cun bo ambiente nas bancadas. Na segunda parte houbo unha pequena liorta entre varios xogadores pero que non pasou a maiores. O defensa malpicán Marco tivo que abandonalo terreo de xogo tras recibir unha forte entrada ao comezo da segunda metade.

Goles: 1-0 (min.10): Boa xogada colectiva do Zas pola banda dereita, Peque penetra na área e asiste a Pablo Muíño que marca no primeiro pao. 1-1 (min.15): Neucha bota unha falta centrada dende a líña de tres cuartos que se cola na portería despois de facer un estrano. 1-2 (min.37): Neucha transforma unha pena máxima cometida sobre Charro despois de que Damián rexeitase en primeira instancia. 2-2 (min.70): Penalti anotado por Pablo Muíño que rozou Suso cos pés. 2-3 (min.2-3): Suso saca en longo, o Charro prolonga coa cabeza cara Neucha que supera ao seu lateral e bate a Damián polo primeiro pao de tiro raso.

Crónica: Partido importante o que disputaba a SCD Malpica na tarde de onte, pois o Zas ocupaba o 16º posto na táboa clasificatoria pero a tan só tres puntos dos malpicáns, polo que de perder a SCD meteríase en problemas. O técnico David Baña contaba coas baixas de Óscar Moscoso, Alfredo (os dous mancados nun xeonllo), Cheo (sancionado) e Marcos Amado (lesionado nunha man). A contenda comezou cun Malpica un pouco adormilado (de feito os locais xa tiveron unha oportunidade na primeira acción do encontro tras un tiro de Pablo Muíño dende a frontal que Suso mandou a saque de esquina), pero despois do 1-0 o conxunto costeiro fíxose máis protagonista, tendo o dominio territorial, ainda que quizáis faltou algo de claridade á hora de circulalo balón, pois en ocasións precipitábanse buscando un fútbol directo. Así, chegaron as oportunidades, destacando dúas moi claras: co empate no marcador, Pablo manda unha pena máxima fóra; pouco despois, Dani entra pola dereita e asiste a Pablo que libre de marca no corazón da área remata frouxo ás mans de Damián. Os locais pasaban apuros en defensa, pero en ataque crearon perigo gracias á rapidez dos seus atacantes; sen embargo, non contaron con oportunidades claras.

Na segunda parte, o Zas saiu cunha actitude máis agresiva, pelexando cada balón e presionando constantemente. O Malpica non se deixou intimidar e mostrou unha gran intensidade, mantendo unha actitude moi positiva (inclusive despois do empate tras un penalti moi dubidoso). Froito disto, os segundos 45 minutos foron de ida e volta, sen un dominador claro, cun Zas que levou máis perigo que na primeira metade e cun Malpica que tentaba aproveitalos contragolpes. Os malpicáns tiveron dúas oportunidades importantes para marcar: un cabezazo de Charro que marchou desviado por pouco tras un centro de Pablo dende a dereita; e unha internada de Pablo pola banda esquerda que culmina cun disparo raso que Damián rexeita, caéndolle o balón a Manu Pardo que marca en boca de gol pero o colexiado interpretou que estaba en fóra de xogo no momento do disparo. Pola súa parte, o Zas tivo varias accións perigosas, pero o acerto de Suso foi clave, sobre todo nun man a man que lle sacou a Pichín e tras despexar un pase da morte de Pichín cara Pablo Muíño.

Importante victoria da SCD Malpica cun Neucha moi inspirado á hora da definición, e que lle sirve para afastarse da zona baixa da clasificación. É de destacala actitude do equipo, sabendo sufrir e sen baixalos brazos en ningún momento. Agora toca sumar máis puntos como local, o verdadeiro "talón de aquiles". A vindeira semana reciben ao Muros.

LIGA DA COSTA 13ª XORNADA: SCD MALPICA 2 - DUMBRÍA "B" 2

2011-11-28T13:40:00.001+01:00

SCD MALPICA: Suso, Víctor, Marcos Amado (David Álvarez min.75), Iago, Marco (Casais min.46), Rancaño, Neucha, Cheo, Pablo (Miguel Avelino min.90), Charro, Andrés (Manu Pardo min.75).

CF DUMBRÍA "B": Anxo, Samuel, Ramiro, David Carreira, Sergio Cives (Fernando min.67), José Manuel, Riki (Esteban min.54), Jesús, Toni, Pablo Lestón, Alberto.

Árbitro: Gómez Otero. Regular. Tivo diversos erros de apreciación ao longo de todo o encontro, perxudicando indistintamente aos dous conxuntos. Expulsou ao malpicán Cheo no minuto 31 tras empurrar a un contrario despois de recibir un insulto grave.

Incidencias: Boa entrada na Pedra Queimada, cunhas 150 persoas no campo, nunha tarde despexada e temperatura agradable. O local Marcos Amado abandonou o terreo de xogo debido a unha torcedura dos dedos dunha man. Debutou David Baña como novo adestrador da SCD Malpica.

Goles: 0-1 (min.5): Saque de falta dende a banda dereita que remata David Carreira no segundo pao. 1-1 (min.20): Pablo recolle un rexeite dentro da área e anota ante Anxo ante a pasividade da defensa visitante. 1-2 (min.66): Transición rápida do Dumbría "B", Toni recibe en líña de tres cuartos, enviando un pase en porofundidade cara Alberto que marca no man a man con Suso. 2-2 (min.67): Casais centra dende a banda dereita, Samuel intenta despexar de cabeza pero introduce o balón na súa propia portería.

Crónica: David Baña debutaba no banquillo do Malpica (despois da marcha de Manuel Agilda a comezos da semana pasada), conxunto que levaba cinco encontros sen gañar. O rival dos malpicáns era o filial do Dumbría, que tras un inicio ligueiro espectacular (5 triunfos e 2 empates nas primeiras 7 xornadas) tamén estaba metido nunha mala xeira de resultados. Os locais contaban con varias baixas: Óscar Moscoso, Charlie (por motivos persoais), Alfredo (mancado no xeonllo dereito), Dani (por motivos laborais) e Daniel Varela. O encontro non podía comezar peor para os intereses malpicáns, pois aos 5 minutos xa se atopaban por detrás do marcador. Pero a partir dese instante comezaron a levalo peso do encontro, empregando moita intensidade e creando perigo constantemente, mentres que o Dumbría apenas lograba contela ofensiva da SCD. Contaron con varias accións de de gol, destacando especialmente dúas: un disparo de Charro ante Anxo que o gardameta despexou con apuros, e unha gran xogada colectiva que culmina cun centro de Neucha dende a esquerda que Charro remata demasiado alto cando estaba en boca de gol. No minuto 30 prodúxose o expulsión de Cheo, provocando que nos minutos finais da primeira metade os malpicáns perdesen a concentración en constantes protestas ao colexiado. Os visitantes dispuxeron dunha ocasión clara por medio de Sergio Cives que rematou fóra unha falta lateral.

No segundo tempo, e con 10 homes, o Malpica arriesgou máis en busca da vitoria, pasando a xogar, practicamente, con defensa de tres. Meteron ao Dumbría no seu propio campo comezando un carrusel de oportunidades, pero non estiveron atinados na definición: un ramate de chilena de Pablo que saiu preto do pao dereito da portería; un centro de Neucha dende a esquerda que Rancaño mandou alto totalmente libre e marca no segundo pao; unha nova acción individual de Pablo que non atina a culminar; e un rexeite que quedou "morto" no punto de penalti que ningún dos atacantes locais consegueu marcar. O Dumbría "B" apenas creou perigo, materializando a única oportunidade clara que tivo na segunda metade. Na recta final do encontro, o partido igualouse, cun Malpica que baixou o ritmo debido ao cansancio acumulado despois de xogar durante máis dunha hora cun home menos.

Gran encontro o que disputou a SCD, mágoa da falta de acerto nos metros finais, pero deixaron mellores sensacións que en datas precedentes, ademais de demostrar unha intensidade e ambición que se cadra faltara en outros momentos da tempada. Sen embargo, segue a mala xeira de resultados (só unha vitoria nos derradeiros 9 encontros), racha que se acentúa na Pedra Queimada, onde só levan un triundo en 7 partidos. A vindeira semana visitan ao Sporting Zas.

AXENDA PARA O FIN DE SEMANA

2011-11-25T15:44:00.000+01:00

Nova xornada ligueira para os diversos equipos da SCD Malpica. Tódolos encontros terán lugar mañá sábado 26 de novembro:

- AFECCIONADOS: SCD Malpica - Dumbría "B", ás 16:15 horas na Pedra Queimada.

- XUVENÍS: SCD Malpica - Zas, ás 12:30 horas na Pedra Queimada.

- CADETES: Fisterra - SCD Malpica, ás 10:30 horas no Ara Solis.

DAVID BAÑA NOVO ADESTRADOR DA SCD MALPICA.

2011-11-22T23:27:00.002+01:00

Tras unha reunión que mativo esta tarde-noite a directiva da SCD Malpica, podemos confirmar que o novo adestrador dos modestos do conxunto malpicán é David Baña.

David Baña ten 39 anos de idade, xogando en equipos como o Baio, Ural, Larín ou Suevos. Xa como adestrador (conta co nivel 2 do título) comezou no Oseiro para pasar posteriormente ao Arteixo, onde levou as categorías inferiores e ao equipo "B". Despois estivo dous anos no Victoria xuvenil na Liga Galega, tendo a súa última experiencia no Sofán, onde dirixiu ao primeiro equipo durante tres tempadas (dende o 2008 ao 2011) rematando a tempada pasada na 3ª posición da táboa clasificatoria da Liga da Costa.

Dende este blog dexamoslle a Baña a mellor das sortes na súa etapa ao fronte da SCD Malpica.

COMUNICADO: MANUEL AGILDA DEIXA DE SER O ADESTRADOR DOS AFECCIONADOS DA SCD MALPICA.

2011-11-21T19:51:00.003+01:00

Despois dunha reunión que mantiveron esta tarde representantes da directiva da SCD Malpica con Manuel Agilda, este mesmo trasladounos a súa intención de deixar o seu posto de forma irrevocable. Finalmente, a directiva aceptou os seus motivos e a súa decisión respetando os motivos que nos espuxo.

Dende a directiva da SCD Malpica queremos agradecerlle a Manuel Agilda a súa labor ao frente dos modestos nestes tres anos e medio e a súa calidade como persoa, desexandolle moita sorte no futuro, tanto no persoal como no mundo do fútbol.

LIGA DA COSTA 12ª XORNADA: ESTEIRANA 1 - SCD MALPICA 1

2011-11-21T14:18:00.001+01:00

SCDR ESTEIRANA: Beni, Maxi (Chispi min.74), Simón, Dani, Suizo, Uru (Andel min.72), Adelino, Eloy, Roberto Pladur, Adrián (Iago min.77), Álex (Isma min.88).

SCD MALPICA: Suso, Charlie, Víctor, Iago, Marco (Marcos Amado min.78), Nando (Manu Pardo min.65), Neucha, Cheo, Alfredo (Charro min.53), Andrés (Daniel Varela min.88), Rancaño.

Árbitro: Mella Fernández. Estivo mal na tarde de onte. Durante a primeira metade indicou moitos fóras de xogo, algúns deles moi dubidosos, ademais de amosar numerosos cartóns amarelos pouco xustificados. Na segunda parte, non sinalou dúas penas máximas que foron reclamadas polos malpicáns: unha obstrucción sobre Alfredo cando o dianteiro ía presionalo gardameta local, e un derrubo de Maxi a Cheo cando éste penetraba na área. O xogador da Esteirana Suizo foi expulsado na recta final do encontro por dobre amarela.

Incidencias: Tarde despexada e cunha temperatura agradable no Xosé Luís Vara. Unhas 125 persoas presenciaron o encontro. O dianteiro malpicán Alfredo tivo que abandonalo terreo de xogo tras apoiar mal e sentir un forte dor no xeonllo dereito; está á espera de que lle fagan as pertinentes probas para coñecelo alcance exacto da lesión.

Goles: 0-1 (min.32): Saque en longo do gardameta Suso, Nando pelea o balón de cabeza que lle cae a Rancaño, e este realiza unha volea dende uns 25 metros sen deixar que o esférico toque o chan, entrando preto da escadra dereita, nun auténtico golazo. 1-1 (min.39): Os locais sacan unha falta rápida no seu campo, Adelino recibe libre de marca á altura de tres cuartos enviando un pase en profundidade cara Roberto Pladur que se planta ante Suso e anota a porta vacía tras regatealo.

Crónica: En plena crise de resultados como local, a SCD Malpica afrontaba un novo encontro a domicilio, buscando recuperalos puntos que perde na Pedra Queimada. O seu rival era a Esteirana, conxunto co que estaba empatado a puntos na zona media da táboa clasificatoria. O adestrador malpicán, Manuel Agilda, contaba coas baixas de Óscar Moscoso e de Pablo (por problemas musculares). Os visitantes comezaron moi ben o encontro, pois durante os primeiros 15-20 minutos tiveron o control do partido, dominaron no mediocampo e chegaron en varias ocasións con moito perigo, contabilizando ata tres oportunidades para marcar: un disparo de Nando dende o punto de penalti tras unha boa xogada colectiva que Berni mandou a saque de esquina co pé; un tiro de Neucha que sae fóra por pouco; e un disparo de Charlie tras un rexeite dende o borde da área que marcha preto do pao esquerdo. Sen embargo, a medida que pasaban os minutos a presión foi decaendo, e a Esteirana comezou a crear perigo mediante balóns en longo e cambios de orientación, tratando de buscarlle as espaldas á defensa, pero atoparonse cun seguro Suso nos balóns colgados. Os malpicáns perderon a orde, e apenas conseguiron trenzar xogadas con criterio, perdendo intensidade á hora de presionar.

A segunda parte foi igualada, cun Malpica que non atopou ritmo de xogo e ao que de novo lle custou mantela posesión do balón, mentres que a Esteirana defendía con agresividade e tentaba sair rápido buscando aos seus xogadores de ataque. Ademais, houbo constantes interrupcións no xogo. Apenas se contabilizaron accións claras de gol, destacando para os malpicáns un disparo de Manu Pardo dende a frontal que Berni despexou a saque de esquina e un centro raso de Cheo dende a banda dereita que se paseou polo borde da área pequena sen atopar rematador. A Esteirana tivo unha boa oportunidade tras unha xogada individual de Roberto Pladur pero o seu disparo marchou fóra. Trala expulsión do local Suizo no min.85, semellaba que o Malpica tíña unha última oportunidade para lograla victoria, pero non foron capaces de aproveitala superioridade numérica, mostrandose moi desatinados e desordenados, e mesmo estiveron cerca de perder pois foi a Esteirana a que tivo dúas oportunidades claras de gol nos minutos finais: un remate de cabeza de Adelino tras un saque de esquinda que Suso despexou cunha fenomenal parada e un centro dende a banda esquerda que Roberto Pladur non atinou a rematar en boca de gol.

Empate xusto nun partido no que a SCD comezou moi ben pero no que pouco a pouco foron mostrando peores sensacións. De novo os malpicáns comezaron por diante no marcador, pero como sucedese en datas pasadas non foron capaces de mantelo resultado a favor (como por exemplo ocurrira en Baio, frente ao Castriz ou frente ao Corme). Urxe a necesidade de gañar encontros (sobre todo como locais) pois as xornadas pasan e o equipo achégase á zona media-baixa da clasificación (acumulan cinco encontros sen vencer, e un triunfo nos derradeiros oito disputados). A vindeira semana o Malpica recibe na Pedra Queimada ao Dumbría "B", unha das revelacións da tempada.

AXENDA PARA O FIN DE SEMANA

2011-11-18T14:22:00.000+01:00

- AFECCIONADOS: Esteirana - SCD Malpica, domingo 20 de novembro ás 16:15 horas.

- XUVENÍS: Corme - SCD Malpica, sábado 19 ás 16:15 horas.

- CADETES: SCD Malpica - Esteirana, sábado 19 ás 16:00 horas na Pedra Queimada.

ÉXITO DA 1ª CEA-BAILE DA SCD MALPICA

2011-11-14T14:16:00.000+01:00

Dende a directiva da SCD Malpica queremos darlle as gracias a tódolos que acudiron o pasado sábado 12 de novembro á cea-baile que organizamos no Restaurante Canta la Rana, pois foi un éxito rotundo ao xuntar unhas 175 persoas. Gracias por colaborar e esperamos que o pasarades moi ben.

LIGA DA COSTA 11ª XORNADA: SCD MALPICA 1 - FISTERRA 3

2011-11-14T14:07:00.003+01:00

SCD MALPICA: Víctor Martínez, Charlie (Pablo min.46; Daniel Varela min.88), Marcos Amado, Víctor, Iago, Nando (Miguel Avelino min.78), Neucha, Cheo, Alfredo, Andrés (Charro min.46), Rancaño.

SD FISTERRA: David, Juan, Piti, Nico, Santi, Gus, Guardiola (Edi min.67), Roco (Borja Munitis min.89), Dudo, Tata (Dudo Rivas min.70), Rivas (Insua min.57).

Árbitro: Carro Moreira. Mal, errou en varias xogadas clave, perxudicando ao Malpica. De feito, os locais reclamaron dous penaltis que semellaron moi claros: na primeira metade pediron mans dun xogador do Fisterra por despexar coa man unha falta lateral botada por Neucha, e no segundo tempo reclamaron a pena máxima por un derrubo dun defensor sobre Charro.

Incidencias: Tarde cunha temperatura agradable, con vento pero sen choiva na Pedra Queimada. Bo ambiente no campo, cunhas 150 personas presenciando o encontro. O xogador malpicán Pablo abandonou o terreo de xogo debido a unha lesión muscular.

Goles: 0-1 (min.15): Os locais perden o esférico na zona de mediocampo, o Fisterra monta o contragolpe, Rivas recibe fóra da área enviando un pase raso en profundidade que chega a Rivas tras producirse un erro de coordinación entre a defensa e o gardameta malpicáns. 0-2 (min.36): Nico saca directamente unha falta dende uns 40 metros que se cola preto da escadra dereita. 1-2 (min.82): Boa xogada colectiva do Malpica que culmina cunha internada de Cheo pola banda dereita que bate a David de tiro raso. 1-3 (min.94): Falta dende a banda dereita botada por Dudo que remata Insua coa cabeza no segundo pao.

Crónica: A SCD Malpica recibía a un dos clásicos da Costa, ao Fisterra, no que era un dos partidos máis atractivos da 11ª xornada, pois enfrontaba a dous conxuntos chamados a estar na zona alta da clasificación e que contan con xogadores ofensivos de calidade nas súas plantillas. Manuel Agilda, contaba coas baixas de Óscar Moscoso (recuperándose dunha grave lesión de xeonllo) e de Suso (por motivos persoais). A primeira metade foi moi disputada, se ben os malpicáns precipitábanse en ocasións ao querer chegar demasiado rápido á área visitante, abusando do balón en longo dende a defensa e o medio do campo, pero a pesar de non desenvolver un fútbol brillante tiveron varias oportunidades para marcar: un disparo de Alfredo dende o borde da área tras recuperar o balón en líña de tres cuartos que David despexa a saque de esquina; un disparo de Cheo que marchou desviado; e un novo tiro de Alfredo dende o punto de penalti tras un saque de esquina que David despexou de forma espectacular. O Fisterra tratou de crear perigo sobre todo polas bandas, cos seus extremos moi abertos, pero apenas lograron disparar con pergio; a cambio, mostraron unha gran efectividade.

No segundo tempo os malpicáns sairon con máis intensidade, subindo líñas, e metendo ao Fisterra no seu propio campo, tiveron máis posesión do balón pero mostráronse de novo algo imprecisos e precipitados, conscientes tamén de que non había tempo que perder pois cada minuto que pasaba a posible remontada era máis complicada. Volveron a crear perigo na área visitante, pero non tiveron a fortuna de materializalas oportunidades coas que contaron, destacando un disparo de Neucha que nunha posición inmellorable marchou alto. Unha das claves estivo nos minutos finais, cando o colexiado non sinalou penalti nunha falta cometida sobre Charro co 1-2 no marcador. O Fisterra renunciou practicamente ao ataque, acumulando xente atrás, e apenas sumou accións de perigo.

De novo mala fortuna a que tivo o Malpica na tarde do sábado, pois o resultado non reflexa o acontecio no terreo de xogo, xa que por oportunidades e por dominio puideron gañalo encontro. Os malpicáns están en pleno bache de resultados, sumando tan só unha vitoria nos derradeiros sete encontros (feito que se agudiza como locais, xa que na Pedra Queimada só sumaron 4 puntos dos 18 disputados). A vindeira semana afrontan o desprazamento máis londo da tempada, debendose enfrontar á Esteirana.

AXENDA PARA O FIN DE SEMANA

2011-11-11T13:22:00.000+01:00

- AFECCIONADOS: SCD Malpica - Fisterra, sábado 12 ás 16:30 horas na Pedra Queimada.

- XUVENÍS: SCD Malpica - Laxe, sábado 12 ás 12:00 horas na Pedra Queimada.

- CADETES: Coristanco - SCD Malpica, sábado 12 ás 10:30 horas.

LIGA DA COSTA 10ª XORNADA: SCD MALPICA 0 - BUÑO 1

2011-11-06T15:06:00.001+01:00

SCD MALPICA: Suso, Charlie, Marcos Amado, Víctor, Iago, Nando, Dani (Neucha min.56), Cheo, Alfredo (Pablo min.64), Andrés (Charro min.46), Rancaño.

SD BUÑO: Toni, Ángel (Eloy min.69), Brais, Alfredo, Diego, Jorge, David Dourado (Miguel Dourado min.80), Ismael, Víctor Vilar (Richard min.67), Elías, Juan (Óscar min.84).

Árbitro: Álvarez Vega. Ben, sempre seguiu o xogo de cerca e aplicou o reglamento con coherencia sen deixarse intimidar por ningún dos dous equipos. Non houbo expulsados.

Incidencias: Tarde fría e nubrada na Pedra Queimada. Boa entrada, con preto de 200 espectadores. Na recta final do encontro houbo unha pequena liorta entre Nando e Richard que non foi a maiores. Non houbo lesionados de gravidade.

Goles: 0-1 (min.48): Balón en longo do Buño cara a zona de tres cuartos, Marcos Amado despexa, o balón rebota en Elías quedándolle nunha situación inmellorable para controlar e bater a Suso cunha vaselina cando o gardameta malpicán inicaba a saída, nunha acción con moita fortuna para os visitantes.

Crónica: Despois do importante empate colleitado fronte ao Club do Mar na xornada precedente, a SCD Malpica recibía na Pedra Queimada ao outro equipo do Concello na competición, un Buño que chegaba en boa forma tras gañalos dous últimos encontros. Os locais recuperaban efectivos para a contenda, pero seguían acumulando as baixas de Óscar Moscoso e Daniel Varela (recuperándose dun esguince de nocello). Nos primeiros minutos o partido estivo igualado, cos dous equipos sen arriesgar en exceso con moito xogo no mediocampo. Sen embargo, a partir do minuto 10 o Malpica comezou a tela posesión do balón, comezando a crear perigo polas bandas e tamén con pases interiores cara os desmarques de Alfredo, a pesar de que se mostraron imprecisos en moitas fases do partido, perdendo moitos balóns en accións relativamente sinxelas. Os locais tiveron varias oportunidades claras de gol, destacando as seguintes: un disparo raso de Alfredo que Toni manda a saque de esquina; centro dende a dereita cara Rancaño que remata no borde da área pequena pero o seu tiro despexao Toni nun paradón; novo disparo de Rancaño dende o borde da área que se marcha desviado por pouco; e un centro-chut de Nando que da no longueiro. Polo que atinxe ao Buño, tentou de presionar aos malpicáns no mediocampo, deixando a Víctor como referencia ofensiva, pero apenas combinaron en ataque, salvo nunha acción de Elías na que asiste a Juan pero o seu disparo dende a posición de extremo esquerdo marchou demasiado cruzado.

No segundo tempo, Manuel Agilda introduciu a un dianteiro (Charro) e quitou a un mediocentro (Andrés), buscando ter máis mordente ofensiva tratando de materializala superioridade da SCD. Comezou avisando o Malpica por medio dun disparo de Nando que Toni saca con moitos apuros e un tiro de Alfredo que se marchou alto. Cando semellaba que o gol local era cuestión de tempo, o conxunto oleiro logrou abrilo marcador nunha acción con moita fortuna. Os locais non baixaron os brazos e seguiron presionando, monopolizando a posesión ante un Buño que atrasou líñas, defendendose como podía. O Malpica contou con moitas ocasións para marcar, pero unhas veces a falta de puntería e outras veces as paradas de Toni (probablemente o mellor xogador do encontro) evitaron que conseguisen o gol. Destacaron as seguintes accións: xogada individual de Charro que culmina cun remate dende o pico esquerdo da área que atalla Toni; disparo lonxano de Nando, Toni rexeita, o balón cáelle a Alfredo que controla con dificultades, dispara e Toni volve a sacar en boca de gol; novo disparo do Charro coa zurda que se marcha alto. Nos últimos 15-20 minutos, os malpicáns seguiron coa intención de marcar, pero non contaron con oportunidades claras, ainda que si crearon perigo, sobre todo pola banda dereita. O Buño, co marcador a favor dende o comezo da segunda metade, aguantou a presión local como puido, tendo a Toni o seu mellor home, pero non lograron tirar a porta máis veces.

Mala fortuna para o Malpica, que tivo moitas oportunidades pero non lograron culminalas. A SCD non logra sumar puntos como local, pois dos 15 puntos disputados na Pedra Queimada só lograron 4, ademais suman tres xornadas consecutivas sen vencer, quedándose na zona media da táboa clasificatoria. A vindeira semana xogan tamén como locais, pois reciben ao Fisterra.

AXENDA PARA O FIN DE SEMANA

2011-11-04T15:05:00.000+01:00

AFECCIONADOS: SCD Malpica - Buño, sábado 5 ás 16:30 horas na Pedra Queimada.

XUVENÍS: Camariñas - SCD Malpica, sábado 5 ás 15:30 horas.

CADETES: SCD Malpica - Dumbría, sábado 5 ás 11:00 horas.

CEA-BAILE SCD MALPICA

2011-11-02T16:01:00.005+01:00

A SCD MALPICA celebra unha cea-baile o sábado 12 de novembro no Restaurante Canta la Rana (Buño). O precio é de 25€ por persoa. Despois da cea haberá música de tódolos tipos cun DJ.

Hai que coller as entradas antes de que se acaben porque hai aforo limitado. No cartel están tódolos sitios onde se poden adquirir: no pub Jofra; na tenda de Posiño que está na rúa principal (diante da librería Miguens); ou falando con Iago ou Andrés.

Tamén se sorteará unha camiseta do Malpica, unha camiseta do Deportivo (firmada polos xogadores) e un dvd.

Gracias a todo@s

LIGA DA COSTA 9ª XORNADA: CLUB DO MAR 1 - SCD MALPICA 1

2011-10-31T14:10:00.003+01:00

Club do Mar: Yago, Rubén (Fran Borrazás min.67), Pablo Corral (Chori min.82), Repi, Álex, Juan Lareo (Isaac min.85), Bertín, Jacobo, Santi Silva, Manu (Luis Lareo min.79), Vituco.

SCD Malpica: Suso, Charlie, Cheo, Víctor, Iago, Alfredo (Casais min.77), Neucha (Miguel min.88), Dani (Charro min.62), Pablo (Marco min.90), Andrés, Nando.

Árbitro: David Brun. Tivo unha actuación bastante correcta, non se deixou intimidar e aplicou o mesmo criterio durante todo o encontro. Sen embargo, os dous equipos protestaron moito os dous goles: os malpicáns reclaman fóra de xogo de Vituco no gol local; pola contra,o equipo de Caión entendeu que o visitante Pablo arranca en posición ilegal xa xogada que supuxo o penalti do empate.

Incidencias: Tarde despexada e cunha temperatura moi agradable no "Nova Porta Santa" de Paiosaco. Gran ambiente no campo, con aproximadamente 250 persoas presenciando o encontro. O xogador do Club do Mar Pablo Corral tivo que ser sustituido tras chocar contra as vallas que delimitan o campo.

Goles: 1-0 (min.18): Falta lateral dende a banda esquerda do ataque local que centra Repi para que Vituco marque de cabeza dende o punto de penalti. 1-1 (min.20): Pablo controla na área un gran pase en longo de Nando, faille un sombreiro a un defensa local que intercepta o balón coa man, indicando o colexiado a pena máxima. O propio Pablo transforma o penalti.

Crónica: Tocaballe á SCD Malpica enfrontarse ao gran favorito para levarse a Liga da Costa 2011/2012, o Club do Mar, o que implicaba unha pedra de toque inmellorable para comprobar se a mellora dos malpicáns que amosaron nas últimas xornadas se consolidaba. O equipo adestrado por Manuel Agilda contaba con varias baixas: Óscar Moscoso; Marcos Amado (cun esguince de nocello); Daniel Varela (mancado nun xeonllo); Manu Pardo (por enfermidade);e Rancaño (sancionado). O partido comezou cun ritmo moi alto, que se mantería durante, practicamente, os 90 minutos, cos dous equipos ben armados e sen dar moitas opcións aos atacantes. Os locais lograban ter máis posesión de balón, pero en zonas pouco perigosas, mentres que os malpicáns agardaban pacientes tratando de aproveitalas oportunidades que se lle poidesen presentar. As accións con perigo de gol foron escasas, destacando, por parte do Malpica, unha falta directa botada por Nando que case sorprende a Yago. Os locais creaban perigo, sobre todo, a balón parado, pero contaron cunha gran oportunidade nun balón que quedou morto tras chocar Suso con Vituco (nunha falta ao gardameta malpicán que non indicou o colexiado) pero os malpicáns lograron despexar antes de que rematase a porta. Nos últimos 10-15 minutos da primeira metade apenas se xogou, pois houbo varios paróns no xogo.

A segunda parte volveu a comezar cos dous coxuntos empregándose con moita intensidade, cun Club do Mar que adiantou líñas despregando un xogo máis directo, pero con pouca profundidade. O Malpica continuou ben posicionado no terreo de xogo, amosandose como un conxunto compacto defensivamente e tentando de aproveitalos espacios que quedaban ás costas dos defensas locais, pero faltoulles un pouco de precisión para poder culminalos seus intentos de contragolpe con maior fortuna, e a pesar de chegar en varias accións á área rival non contaron con oportunidades claras, salvo un disparo de Neucha dende a frontal que Yago atrapou en dous tempos. Tampouco tivo o Club do Mar grandes oportunidades, pero si creou perigo a balón parado, destacando un cabezazo de Juan Lareo que se marchou alto tras un saque de esquina e un remate dun atacante local na recta final do encontro tras un saque de falta lateral que Suso sacou cunha gran intervención.

Partido moi disputado entre dous equipos que se empregaron a fondo, se ben os locais tiveron máis posesión pero atopáronse cun Malpica moi serio e que amosou unha gran entrega na tarde do sábado. Os malpicáns seguen dando unha gran imaxe nos encontros que disputan como visitantes (10 puntos en cinco encontros), agora falta que logren unha maior fortaleza como locais para colarse nos postos altos da táboa clasificatoria. O vindeiro fin de semana a SCD recibe na Pedra Queimada ao Buño, no que será o primeiro derbi da tempada entre os dous equipos do concello na Liga da Costa.

PRENSA

2011-10-30T12:42:00.000+01:00

A web elnoticierodearteixo.com dedica este domingo un amplo reportaxe ao encontro que enfrontou ao Club do Mar e á SCD Malpica (1-1). Aquí se pode ver.

LIGA DA COSTA 8ª XORNADA: SCD MALPICA 2 - CORME 2

2011-10-24T14:09:00.001+02:00

SCD MALPICA: Suso, Charlie, Marcos Amado (Dani Varela min.70), Víctor, Iago, Rancaño, Neucha (Dani min.64), Cheo, Pablo, Andrés (David min.73), Alfredo.

CORME CF: Susiño, Adolfo, Alejandro, Jesús, Abel, Diego, Martín (Gonzalo min.85), Adrián, Iago, Lucas (Dani min.90), Alejo.

Árbitro: Vázquez Suárez. Tivo un grave erro no primeiro gol do Corme, pois hai un claro fóra de xogo do dianteiro Iago no arranque da xogada. Tamén estivo algo desatinado á hora de apreciar saques de banda ou faltas, perxudicando indistintamente a ámbolos dous conxuntos. Expulsou ao malpicán Rancaño no min.75 por dobre amarela. Na recta final do encontro, o Malpica reclamou un posible penalti cometido sobre Cheo.

Incidencias: Tarde moi despacible na Pedra Queimada, con vento e choiva durante, practicamente, os 90 minutos. Non obstante, houbo unha gran entrada no campo, cunhas 150 persoas nas bancadas. O defensa do Malpica Marcos Amado tivo que abandonalo terreo de xogo por un esguince de nocello.

Goles: 1-0 (min.25): Falta a prol do Malpica na parte esquerda do borde da área do seu ataque que executa Alfredo cunha gran precisión por encima da barreira. 1-1 (min.31): Adrián realiza unha diagonal dende a banda esquerda, envía en profundidade cara Iago que asiste para que marque Alejo. 1-2 (min.67): Perda de balón dos malpicáns que permite o rápido contragolpe dos visitantes que culmina cunha internada por banda esquerda de Adrián que tras penetrar na área envía cara atrás para que Alejo anote cun tiro preciso dende o borde da área. 2-2 (min.85): Alfredo controla un balón no borde da área tras un rexeite da defensa do Corme, e lanza un gran disparo que se cola preto da escadra esquerda.

Crónica: Despois de sumar tres puntos importantes no complicado campo do Sofán, a SCD Malpica volvía á Pedra Queimada para medirse a un perigoso Corme coa intención de lograr unha victoria que lle permitise meterse na parte alta da táboa clasificatoria. Manuel Agilda non podía contar cos seguintes efectivos: Manu Pardo (por motivos persoais); Nando (con problemas físicos nun xemelgo); Óscar Moscoso; Marco, Miguel Avelino e Charro (estes tres últimos ultiman a súa recuperación de diferentes lesións). A primeira parte estivo igualada, cun Malpica ao que lle costou combinar e que quizáis abusou do xogo directo, mostrando pouca continuidade no seu fútbol e con pouca profundidade. Non obstante, si crearon perigo a balón parado, sacando numerosos saques de esquina pero non estiveron acertados cara ao gol (ademais do gol de falta directa). A mellor ocasión dos malpicáns estivo nas botas de Alfredo que cruzou en exceso un bo servicio de Cheo dende a banda dereita. O Corme mostrou algunha dificultade na parecela defensiva, pero daba sensación de perigo cando lograban combinar no mediocampo e conectar cos seus habilidosos atacantes, ainda que non coseguiron ter oportunidades claras.

No segundo tempo, a SCD Malpica saiu con máis intensidade, presionando máis arriba e tendo agora máis claridade á hora de xogalo esférico. Froito de tal panorama foron as numerosas ocasións das que dispuxeron para poñerse por diante no marcador: un disparo cruzado de Neucha dende a posición de extremo esquerdo; un tiro raso cruzado de Alfredo que Susiño envía a saque de esquina con moitos aputos; remate excesivamente alto de Pablo tras un saque de esquina botado por Alfredo; nova xogada local que conclúe cun centro de Neucha dende a banda esquerda sobre Rancaño pero este dispara alto. Cando parecía que o gol do Malpica era só cuestión de tempo, chegou o gol do Corme nun contragolpe (practicamente no único disparo entre os tres paos neste segundo acto) que supoñía a remontada. Pouco despois chegaría outra mala nova para os locais, a expulsión de Rancaño con case 20 minutos por disputarse, pero lonxe de baixalos brazos, a SCD apretou ainda máis, metendo ao Corme no seu campo e contando con varias accións de perigo, sobre todo nun disparo de Cheo que desviou lixeiramente un defensa cando levaba dirección de gol.

Segue a mala xeira de resultados do Malpica como local, pois en catro encontros leva tan só un triunfo. Sen embargo, deixaron boas sensacións, desenvolvendo un gran encontro na segunda metade, superando ao Corme (inclusive con dez xogadores) pero un erro arbitral no primeiro gol en contra e a gran efectividade dos visitantes provocaron que non se levaran os tres puntos. A vindeira semana a SCD enfróntase ao todopoderoso Club do Mar, máximo favorito para gañala Liga da Costa.

PREVIA

2011-10-21T14:41:00.000+02:00

Nova xornada para os equipos do Malpica:

- AFECCIONADOS: SCD Malpica - Corme, domingo 23 ás 16:30 horas na Pedra Queimada.

- CADETES: Santa Comba - SCD Malpica, sábado 22 ás 11:00 horas.

Os xuvenís descansan este fin de semana.

CLASIFICACIÓN DA 7ª XORNADA DA LIGA DA COSTA

2011-10-17T14:50:00.000+02:00

RESULTADOS DA 7ª XORNADA DA LIGA DA COSTA

2011-10-17T14:46:00.000+02:00

LIGA DA COSTA 7ª XORNADA: SOFÁN 0 - SCD MALPICA 3

2011-10-17T14:17:00.001+02:00

SD SOFÁN: Richard (Luís de la Peña min.25), Adrián, Víctor Docampo, Juanjo, Miniño, Alemán (Alberto Pensado min.58), David Pensado (Edu min.70), Suso Docampo, Mario, Iván Rey (Jacobo min.54), Abel (Berti min.70).

SCD MALPICA: Suso, Charlie, Marcos Amado, Víctor, Iago, Rancaño (Alfredo min.61), Cheo (David Álvarez min.70), Dani (Neucha min.60), Pablo, Andrés (Dani Varela min.60), Nando.

Árbitro: Rama Cotelo. Mala actuación na tarde de onte, especialmente á hora de aprecialos fóras de xogo, pois deixou sen indicar varios claros, sobre todo, dos atacantes locais. O Sofán reclamou penalti na recta final do encontro por unhas presuntas mans de Marcos Amado. Non houbo expulsados.

Incidencias: Gran entrada no "Carral", con máis de 200 espectadores nas bancadas. Tarde soleada e cunha temperatura case propia do verán. O gardameta do Sofán Richard tivo que abandonalo terreo de xogo con problemas físicos. Tamén o malpicán Andrés tivo que ser sustituído por molestias musculares.

Goles: 0-1 (min.31): Saque de banda dende o lateral dereito da área do Sofán que bota Cheo, Charlie pelexa de cabeza cun defensa local, o esférico cae morto no borde da área pequena para que Pablo anote moi oportunamente. 0-2 (min.64): Gol de Alfredo de falta directa dende uns 25 metros que sorprende a Luís de la Peña. 0-3 (min.88): Pablo culmina cunha vaselina unha gran xogada individual na que se desfixo de dous contrarios tras aproveitar un contragolpe.

Crónica: Partido de necesidades o que disputaban Malpica e Sofán, pois os dous chegaban en plenas xeiras negativas de resultados. Os malpicáns pouco a pouco recuperan efectivos tras un inicio ligueiro plagado de baixas, pero ainda así contaban con varias ausencias: Marco, lesionado muscular; Charro, recuperándose dun esguince de nocello; Óscar Moscoso; e Miguel Avelino mancado nun abductor. O encontro comezou moi igualado, cos dous equipos empregándose con moita intensidade, e cun fútbol predominantemente directo, feito que favorece as reducidas dimensións do Carral. A SCD Malpica mantívose ben plantada no terreo de xogo, tratando de profundizar por ámbalas dúas bandas, e creando moito perigo nas xogadas a balón parado (especialmente nos saques de banda próximos á área local). Os visitantes tiveron varias oportunidades de gol: Nando estrela un balón no longueiro tras botar unha falta lateral; o propio Nando remata culminando unha boa acción colectiva; e un disparo Rancaño excesivamente cruzado de Rancaño dende o borde da área. O Sofán comezou ben o encontro, pero a medida que pasaban os minutos mostrou máis facilidades que a punto estiveron de costarlle algún disgusto máis. A mellor oportunidade dos locais estivo nas botas de Mario que se plantou ante Suso (tras arrancar en claro fóra de xogo) pero o gardameta visitante gañoulle a partida desviando a saque de esquina o disparo do atacante.

No segundo tempo, os xogadores adestrados por Manuel Agilda administraron ben a renta a favor da que disfrutaban, sobre todo a partir do 0-2, e non se deixaron sorprender por un Sofán que abusou do pelotazo. O Malpica xuntou líñas evitando apuros defensivos e buscando facer perigo a través de rápidos contragolpes a través dun xogo non moi vistoso pero si efectivo. As mellores oportunidades destes segundos 45 minutos tiveron aos visitantes como protagonistas: semivolea de Cheo dende o borde da área que rexeita nun defensa local cando levaba clara pinta de gol; un cabezazo de Neucha dende a área pequena que atalla Luís de la Peña; tiro de Dani no segundo pao tras un centro dende a banda esquerda que sae alto; e unha acción individual de Alfredo que culmina cun disparo raso que sae desviado por pouco. O Sofán tivo a súa mellor acción de ataque a través dunha internada de Víctor pola banda esquerda, pero o seu disparo atallouno Suso.

Bo partido do Malpica que se soubo adaptar ben ás condicións do terreo de xogo (herba natural e moi estreito de ancho), mostrando unha maior seguridade defensiva que en partidos precedentes (de feito é o primeiro encontro no que non encaixan) e adminstrando ben a vantaxe no marcador, algo que non sudeceu en xornadas anteriores. A SCD leva unha gran cantidade de puntos colleitados como visitante (tres partidos gañados de catro disputados), pero debe melloralos números como local, tendo a primeira oportunidade a vindeira semana ante o Corme.

LIGA DA COSTA 6ª XORNADA: SCD MALPICA 0 - CAMARIÑAS 4

2011-10-10T14:35:00.002+02:00

SCD MALPICA: Suso, Charlie, Marcos Amado, Víctor (Casais min.22), Iago, Rancaño, Neucha, Dani (Manu Pardo min.74), Pablo, Andrés (Nando min.64), Alfredo.

CAMARIÑAS CF: Pombo, Carlos (Carlos Doile min.83), Breo, Ogando, Maikel, Moriño, Brais, De la Sierra (Nico min.78), Leo, Javi (Adrián min.64), Juan (Dani min.78).

Árbitro: Trigo Martínez. Mal. Non indicou un penalti bastante claro de Ogando sobre o malpicán Pablo no min.25, co resultado de empate. Concedeu o cuarto gol do Camariñas cando Adrián arrancou en posición moi dubidosa. E na recta final do encontro, anuloulle un gol aos visitantes por presunto fóra de xogo nunha acción a balón parado.

Incidencias: Gran entrada na Pedra Queimada, cunhas 200 persoas no campo. Tarde soleada cunha temperatura primaveral. O defensa malpicán Víctor tivo que deixalo encontro por problemas musculares nun abductor.

Goles: 0-1 (min.37): Despexe frouxo do local Iago que intercepta Brais no borde da área, realiza unha parede, intérnase na área e envía cara Leo que marca a pracer. 0-2 (min.42): Nova parede da dianteira visitante, pero esta vez é Leo o que asiste a Javi para que anote a porta vacía. 0-3 (min.53): Xogada individual de Brais pola banda dereita que tras desfacerse de varios rivais bate a Suso cun gran tiro que entra preto da escadra esquerda. 0-4 (min.75): Pase en profundidade sobre Adrián, penetra na área en posición de extremo esquerdo, enviando un centro que remata Leo á altura do punto de penalti.

Crónica: Recibía a SCD Malpica na Pedra Queimada a un dos claros favoritos ao título, a un Camariñas que o precedía na clasificación en un punto, polo que semellaba unha boa oportunidade para gañar algunha posición na táboa clasificatoria e situarse na zona alta. Para esta xornada, Manuel Agilda acumulaba as seguintes baixas: Charro; Óscar Moscoso; Miguel Avelino e Marco. O encontro comezou cun ritmo elevado, cos dous conxuntos empregándose a fondo, ainda que predominaba o xogo directo. Os malpicáns estiveron ben situados no terreo de xogo, xogando con intensidade e tratando de sair rápido cando roubaban o esférico en zona de mediocampo. A igualdade foi a nota predominante, con poucas accións perigosas de gol. Así, durante os primeiros 35 minutos só houbo unha oportunidade clara por bando: un balón en profundidade sobre o malpicán Dani que envía alto tras penetrar na área (aparte do posible penalti sobre Pablo cando se plantaba ante Pombo), e un disparo excesivamente cruzado do visitante Leo. Non obstante, na recta final da primeira metade o Camariñas aproveitou dous erros defensivos dos locais para marcar dous goles en cinco minutos e marchar ao descanso cunha vantaxe importante no marcador.

Na reanudación, a SCD tratou de sair cun sistema táctico máis ofensivo, tratando de remontala contenda, mentres que o Camariñas esperaba atrás buscando algún contragolpe que sentenciara o partido. A primeira acción de perigo estivo nos pés de Brais tras un saque de esquina, pero disparou alto. Os malpicáns tíñan máis posesión do balón, pero non gozaron de moita profundidade. Sen embargo, contaron con alguna ocasión para poder marcar algún gol e darlle algo de emoción ao encontro, sobre todo nun centro de Dani dende a banda dereita que Alfredo non atinou a rematar con acerto e nunha falta directa executada por Neucha que Pombo atallou sen moitos problemas. Nos minutos finais do encontro apenas houbo accións destacadas, cun ritmo de xogo que decaeu bastante, e tan só visitante Adrian puido matar cun remate a centro de Brais que Suso despexou a saque de esquina.

Segunda derrota consecutiva da SCD Malpica, que lle plantou cara ao Camariñas, pero que lle dexou as cousas demasiado sinxelas debido á erros defensivos en momentos clave do encontro. Deben os malpicáns amosar máis concentración e firmeza no aspecto defensivo, pois en 6 xornadas levan encaixados 14 goles, tantos como case en toda a primeira volta na tempada pasada. Por se fose pouco, é o primeiro partido no que non conseguen marcar. A vindeira semana afrontan un complicado desplazamento, xa que deberán xogar en Sofán.

AXENDA PARA O FIN DE SEMANA

2011-10-07T14:16:00.001+02:00

- AFECCIONADOS: SCD Malpica - Camariñas, domingo 9 de outubro ás 16:30 horas na Pedra Queimada.

- XUVENÍS: Cabana - SCD Malpica, sábado 8 de outubro ás 16:30 horas.

- CADETES: SCD Malpica - Muros, sábado 8 de outubro ás 16:00 horas.

CADETES: CLASIFICACIÓN DA 3ª XORNADA

2011-10-04T21:38:00.002+02:00

CADETES: RESULTADOS DA 3ª XORNADA

2011-10-04T21:36:00.002+02:00

XUVENÍS: CLASIFICACIÓN DA 5ª XORNADA

2011-10-04T15:52:00.000+02:00

XUVENÍS: RESULTADOS DA 5ª XORNADA

2011-10-04T15:49:00.002+02:00

CLASIFICACIÓN DA 5ª XORNADA DA LIGA DA COSTA

2011-10-04T15:45:00.002+02:00

RESULTADOS DA 5ª XORNADA DA LIGA DA COSTA

2011-10-04T15:37:00.000+02:00

LIGA DA COSTA 5ª XORNADA: BAIO 4 - SCD MALPICA 2

2011-10-03T16:16:00.003+02:00

CD BAIO: Pollo, Matías, Iván, Fredi, José Antonio (Pardo min.85), Eloy, Pirucho (Rubio min.60), Alberto, MC (Fermín min.89), Canay (Martín min.46), Javi Suárez.

SCD MALPICA: Suso, Víctor, Marcos Amado, Dani Varela, Iago, Rancaño, Neucha, Cheo, Pablo, Andrés (Manu Pardo min.73), Alfredo (Dani min.63).

Árbitro: Esparís Carballo. Regular. Aplicou o mesmo criterio para ámbolos dous conxuntos, ainda que cometeu bastantes erros na apreciación dos fóras de xogo. Expulsou ao local Matías no min.66 por presuntos insultos, e ao malpicán Cheo pouco despois por dobre amarela.

Incidencias: Boa entrada no Platas Reinoso, cuns 175 espectadores nas bancadas. Tarde despexada e moi calurosa, cunha temperatura máis propia do verán. Non houbo mancados de consideración.

Goles: 1-0 (min.8): Perda de balón do Malpica no seu propio campo, recuperan os locais que abren cara MC, éste centra dende a banda dereita cara Javi Suárez que marca dende o corazón da área. 1-1 (min.42): Neucha transforma unha falta directa dende o borde da área. 1-2 (min.55): Neucha recibe en líña de tres cuartos do ataque malpicán, orienta o esférico e saca un potente disparo que se cola preto do pao dereito da porta defendida por Pollo. 2-2 (min.65): Perda de balón do Malpica no seu propio campo, o Baio inicia o contragolpe por banda dereita, Javi Suárez plántase ante Suso e marca no man a man. 3-2 (min.69): Nova acción do Baio por banda dereita, Martín recibe no borde da área pequena, pero o seu disparo é rexeitado por Suso pero volve a pés de Martín que anota de rebote tras dar o balón no pao. 4-2 (min.75): Balón en longo dende a defensa local, Javi Suárez gáñalle a partida á defensa, platándose na área do Malpica e marcando ante Suso.

Crónica: Despois de encadenar dúas vitorias consecutivas, a SCD Malpica disputaba en Baio un novo partido ligueiro ante un dos equipos chamados a estar arriba na táboa clasificatoria, polo que era unha boa "pedra de toque" para comprobalo estado de forma dos malpicáns. O adestrador da SCD, Manuel Agilda, contaba con baixas importantes para o choque: Charro, recuperándose dun esguince de nocello; Charlie, por cuestións persoais; Óscar Moscoso, mancado de longa duración; Marco, por problemas musculares; Nando, por cuestións médicas; e Miguel Avelino, mancado nun abductor O Malpica comezou mal o partido, pois durante os pimeiros 15-20 minutos estiveron moi espesos na circulación de balón, errando pases sinxelos e perdendo moitos balóns en zonas perigosas, o que aproveitaba o Baio para tentar de crear perigo mediante rápidos contragolpes tratando de gañarlle as costas á defensa visitante. Sen embargo, co paso dos minutos a SCD foi logrando o control do encontro, agora tocando con máis atino e chegando con frecuencia á zona de tres cuartos do Baio, que comezou a pasar apuros defensivos, pero con pouca profundidade. O Malpica tivo varias oportunidades de gol, destacando dúas: un cabezazo de Neucha tras un centro dende a banda dereita de Víctor que detivo Pollo; e un tiro cruzado de Pablo tras recibir un pase en profundidade de Rancaño. A mellor ocasións dos locais, aparte do gol, estivo nos pés de Javi Suárez tras interceptar un mal pase de Dani Varela, pero Suso gañoulle a partida no man a man.

O segundo tempo comezou com rematara o primeiro, cun Malpica que aglutinaba a posesión do balón e que chegaba con bastante perigo á área de Pollo, logrando a recompensa en forma de remontada en apenas 10 minutos. Co marcador a favor, os visitantes continuaron atacando, e Neucha dispuxo dunha boa oportunidade para aumentar diferencias tras recibir un pase dentro da área, pero o seu disparo foi detido por Pollo. A contenda entrou un ida e volta que non beneficiou aos visitantes, pois o Baio aproveitou os erros defensivos malpicáns para sacar petróleo, simplemente cun xogo directo, aproveitando moi ben as oportunidades das que dispuxeron. Co 2-2 no marcador, a SCD tivo outras dúas accións moi claras para marcar, ámbalas dúas tiveron a Dani como protagonista, que non foi quen de materializar dous mans a mans ante Pollo. Despois do 4-2, e cun home menos en cada equipo, o partido decaeu, limitándose o Baio a deixar que transcurrise o tempo para asegurarse o triunfo.

Partido de contrastes para o Malpica, que tras un mal comezo foi quen de recuperarse e dominar ao Baio, pero cando lograron o máis complicado, poñerse por diante, dilapidaron a súa vantaxe con varios erros defensivos que lle custaron o triunfo. Debe mellorar en varios aspectos a SCD en próximas citas se pretenden estar na zona alta da clasificación, xa que tempo teñen de sobra. A vindeira semana reciben na Pedra Queimada a un dos grandes favoritos para logralo título, ao Camariñas (actual subcampión).

CLASIFICACIÓN DA 4ª XORNADA DA LIGA DA COSTA

2011-09-26T20:22:00.000+02:00

RESULTADOS 4ª XORNADA DA LIGA DA COSTA

2011-09-26T20:21:00.000+02:00

LIGA DA COSTA 4ª XORNADA: SCD MALPICA 4 - O PINDO 1

2011-09-26T14:35:00.001+02:00

SCD MALPICA: Suso (Víctor Martínez min.46), Víctor, Marcos Amado (Miguel Avelino min.59; Manu Pardo min.63), Dani Varela, Iago, Rancaño, Neucha, Cheo (Alfredo min.59), Pablo, Andrés (Nando min.59), Dani.

O PINDO CF: Garrido, Conexo (José min.56), Herminio, Álex (Diego min.79), Juan, Manolito (Casais min.49), Hugo, Lolo (Gonzalo min.60), Carlos (Pablo min.57), Leis, Nano.

Árbitro: Óscar López. Ben no primeiro tempo, onde apenas tivo complicacións, pero no segundo acto tivo algúns erros de apreciación á hora de sinalalos fóras de xogo, sendo moi riguroso cos malpicáns e permisivo cos visitantes. Indicou dúas penas máximas, unha para cada equipo: acertou a prol do Malpica tras ser derrubado Alfredo na recta final do encontro; pero errou ao indicar unha man de Víctor, pois estaba completamente pegada ao corpo. Non houbo expulsados.

Incidencias: Tarde soleada e con moita calor, especialmente no primeiro tempo. Gran entrada na Pedra Queimada, cuns 175 espectadores. O gardameta local Suso foi sutituido no descanso por precaucación, xa que arrastraba problemas musculares. O malpicán Miguel Avelino sufriu un pinchazo nun abductor nada máis incorporarse ao partido. Tamén o local Víctor tivo que abandonar momentaneamente o terreo de xogo na segunda metade por un corte de dixestión.

Goles: 1-0 (min.13): Gran pase en profundidade de Rancaño cara Cheo que entra pola banda dereita e bate a Garrido no man a man. 2-0 (min.40): Neucha recibe na posición de extremo esquerdo, controla e envía cara Pablo que marca dende o punto de penalti. 3-0 (min.42): Intercambiánse os papeis Pablo e Neucha, pois é o primeiro o que asiste a Neucha que marca coa dereita. 4-0 (min.48): Gran xogada individual de Pablo que se interna na área, desfaise de varios rivais (inclusive o gardameta) e marca a pracer. 4-1 (min.79): Penalti moi dubidoso por presuntas mans de Víctor que transforma Hugo de tiro raso.

Crónica: A SCD Malpica recibía na Pedra Queimada a O Pindo, conxunto que ainda non sumara ningún punto (conta cun partido menos) coa intención de lograla primeira victoria do curso como local para seguir na zona alta da clasificación. Como é (lamentablemente) habitual neste inico de liga, o conxunto costeiro afrontaba o encontro con varias baixas: Marco, por molestias musculares; Charro, con esguince de nocello; Charlie, sancionado; e Óscar Moscoso. No primeiro tempo só houbo un equipo sobre o terreo de xogo, pois o Malpica monopolizou a posesión do balón, mentres que O Pindo non disparou entre os tres paos durante os primeiros 45 minutos. Os malpicáns recuperaban moi rápido o esférico froito da boa presión de tódalas líñas, moveron o balón con criterio ante a pasividade visitante, e chegaron con perigo á meta de Garrido constantemente, pero tardaron en exceso en materializalas moitas oportunidades que tiveron (de feito ata o minuto 40 o resultado era de 1-0). De entre as ocasións que desperdiciaron, destacaron as seguintes: un cabezazo de Neucha tras un saque de esquina botado por Cheo que Garrido desvía cunha espectacular estirada; un remate de Neucha libre de marca no segundo pao que sae alto tras un novo centro de Cheo dende a banda dereita; un man a man de Pablo que detén Garrido; un disparo dende longa distancia de Rancaño que rexeita o longueiro, o rexeite cáelle nos pés a Neucha que a porta valeira envía fóra; etc. Pola súa parte, O Pindo amosou moitas dificultades para sacalo balón controlado e concedeu moitas facilidades defensivas, e apenas se acercou a área local.

No segundo tempo, o conxunto adestrado por Manuel Agilda saiu coa mesma intensidade que no primeiro acto, e xa nada máis sacar de centro contou cunha nova ocasión de gol nos pés de Pablo tras unha internada de Dani pola banda dereita. Pouco despois sentenciaban o encontro co 4-0 logrado por Pablo. Sen embargo, a medida que pasaban os minutos o ritmo foi decaendo, cun Malpica con menos ambición e que non tivo continuidade no xogo, o que provocou que O Pindo se acercase con perigo sobre a meta defendida por Víctor Martínez, aproveitándose das perdas de balón locais en zonas perigosas. A pesar deste feito, a SCD contou con novas ocasións claras para marcar: un man a man de Pablo que desaproveita por entreterse demasiado; unha nova oportunidade de Neucha que se marcha fóra; unha vaselina de Alfredo dende o pico dereito da área que sae alto por pouco; e un penalti que Garrido lle detivo ao propio Neucha. Os visitantes chegaron con perigo en varias accións, pero Víctor Martínez amosouse moi seguro, inclusive realizando unha gran parada desviando un tiro a bocaxarro de Leis.

En resumo, gran partido o que desenvolveu o Malpica durante os primeiros 55-60 minutos, dominando por completo e sen pasar apuros atrás, e só a falta de puntería e a gran tarde de Garrido (o mellor, sen dúbida, dos visitantes) impediron que o resultado fose de auténtico escándalo. Sen embargo, non deberon de relaxarse na segunda parte, pois na última fase do encontro baixaron moi a intensidade, "dándolle vida" a O Pindo. Con este triunfo a SCD logra os primeiros puntos da tempada como local, encadenando dúas victorias consecutivas. O seguinte partido será en Baio ante un dos equipos chamados a estar arriba na clasificación.

CLASIFICACIÓN DA 3ª XORNADA DA LIGA DA COSTA

2011-09-20T01:54:00.002+02:00

RESULTADOS DA 3ª XORNADA DA LIGA DA COSTA

2011-09-19T14:10:00.003+02:00

LIGA DA COSTA 3ª XORNADA: CORCUBIÓN 1 - SCD MALPICA 3

2011-09-19T13:26:00.002+02:00

UD CORCUBIÓN: Cristian, Pablo (Sebas min.63), Sergio Manín, Conguito, Papi, Alán, Edu, Camacho (Balucho min.86), Mario, David Lourido, Jhony.

SCD MALPICA: Suso, David (Miguel Avelino min.46), Eme (Casais min.46), Víctor, Iago, Nando (Rancaño min.46), Neucha (Cheo min.46), Dani, Pablo, Andrés, Alfredo.

Árbitro: Goyeneche García. Estivo bastante irregular, alternando decións valentes e correctas con erros bastante evidentes. Acertou ao sinalar dous penaltis a favor do Malpica, pero enganouse cando na primeira metade anulou un gol ao local David Lourido por un fóra de xogo inexistente. Ademais expulsou ao adestrador do Corcubión por protestar na recta final do encontro.

Incidencias: Tarde soleada cunha temperatura agradable. Menos de cen espectadores no Novo Cubaleiro. Non houbo lesións de gravidade.

Goles: 1-0 (min.5): Saque de esquina botado por Alán, o coiro pasa entre Andrés e Eme, rebota no peito de Víctor volvendo a rebotar esta vez na cabeza de David Lourido antes de entrar na portería do Malpica. 1-1 (min.43): Pablo realiza unha xogada individual pola banda esquerda, penetra na área sendo derrubado por Sergio Manín; o propio Pablo anota a pena máxima. 1-2 (min.47): Cheo centra dende a posición de extremo dereito, marcando Alfredo dende o corazón da área. 1-3 (min.88): Falta bastante lonxana que bota o Malpica cara a posición de Cheo no punto de penalti, cando este se dispón a controla é derrubado por Sergio Manín. Pablo transforma o penalti.

Crónica: Viaxaba a SCD Malpica ata Corcubión para enfrontarse a un equipo recén ascendido, despois de de perder a semana anterior no seu estreo na Pedra Queimada ante o Castriz. O adestrador malpicán, Manuel Agilda, acumulaba numerosas baixas, algo que está sendo habitual no comezo ligueiro: Charro, que sigue recuperándo dun esguince de nocello; Daniel Varela, por motivos persoais; Marco; Marcos Amado, sancionado; Charlie, sancionado; e Óscar Moscoso, operado hai uns días do menisco. Durante a primeira metade o Corcubión foi superior a un Malpica que non se meteu no encontro en ningún momento deste período, e a pesar de que o gol local foi unha auténtica "carambola", os malpicáns tiveron sorte de non encaixar máis goles (de feito o colexiado invalidou un a David Lourido conseguido de forma legal). A SCD mostrouse con pouca ambición, deixando facer ao equipo local que sen facer nada espectacular creaba perigo, pasou moitos apuros defensivos e en ataque apenas logrou chegar con claridade á meta defendida por Cristian. As mellores oportunidades foron do Corcubión, pero unhas veces a falta de puntería e outras as intervencións de Suso evitaron que o resultado fose maior. Cando semellaba que se chegaría o descanso co 1-0, un penalti claro cometido sobre Pablo fixo que o empate subise ao marcador.

Mostra da mala actuación do Malpica foi que o adestrador realizou os catro cambios no intermedio. Se na primeira parte o Corcubión foi mellor, no segundo acto os visitantes xogaron con moita máis intensidade, pasando a ter as mellores oportunidades para marcar, pero non estiveron atinados nos metros finais. O Corcubión xa non chegaba con claridade á líña de tres cuartos, e so creaba perigo a balón parado, algo que as reducidas dimensións do Novo Cubaleiro favorece, pero de novo Suso aportou moita seguridade nos balóns colgados. Pola contra, os malpicáns xeraban moitas accións de perigo, tanto en xogadas colectivas como a balón parado, pero non lograron sentenciar ata practicamente o minuto 90. Alfredo estivo especialmente activo nesta parte, pero faltoulle un pouco de fortuna para aumentala súa conta goleadora, sendo as mellores ocasións as seguintes: unha falta dende o borde da área que Cristian desvía nunha gran intervención; unha nova acción de Alfredo que se planta ante Cristian pero tira demasiado cruzado; unha falta botada polo propio Alfredo que sae lambendo o longueiro; un disparo de Dani dende o borde da área que rexeita o pau esquerdo; etc. O Corcubión tivo unha última oportunidade para marcar nos pés de Mario, pero o seu disparo con pouco ángulo foi atallado por Suso.

Foi un encontro onde a SCD Malpica amosou dúas facianas ben distintas, cunha mala primeira parte e unha segunda onde foi superior, pero onde tardou en exceso en sentenciar. Debe o equipo malpicán afrontalos partidos con maior ambición e intensidade, pois está máis que demostrado que cando baixan o "pistón" convertense nun equipo moi vulnerable. O vindeiro domingo a SCD recibe na Pedra Queimada a O Pindo.

AXENDA PARA O FIN DE SEMANA

2011-09-16T14:37:00.002+02:00

Este fin de semana comeza a liga de cadetes, polo que os tres equipos federados da SCD Malpica están xa en plena competición oficial. Os partidos son os seguintes:

- AFECCIONADOS:

Corcubión - SCD Malpica, sábado 17 de setembro ás 17:00 horas, no Novo Cubaleiro (Corcubión).

- XUVENÍS:

SCD Malpica - Corme, sábado 17 de setembro ás 17:00 horas, na Pedra Queimada.

- CADETES:

SCD Malpica - Camariñas, sábado 17 de setembro ás 12:00 horas, na Pedra Queimada.

CLASIFICACIÓN DA 2ª XORNADA DA LIGA DA COSTA

2011-09-13T13:50:00.002+02:00

LOITO

2011-09-12T23:22:00.002+02:00

Acabamos de coñecela triste noticia do falecemento de Claudina Carracedo, nai de Ramón Esmorís, un dos símbolos da SCD Malpica (pasou pola entidade tanto como xogador, sendo o máximo goleador da historia do clube en afeccionados, como de adestrador, do primeiro equipo e das categorías inferiores; actualmente dirixe ao Buño).

Dende a directiva do Malpica e en representación de tódolos socios, queremos darlle a Esmorís e á súa familia todo o noso afecto e o máis sentido pésame.

RESULTADOS DA 2ª XORNADA DA LIGA DA COSTA

2011-09-12T23:19:00.002+02:00

Club do Mar 3 - Corcubión 0

Fisterra 0 - Nantón 1

Camariñas 1 - Buño 2

Sofán 1 - Baio 2

SCD Malpica 1 - Castriz 3

Dumbría "B" 5 - San Lorenzo 3

Zas 1 - Muros 3

Esteirana 2 - Mazaricos 1

Corme - O Pindo (aplazado)

LIGA DA COSTA 2ª XORNADA: SCD MALPICA 1 - CASTRIZ 3

2011-09-12T13:41:00.002+02:00

SCD MALPICA: Suso, David (Casais min.82), Marcos Amado, Víctor, Iago (Marco min.82), Rancaño, Neucha, Cheo (Nando min.65), Pablo, Andrés (Dani min.70), Alfredo.

SD CASTRIZ: Herrera, Prego (Sergio min.85), Álex, Pose (Miguel min.87), Toniño, Alberto, Mauri, Sebas, Iván, Martín (Pablo min.71), Rubén (Jonathan min.90).

Árbitro: Del Río Amor. Moi mal na tarde de onte. Apenas sinalou faltas e deixou sen castigar algunha entrada dura, sobre todo do equipo visitante (de feito, non sacou ningún cartón amarelo en todo o encontro). Concedeu o segundo gol do Castriz a pesar do fóra de xogo de Iván. O local Marcos Amado foi expulsado na recta final do encontro por cartón vermello directo tras protestar.

Incidencias: Partido disputado na Pedra Queimada, nunha tarde con temperatura agradable pero cun vento moderado que tivo influencia no xogo (especialmente na primeira metade). Boa entrada, con 125 espectadores. Non houbo lesionados de gravidade.

Goles: 1-0 (min.59): Gran xogada individual de Pablo que tras desfacerse de varios defensas na parte dereita da área, envía un pase raso cara Alfredo que empurra o balón no segundo pao. 1-1 (min.65): Falta na frontal da área que bota Iván, marcando de tiro raso por fóra da barreira. 1-2 (min.70): Balón en longo cara Iván que arranca en fóra de xogo, plántase ante Suso e marca no man a man. 1-3 (min.77): Grave erro do malpicán Iago que perde o esférico ante Sebas á altura de tres cuartos de campo, éste encara a Suso, tira cruzado, o balón peta no pao e o rexeite cae nos pés de Pablo que anota a pracer.

Crónica: Despois da goleada conseguida na primeira xornada en Natón (1-6), a SCD Malpica disputaba o seu primeiro encontro como local nesta Liga da Costa 2011/2012. O rival era o Castriz, un equipo complicado (foi finalista na pasada Copa da Costa) e que nos últimos anos está logrando resultados positivos en Malpica (suma xa catro tempadas consecutivas sen coñecela derrota). Os locais contaban con numerosas baixas: Óscar Moscoso, mancado de longa duración; Manu Pardo, por cuestións persoais; Dani, por temas laborais; Charlie, sancionado; e Charro, con esguince de nocello. Na primeira metade, o Malpica atopouse con vento en contra, o que dificultaba a tarefa; non obstante, comezaron ben o encontro, tomando a iniciativa e tratando de circulalo balón con esférico. Pero pouco a pouco impúxose o fútbol do Castriz, máis directo, o que beneficiaba aos seus intereses pois contan con xogadores de máis envergadura, poñendo en dificultades os locais que tiveron moitas dificultades para superala presión visitante. A pesar de que era o equipo xalleiro o que tíña unha maior presencia ofensiva, foi o Malpica o que contou coas mellores ocasións de gol, destacando tres claras: un disparo de Andrés dende o borde da área tras un rexeite que se marchou rozando o pao esquerdo; un man a man de Alfredo, pero que dispara demasiado alto; e outro man a man de Pablo que se planta só ante un descolocado Herrera, pero faise un pequeno lio e non logra culminar.

No segundo tempo, os homes adestrados por Manuel Agilda saíron ao terreo de xogo con máis intensidade, e pesar de que o vento xa non soplaba tan forte como nos primeiros 45 minutos, subiron líñas, pasando a desenvolver un fútbol máis combinativo e con máis profundidade. Froito delo foron as dúas ocasións das que dispuxeron antes de adiantarse no marcador: un cabezazo de Neucha tras un saque de esquina executado por Alfredo que sae moi preto do pao dereito; e un disparo do propio Neucha dende o pico esquerdo da área que sae alto. O Malpica logrou o máis complicado, adiantarse no marcador, pero unha serie de erros propios e arbitral, provocaron que o Castriz lle dera a volta ao marcador en apenas dez minutos, cando apenas lograra chegar a área local con perigo. O Malpica tentou empatar, contando Alfredo cunha boa oportunidade mediante un tiro raso que se marchou demasiado cruzado. O terceiro gol visitante preto do minuto 80, froito doutro erro individual, e a posterior expulsión de Marcos Amado, fixeron imposible calquera atisbo de remontada.

Partido un tanto extraño da SCD Malpica, onde tras unha primeira metade bastante discreta (onde a pesar de todo contaron con ocasións claras), logrou na segunda poñerse por diante do marcador, pero un cúmulo de accións desgraciadas provocaron a vitoria do Castriz. Esta derrota debe de servir de estímulo, aprender dos erros cometidos e darse de conta de que a igualdade vai sela nota predominante nesta tempada. O vindeiro partido da SCD será en Corcubión.

PREVIA

2011-09-10T15:16:00.001+02:00

Segunda xornada da Liga da Costa para o Malpica:

- Domingo día 11 de setembro: SCD Malpica - Castriz, ás 17:00 horas na Pedra Queimada.

PRENSA

2011-09-09T14:49:00.001+02:00

O diario Depor Sport publicou o pasado martes unha entrevista co técnico dos modestos da SCD Malpica, Manuel Agilda. Aquí se pode ler.

I TORNEO DE FÚTBOL VETERANOS CONCELLO DE MALPICA

2011-09-06T14:24:00.002+02:00

O pasado fin de semana disputouse no campo de Xaviña (Buño) o I Torneo de Fútbol Veteranos Concello de Malpica onde participaron un total de catro equipos do Concello. O equipo de Malpica quedou na cuarta posición.

- Os resultados foron os seguintes:

Semifinais: Buño 1 - Malpica 0.
Leiloio 1 - Cerqueda 0.

3º/4º posto: Malpica 1 - Cerqueda 2.

Final: Buño 2 - Leiloio.

Tendes a crónica e fotos no blog dos veteranos.

CLASIFICACIÓN DA 1ª XORNADA DA LIGA DA COSTA

2011-09-05T14:12:00.002+02:00

RESULTADOS DA 1ª XORNADA DA LIGA DA COSTA

2011-09-05T14:04:00.002+02:00

O Pindo 0 - Sofán 2

Corcubión 1 - Corme 1

Mazaricos 0 - Fisterra 1

San Lorenzo 0 - Esteirana 3

Muros 1 - Dumbría "B" 2

Buño 1 - Zas 3

Nantón 1 - SCD Malpica 6

Baio 1 - Camariñas 3

Castriz 0 - Club do Mar 4

LIGA DA COSTA 1ª XORNADA: NANTÓN 1 - SCD MALPICA 6

2011-09-05T13:10:00.003+02:00

CD NANTÓN: Martín, Diego (Pedro min.76), Cristian (Iván min.56), Félix, Sito, Carlos Vidal, Fabio, Isidro, Luís, Manolo Cruceiro (Lareu min.67), Martín Suárez (Eloy min.76).

SCD MALPICA: Suso, David, Marcos Amado, Víctor, Iago, Rancaño (Manu Pardo min.66), Neucha (Nando min.58), Cheo (Dani min.62), Pablo, Andrés (Dani Varela min.59), Alfredo.

Incidencias: Partido disputado no campo de Fontiñas, nunha tarde con nubes e claros e cunha temperatura moi agradable. Uns 75 espectadores seguiron o encontro. Non houbo lesionados de gravidade.

Árbitro: Torreiro Ramos. A pesar de que o partido apenas tivo xogadas polémicas, tivo dous graves erros que perxudicaron ao Malpica: no min.16 non indicou unha clara falta de Cristian a Cheo cando este se internaba na área (queda a dúbida de se estaba dentro ou non, pero era cartón vermello por selo último home); e no min.61 non indica fóra de xogo de Luís na acción do gol local. Non houbo expulsados.

Goles: 0-1 (min.1): Cando non pasara nin un minuto de xogo, Rancaño envía un pase en profundidade cara Pablo, Félix cede cara o seu porteiro que despexa pero rebota en Pablo entrando o esférico na portería. 0-2 (min.35): Cheo recibe na posición de extremo dereito, plántase diante de Martín e anota polo primeiro pao. 0-3 (min.45+5): Gran xogada combinativa do Malpica que saca o balón xogado dende atrás, e que culmina cunha internada de Neucha pola banda esquerda, realiza o "pase da morte" cara Pablo que recorta a un rival e bate a Martín dende o borde da área pequena. 0-4 (min.48): Alfredo saca un córner dende a banda dereita que remata Neucha cun gran cabezazo á altura do punto de penalti. 1-4 (min.61): Pase en profundidade cara Luís que anota ante Suso no man a man. 1-5 (min.63): Saque de banda de Marcos Amado cara Alfredo, que controla e tira dende tres cuartos unha espectacular semivolea que se cola pola escadra esquerda. 1-6 (min.75): Pablo envía un pase cruzado dende a banda dereita cara Alfredo que se adianta ao seu par e ao gardameta, anotando a porta baleira.

Crónica: Debutaba a SCD Malpica na Liga da Costa 2011/2012, e facíao visitando ao Nantón, un equipo rescén ascendido pero moi perigoso (hai que recordar que eliminou aos malpicáns nos oitavos de final da pasada Copa da Costa e que gañou a Liga da 3ª Autonómica perdendo tan só un encontro). Para o debut ligueiro, Manuel Agilda contaba con numerosas baixas: Marco, con problemas musculares; Óscar Moscoso, que deberá pasar polo quirófano para operarse do menisco; Miguel Avelino, recuperándose dun esguince de nocello; Charro, cun esguince grave de nocello; e Charlie, sancionado. As cousas comezaron de cara para o Malpica, pois en apenas 48 segundos púxose por diante no marcador, algo que non pasara en ningún dos dous partidos de Copa, onde os malpicáns non lograron marcar nin un gol. O encontro transcorreu como era de esperar, cun Nantón xogando un fútbol directo, mandando balóns en longo (ás veces con pouco sentido), e cun Malpica que saiu coa lección aprendida, pois non deixou sorprenderse e apenas pasou apuros durante os primeiros 45 minutos. Por outra banda, cando lograban a posesión do esférico trataron de aproveitala velocidade dos seus atacantes, ainda que ás veces pecaron de precipitación. Aparte dos goles, os visitantes tiveron unha gran oportunidade nos pés de Neucha que disparou ao longueiro tras un barullo na área. O Nantón só tivo unha oportunidade de gol nesta parte e foi a balón parado tras recoller Luís o seu propio disparo que rexeitara a barreira, pero o potente disparo foi desviado por Suso.

O segundo tempo comezou de maneira similar ao primeiro, co Malpica anotando moi pronto o que sentenciaba o choque. Sen embargo, os locais sairon cun pouco máis de mordente en ataque, e Luís estivo cerca de marcar nun man a man que salvou Suso; pero a partir do quinto gol non volveron a crear perigo. A SCD continuou con transicións rápidas buscando aos seus xogadores ofensivos, creando accións de ataque tanto polas bandas como polo centro, desbordando aos defensas do Nantón que se viron sempre superados no un contra un. O equipo costeiro tivo oportunidades para marcar ainda máis goles, como foron as seguintes: un disparo de Rancaño que foi fóra por pouco; unha xogada individual de Dani pola banda dereita pero o seu centro non atopa rematador; e un disparo de Nando que se marchou alto tras un centro de Dani. Nos derradeiros 15 minutos a contenda decaeu notablemente, cos dous conxuntos agardando a que o colexiado pitase o final.

Bo estreno da SCD Malpica, pois non era nada sinxelo o encontro, mais se temos en conta que o estado do terreo de xogo non era o mellor, pero os malpicáns adaptáronse ben, deixando boas sensacións e cuns atacantes que se amosaron moi inspirados na tarde de onte. Despois desta vitoria, o Malpica colócase como o primeiro líder da Liga. O próximo encontro será na Pedra Queimada ante o Castriz, actual finalista da Copa da Costa.

XUVENÍS: SCD MALPICA 0 - CAMARIÑAS 0

2011-09-04T15:44:00.001+02:00

Os xuvenís da SCD Malpica debutaron onte na Liga da Costa 2011/2012 cun empate sin goles ante o Camariñas. Os rapaces adestrados por Piña tiveron varias oportunidades claras de gol pero non estiveron atinados nos metros finais.

PREVIA

2011-09-03T13:02:00.002+02:00

Comeza a tempada 2011/2012 para o equipo dos modestos da SCD Malpica, que participa na Liga da Costa (este ano denominada 2ª Autonómica Grupo 3). Os xogadores adestrados por Manuel Agilda debutan mañá como visitantes:

- Domingo día 4 de setembro: Nantón - SCD Malpica, ás 18:30 horas en Fontiñas (Nantón).

Moita sorte aos malpicáns na nova tempada!

XUVENÍS: PREVIA

2011-09-02T15:08:00.001+02:00

Os xuvenís da SCD Malpica comezan a tempada 2011/2012:

- Sábado día 4 de setembro, ás 17:00 horas: SCD Malpica - Camariñas, na Pedra Queimada.

Lembramos que a entrada é gratuita.

PRENSA

2011-09-02T15:03:00.001+02:00

O diario Depor Sport publica unha pequena previa da Liga da Costa 2011/2012 que comeza este fin de semana. Aquí se pode ler.

XUVENÍS: RESUMO PRETEMPORADA

2011-09-01T13:50:00.002+02:00

Os xuvenís da SCD Malpica comezan este sábado 3 de setembro a súa andaina na Liga da Costa 2011/2012, polo que é hora de facer un pequeno resumo de cómo lle foron aos homes de Piña nesta pretemporada:

- Sábado 13 de agosto: Atlético Arteixo 1 - SCD Malpica 3. Os goles foron obra de Pereira, Víctor e Miguel Ángel.

- Sábado 20 de agosto: SCD Malpica 7 - Laxe 0. Os goles locais foron anotados por Juni (2), Martín, Almeida, Pepís, Víctor e Camilo.

- Venres 26 de agosto: SCD Malpica 2 - Cabana 2. Os tantos malpicáns foron obra de Adra (de penalti) e Camilo.

Moita sorte aos xuvenís nesta tempada!!

I TORNEO DE FÚTBOL VETERANOS CONCELLO DE MALPICA

2011-08-31T13:38:00.003+02:00

Este fin de semana disputase no campo de Xaviña (Buño) o I Torneo de Veteranos Concello de Malpica, onde participan os seguintes equipos: Malpica, Buño, Cerqueda e Leiloio.

- Os horarios son os seguintes:

Sábado 3 de setembro: Buño - Malpica ás 18:00 horas; e Leiloio - Cerqueda ás 19:30 horas.

Domingo 4 de setembro: 3º e 4º posto ás 10:00 horas; Final ás 11:30 horas.

Ao final da final haberá unha pinchada para tódolos asistentes.

Moita sorte aos veteranos do Malpica!!!

PRETEMPORADA: RESUMO

2011-08-30T14:04:00.003+02:00

Faltan apenas cinco días para que comece a Liga da Costa 2011/2012, polo que é un bo momento para facer un pequeno resumo de cómo se desenvolveu a SCD Malpica nos amigables de pretemporada:

- Domingo 7 de agosto: Trofeo da Olería (partidos de 45 minutos):

SCD Malpica 0 - Cerqueda 1
SCD Malpica 1 - Buño 0 (gol de Neucha de falta directa).

- Xoves 11 de agosto:

SCD Malpica 1 - Cabana 0 (gol de Neucha).

- Domingo 14 de agosto:

Oza dos Rios 0 - SCD Malpica 4 (goles de Neucha e Charro, ámbolos dous anotaron por partida doble).

- Mércores 17 de agosto:

SCD Malpica 0 - Xallas 4

- Fin de semana do 20-21 de agosto: V Memorial Esteban Lareo:

Silva 5 - SCD Malpica 0
Sporting Coruñes 4 - SCD Malpica 3 (os goles malpicáns foron obra de Pablo, Nando e Charro).

- Venres 26 de agosto: I Trofeo "Manolito":

SCD Malpica 1 - Club do Mar 1 (o gol local foi marcado por Rancaño).

PRENSA

2011-08-29T15:08:00.001+02:00

O diario Depor Sport publica unha entrevista con Manuel Agilda, adestrador dos modestos da SCD Malpica. Aquí se pode ler.

I TROFEO "MANOLITO"

2011-08-26T23:42:00.002+02:00

Hoxe disputouse o I Trofeo "Manolito":

- SCD Malpica 1 - Club do Mar 1. Os locais perderon o torneo na tanda de penaltis. O gol malpicán foi obra de Rancaño dende o borde da área. O conxunto adestrado por Manuel Agilda deixou unha boa imaxe e mellores sensacións que en amigables precedentes ante un dos grandes favoritos para gañala Liga da Costa 2011/2012.

XUVENÍS: RESULTADO AMIGABLE

2011-08-26T23:38:00.001+02:00

Os xuvenís disputaron hoxe o seu derradeiro amigable de pretemporada:

- SCD Malpica 2 - Cabana 2. Os goles do equipo adestrado por Piña foron conseguidos por Adra (de penalti) e Camilo.

CADETES

2011-08-26T15:07:00.003+02:00

A SCD Malpica segue buscando xogadores para completalo equipo de cadetes, pois é preciso ter un maior número de xogadores para poder competir con garantías durante toda a tempada.

Poden formar parte do equipo os xogadores que nacesen nos anos 1996 e 1997. Mesmo se admiten xogadores que naceran no ano 1998. Se cumples ese requisito ou coñeces a alguen interesado, non no dubides e únete á SCD Malpica.

Contacto: email: scdmalpica@hotmail.com
teléfono: 680486372

TROFEO "MANOLITO"

2011-08-25T14:52:00.002+02:00

Aproveitando que este fin de semana se celebran as Festas do Mar na vila de Malpica de Bergantiños, a nova directiva da SCD Malpica decidiu crear un novo trofeo: o Trofeo Manuel García Vázquez, "Manolito".

Trátase dun dirixente histórico da SCD Malpica, que, a pesar da súa idade, traballa incansablemente para o clube costeiro en diversos aspectos, independentemente de quen esté na directiva. Con este trofeo pretendemos realizar un pequeno homenaxe a Manolito e que siga ligado á SCD durante moitos anos máis.

Ademais, o encontro servirá para presentar o equipo de modestos do Malpica ante a aficción local, pois será o derradeiro amigable antes de comezala Liga da Costa o vindeiro fin de semana.

- I Trofeo "Manolito", venres día 25 de agosto: SCD Malpica - Club do Mar, ás 21:00 horas na Pedra Queimada.

XUVENÍS: PARTIDO AMIGABLE

2011-08-25T14:39:00.002+02:00

Os xuvenís da SCD Malpica disputan mañá o seu derradeiro encontro de pretemporada, pois o vindeiro sábado 3 de setembro comezan a liga ante o Camariñas:

- Venres día 26 de agosto: SCD Malpica - Cabana, ás 18:30 horas na Pedra Queimada.

XUVENÍS: RESULTADO AMIGABLE

2011-08-22T00:16:00.003+02:00

Os xuvenís da SCD Malpica seguen preparando a tempada 2011/2012, disputando este sábado un novo amigable ante o Laxe:

- SCD Malpica 7 - Laxe 0. Os goles foron logrados por Juni (2), Martín, Almeida, Pepís, Víctor e Camilo.

V MEMORIAL ESTEBAN LAREO

2011-08-22T00:08:00.002+02:00

A SCD Malpica rematou no cuarto lugar no trofeo Memorial Esteban Lareo que se disputou este fin de semana na Coruña organizado polo Club Silva.

Nas semifinais, o equipo malpicán caeu por 5-0 ante o Silva, e o San Tirso venceu por 3-0 ao Sporting Coruñés.

Na xornada de hoxe, o Malpica perdeu por 4-3 ante o Sporting Coruñés. Os goles da SCD foron obra de Pablo, Nando e Charro. Na final, o Silva venceu ao San Tirso na tanda de penaltis despois de empatar a un gol no tempo reglamentario.

IV FESTA GALEGA ´11

2011-08-18T23:04:00.004+02:00

Xa está aqui a Festa Galega. Como xa adiantou o estupendo Blog dos Veteranos este Sabado disfrutaremos de Grandes Concertos e de unha sardiñada. Ademais, asi que os concertos finalicen UN CONOCIDO DJ DA BISBARRA fará que a festa continue para seguir disfrutando da noite. Esperamos a vosa asistencia na que seguro será unha das grandes festas da vila.

RESULTADO AMIGABLE

2011-08-18T11:51:00.002+02:00

Onte tivo lugar na Pedra Queimada un novo encontro amigable dos modestos da SCD Malpica:

- SCD Malpica 0 - Xallas 4.

A pesar da contundente derrota, o equipo malpicán desenvolveu un bo partido e plantoulle cara ao equipo de Santa Comba (que este ano milita en Preferente), e mesmo contou con varias oportunidades para marcar algún gol.

FIN DE SEMANA NO V MEMORIAL ESTEBAN LAREO

2011-08-17T18:00:00.003+02:00

O Silva SD confirmou a invitación da SCD Malpica e adxuntounos tamen o cartel do torneo cos horarios dos encontros.

BLOGS DA SCD MALPICA

2011-08-17T17:30:00.003+02:00

XUVENÍS CADETES VETERANOS

PARTIDO AMIGABLE

2011-08-16T14:02:00.002+02:00

Cando hai unhas semanas anunciamos o calendario da pretemporada do equipo sénior da SCD Malpica, incluíamos un encontro contra o Xallas (conxunto de Preferente) pero sen confirmala data nin a hora. Hoxe xa podemos confirmalo:

- Mércores, día 17 de agosto, ás 21:00 horas: SCD Malpica - Xallas, na Pedra Queimada.

EQUIPACIÓNS PARA A TEMPADA 2011/2012

2011-08-16T13:44:00.005+02:00

Aquí tendes as camisetas da primeira equipación que lucirán os diversos equipos da SCD Malpica na tempada 2011/2012:

Equipo de cadetes:

Equipo de xuvenís:

Equipo dos modestos:

PRENSA

2011-08-16T12:13:00.004+02:00

O diario Deporsport fixose eco da gran acollida que tivo a "Copa do Mundo" na nosa vila.
Podes velo AQUI.

RESULTADO AMIGABLE

2011-08-15T12:26:00.003+02:00

Os modestos da SCD Malpica disputaron onte domingo o seu quinto encontro amigable do verán:

- Oza dos Rios 0 - SCD Malpica 4. Os goles foron anotados por Neucha e Charro, ámbolos dous marcaron por partida doble.

XUVENÍS: RESULTADO AMIGABLE

2011-08-15T12:20:00.002+02:00

Os xuvenís xogaron o seu primeiro partido de pretemporada:

- Atlético Arteixo 1 - SCD Malpica 3. Os goles foron obra de Pereira, Víctor e Miguel Ángel.

PARTIDO AMIGABLE

2011-08-13T13:35:00.002+02:00

O equipo sénior da SCD Malpica xoga mañan un novo encontro amigable:

- Domingo día 14 de agosto: Oza dos Ríos - SCD Malpica, ás 19:30 horas.

RESULTADO AMIGABLE

2011-08-13T13:29:00.002+02:00

O pasado xoves a SCD Malpica xogou un novo encontro amigable de pretemporada:

- SCD Malpica 1 - Cabana 0. O gol malpicán foi obra de Neucha tras un disparo dende o borde da área que contou coa colaboración do gardameta visitante.

GRAN ÉXITO NA VISITA DA COPA DO MUNDO

2011-08-12T14:08:00.008+02:00

Onte visitou Malpica a Copa do Mundo conquistada por España no Mundial de Fútbol disputado en Sudáfrica no verán pasado. A exposición da Copa foi un éxito rotundo, pois dende as 11 da mañá (mesmo antes desa hora xa había xente esperando para fotografiarse con ela) ata pasadas as 21 horas pasaron centos de persoas pola praza Anselmo Villar Amigo (segundo fontes do Concello pasaron sobre 2.000), tanto xente natural da vila malpicán, como turistas e xente de outras vilas próximas.

Dende a directiva da SCD Malpica queremos agradecela labor desenvolvida pola Protección Civil e pola Policía Local (que durante todo o día estiveron pendientes de tódolos detalles); darlle as gracias a Luis Porto, a tódalas persoas que colaboraron con nós neste evento e tamén ao Concello de Malpica de Bergantiños pola súa colaboración na organización. Tamén queremos deixar claro que as decisións sobre a ubicación da Copa do Mundo e o horario de exposición ao público foron tomadas pola directiva da SCD Malpica, sen que a Corporación Local tivese nada que ver nese sentido.

A continuación deixo algunha imaxe que ilustra o acontecido onte, onde se comproba que xente de tódolas idades disfrutaron deste acontecemento:

XUVENÍS: PARTIDO AMIGABLE

2011-08-12T14:00:00.002+02:00

O equipo de xuvenís da SCD Malpica, adestrado por Piña, disputa o seu primeiro encontro de pretemporada para afrontalo curso futbolístico 2011/2012:

- Sábado día 13 de agosto, ás 17:30 horas: Atlético Arteixo - SCD Malpica, no Ponte dos Brozos (Arteixo).

PARTIDO AMIGABLE

2011-08-10T14:08:00.001+02:00

A SCD Malpica disputa mañá xoves 11 de agosto un novo amigable de pretemporada:

- Xoves 11 de agosto, SCD Malpica - Cabana, na Pedra Queimada, ás 21:00 horas.

PRENSA

2011-08-10T14:03:00.001+02:00

Na pasada edición do domingo 7 de agosto, o diario Depor Sport analiza a situación económica dos clubes da Costa, inclusive da SCD Malpica. Aquí se pode ler.

PRENSA

2011-08-09T13:53:00.001+02:00

O portal www.piratasdemuxia.es publica diversas novas relacionadas coa SCD Malpica, entre elas a visita da Copa do Mundo a vila costeira este xoves 11 de agosto. Aquí se pode visitar.