lunes, 28 de febrero de 2011

RESULTADOS DA 25ª XORNADA DA LIGA DA COSTA

Baio 1 - Club do Mar 2

Carnota 1 - Muros 2

Esteirana 4 - Porteño 1

Fisterra 3 - O Pindo 2

Camariñas 2 - Corme 1

Malpica 2 - Buño 0

Castriz 0 - Sofán 1

Ponteceso 5 - Dumbría "B" 1

San Lorenzo 2 - Vimianzo 1

LIGA DA COSTA 25ª XORNADA: MALPICA 2 - BUÑO 0

SCD MALPICA: Suso, Charlie (Víctor min.49), Marcos Amado, Iago (Ismael min.65), Marco, Eloy, Neucha, Cheo (Casais min.58), David Blanco, Andrés, Nando (Gonzalo min. 83).

SD BUÑO: Brais, Óscar, Ángel, Pancho (Fran Martuxa min.60), Lolo, Jorge, Emilio, Juan (Víctor Pardiñas min.72), Berti (Rubén min.68), Víctor Vilar, Dourado (Fernando min.83).

Árbitro: Juan Manuel Prieto Rojo. Na primeira metade sinalou dous penaltis, un a prol de cada equipo, por sendas mans do malpicán Marco e do visitante Víctor Vilar. Se ben a segunda non deixa lugar a dúbidas, a primeira si ofrece máis controversia, pois hai ausencia total de voluntariedade, ainda que si é certo que o esférico rebota na man do defensa local. Na segunda metade non tivo grandes complicacións, pero quizáis se excedeu no número de tarxetas que mostrou.

Incidencias: Boa entrada na Pedra Queimada, cuns 200 espectadores. Tarde soleada e cunha temperatura agradable. O xogador do Malpica Charlie tivo que ser sustituído ao pouco de comezala segunda metade por molestias no sóleo da perna esquerda. Non houbo expulsados. Destacalo debut no bando local do mediocentro Nando.

Goleadores: 1-0 min.10: Saque de falta a prol do Malpica no lateral esquerdo da área do Buño, Neucha centra moi forte e cerrado para que Cheo marque co muslo da perna esquerda dentro da área pequena libre de marca. 2-0 min.32: Saque de esquina botado por Nando, a defensa do Buño rexeita en primeira instancia, pero Eloy recolle o rexeite e dispara dende o borde da área impactando o balón nas mans demasiado abertas de Víctor Vilar, dando lugar a unha pena máxima que anota Neucha de forte disparo.

Crónica: Chegaba o segundo derbi da tempada para a SCD Malpica, que recibía a un Buño que atrevesaba un bo estado de forma (levaba 6 xornadas sen coñecela derrota) e co que estaba igualado a puntos na clasificación. Manuel Agilda, adestrador local, tiña a súa disposición á práctica totalidade do plantel, a excepción do lesionado de longa duración Viña. O Malpica saiu moi concentrado ao terreo de xogo, ben plantado no campo e tentando de sair co balón controlado dende atrás, dominando a posesión do esférico. Froito disto foi que pronto se adiantaron no marcador, pero a partir dese momento o fútbol directo foi gañando protagonismo e apenas se viron xogadas combinativas. A clave do encontro estivo nos primeiros 30 minutos, pois co 1-0 o Buño tivo dúas inmellorables ocasións de gol para empatar: unha xogada pola banda esquerda de Juan que centra para que Víctor Vilar remate a bocaxarro no borde da área pequena que despexa Suso cos pés nunha fenomenal parada (min.16); no min.23 Suso volve a ser protagonista ao deter un penalti executado por Berti. En cambio, os locais si anotaron a pena máxima da que dispuxeron poucos minutos despois, deixando o encontro practicamente sentenciado. Quitando as xogadas mencionadas, apenas houbo accións de perigo, salvo algunha xogada individual dos atacantes malpicáns que encontraban grandes espacios cando superaban a líña do mediocampo do Buño, pois deixaban moitos metros entre a defensa e os mediocentros, pero que non se traduciron en oportunidades manifestas.

O segundo tempo comezou como rematou a primeira parte, con escaso fútbol de toque e con moitas interrupcións no xogo debido á intensidade coa que se empregaban ámbolos dous conxuntos (é de recalcar que sempre dentro da deportividade), e onde as defensas lle gañaron a partida aos ataques. O Malpica limitouse a defender con orde, xuntando líñas e tratando de lograr algún gol máis a través de contragolpes, conscientes da vantaxe da que dispoñían. A pesar de que as oportunidades de gol brillaron pola súa ausencia nestes segundos 45 minutos, os locais tiveron unha ocasión clarísima por medio de Neucha que disparou alto dentro da área pequena tras un gran centro de Nando dende a banda esquerda. Pola contra, o Buño puxo gañas e corazón para tentar logralo empate, pero faltoulle fútbol e profundidade para facelo, e non tiveron ningunha acción clara para marcar, salvo nalgún balón parado pero que non creou excesivas dificultades sobre a meta de Suso.

En resumo, partido moi disputado, con intensidade pero con pouco fútbol. O Malpica volve a impoñerse no derbi do concellor ao Buño (na primeira volta o resultado foi de 1-2), sumando a súa segunda vitoria consecutiva que lle da moita tranquilidade de cara o futuro. Parece que o conxunto costeiro está atopando nas últimas xornadas unha maior facilidade de cara a gol, algo que se resisteu en boa parte da tempada, pois nos últimos 5 encontros sumou 13 goles a favor. A vindeira semana a SCD desprázase ata Camariñas para xogar contra o Porteño (conxunto que esta tempada está a xogalos partidos de local no Hermanas Patiño).

sábado, 26 de febrero de 2011

FICHAXE

A SCD Malpica acaba de incorporar a un novo xogador: trátase de Nando, un polivalente mediocentro de 27 anos que xogou nas últimas tempadas no San Tirso (conxunto da Primeira Rexional). Nando probablemente debute mañá mesmo no derbi ante o Buño, pois forma parte dos 16 convocados por Manuel Agilda.

lunes, 21 de febrero de 2011

RESULTADOS DA 24ª XORNADA DA LIGA DA COSTA

Buño 1 - Esteirana 0

Club do Mar 1 - Carnota 2

Muros 1 - Camariñas 1

Corme 2 - Castriz 2

Dumbría "B" 2 - San Lorenzo 1

Vimianzo 0 - Malpica 3

Porteño 2 - Fisterra 4

Sofán 3 - Ponteceso 1

O Pindo 2 - Baio 2

LIGA DA COSTA 24ª XORNADA: VIMIANZO 0 - MALPICA 3

SDU VIMIANZO: Sergio, Susiño, Amarelle, Maikol, Iván de Treos, Martín (Maracas min.71), Dieguito (Vilaseco min.46), Pablo Pereira, Arán, Lagoa, Pose (Iván de Baiñas min. 46).

SCD MALPICA: Suso, Charlie, Marcos Amado, Víctor, Marco, Eloy (Gonzalo min.62), Neucha, Casais (Diego min.72), David Blanco, Ismael, Miguel Dourado (Miguel min.71).

Árbitro: Álvarez Vega. Boa labor a que desenvolveu na tarde de onte, nun partido onde sempre reinou a deportividade entre ámbolos dous conxuntos e onde non houbo xogadas polémicas.

Ambiente e Incidencias: Pouco público no Municipal de Vimianzo (menos de 50 espectadores, e case todos de Malpica), nunha tarde nubrada e fría. Non houbo xogadores expulsados nin lesionados de gravidade.

Goleadores: 0-1 min.20: Bo centro de Charlie dende a banda dereita para que anote David Blanco dende o borde da área pequena de tiro raso tras gañarlle a partida á defensa local. 0-2 min.26: Neucha recibe un pase entrelíñas de Casais, acomoda o balón e marca dende fóra da área de forte disparo coa perna esquerda. 0-3 m.53: Miguel Dourado recibe un balón en longo na posición de extremo dereito, entra na área e asiste para que David Blanco só teña que empurralo balón dende o punto de penalti.

Comentario: Viaxaba a SCD Malpica ata Vimianzo para enfrontarse ao colista da liga, pero con algunha incertidume pois o equipo costeiro estábase a mostrar coma un rival moi feble cando actúa como visitante (dende o 21 de novembro do ano pasado non gañaban a domicilio). Para esta xornada eran baixas Viña, Martín, Cheo (con molestias musculares), Andrés e Iago (estes dous por sanción). O encontro comezou igualado, con chegadas a ámbalas dúas áreas, e mesmo os locais dispuxeron dunha ocasión para marcar por medio de Arán que disparou rozando o longueiro. Sen embargo, a partir do minuto 10 o Malpica comezou a levalo peso do partido, impoñendose no mediocampo, controlando a posesión do esférico e dando sensación de perigo tanto polas bandas como cando mandaban balóns en profundidade cara os dous dianteiros. Froito disto, aos 25 minutos xa gañaban por 0-2 e mesmo contaron con oportunidades para anotar máis goles, destacando, sobre todo, un man a man de David Blanco que rexeitou o gardameta Sergio cos pés. Polo que atinxe ao Vimianzo, é de eloxiar a súa actitude totalmente deportiva e a súa intención de xogar un fútbol combinativo, pero as imprecisións e os erros foron constantes, véndose superados polos visitantes.

No segundo tempo, os homes adestrados por Manuel Agilda saíron algo relaxados, conscientes da vantaxe no marcador, feito que aproveitaron os locais para levar perigo, pois apiques estiveron de marcar mediante un tiro dende o pico esquerdo da área que saiu excesivamente cruzado e por medio dun disparo de Iván de Treos dende o borde da área que saiu alto. Pero o segundo tanto de David Blanco no min.53 sentenciu definitivamente a contenda, volvendo o Malpica a dominar sen pasar máis apuros defensivos. A medida que pasaban os minutos, o Vimianzo concedía máis falicidades defensivas, aproveitando os centrocampistas malpicáns para surtir de balóns aos atacantes, pero faltou puntería para marcar máis goles, pois houbo numerosas ocasións claras para facelo: un disparo de David Blanco coa zurda dende o punto de penalti que atallou Sergio; outro disparo de David dende dentro da área que volve a rexeitar Sergio; un man a man de Miguel que se entretén demasiado e perde o balón; un novo man a man de David Blanco que tira fóra despois de regatear ao gardameta; etc. Destacar que neste segundo acto debutou Miguel co Malpica, xogador ainda en idade xuvenil.

Por fin gañou o Malpica lonxe da Pedra Queimada, o que supón tres puntos importantes para evitar apuros de aquí a final de tempada, pois agora están a 10 puntos dos postos de descenso cando quedan 10 partidos por xogarse. Tamén hai que decir que o Vimianzo non deu boas sensacións, ofreceu moitas facilidades defensivas e apenas inquedaron en ataque, quedando a 15 puntos da salvación despois desta xornada. Esperemos que esta vitoria supoña o inicio dunha xeira de bos resultados para a SCD, que recibe a vindeira semana ao outro equipo do concello: o Buño.

martes, 15 de febrero de 2011

lunes, 14 de febrero de 2011

RESULTADOS DA 23ª XORNADA DA LIGA DA COSTA:

Castriz 2 - Muros 1

Baio 3 - Carnota 3

San Lorenzo 0 - Sofán 0

Esteirana 2 - Vimianzo 0

Fisterra 0 - Buño 1

Camariñas 3 - Club do Mar 0

Malpica 2 - Dumbría "B" 3

O Pindo 2 - Porteño 1

Ponteceso 2 - Corme 1

LIGA DA COSTA 23ª XORNADA: MALPICA 2 - DUMBRÍA "B" 3

SCD MALPICA: Suso, Charlie, Casais, Víctor, Iago, Andrés, Neucha, Cheo (Ismael min.7), David Blanco, Manu Pardo (Miguel Dourado min.46), Eloy.

CF DUMBRÍA "B": Anxo, Tantán, José Manuel, David Carreira, Pablo Lestón (Carlos min.92), Jesús (José Carreira min.37), Ramiro (Pablo Casais min.63), Fernando, Poyo, Sergio Cives, Pablo Muíño.

Árbitro: Bruno Méndez. Estivo moi ben na tarde de onte, seguindo o xogo sempre de cerca, sen cometer grandes erros e non abusou dos cartóns amarelos.

Ambiente e Incidencias: Tarde fría na Pedra Queimada con pouco público (uns 75 espectadores). O xogador malpicán Cheo retirouse lesionado ao comezo do encontro con problemas musculares. Tamén o visitante Jesús foi sustiuído na primeira metade por lesión. O gardameta do Dumbría "B" Anxo foi expulsado no minuto 15 da segunda parte por cartón vermello directo tras encararse co colexiado por indicarlle perda de tempo por segunda vez case de maneira consecutiva, o que derivou nunha trifulca entre os xogadores do Dumbría e o colexiado, especialmente protagonizada polo propio Anxo (que perdeu totalmente os papeis) que se resistía a abandonalo terreo de xogo e amenazando constantemente ao colexiado. Tamén foi expulsado o adestrador do Dumbría "B". O encontro suspendeuse durante uns 20 minutos, pois o árbitro reclamou a presencia da Policía Local. Se xa foi lamentable a actuación de Anxo neses intres, peor foi a súa conducta ao final do encontro insultado e realizando xestos despectivos á afección local.

Goleadores: 1-0 min. 30: Falta cometida sobre Neucha na media lúa que bota maxistralmente o propio Neucha, colándose o esférico como un obús pola escadra dereita. 1-1 min. 45+1: Trallazo de Poyo dende fóra da área que entra pola escadra dereita tras pegar na cruceta. 1-2 min. 55: Pablo Muíño recibe o balón á altura de tres cuartos, realiza unha parede con Pablo Lestón e penetra na área batendo a Suso de tiro cruzado. 1-3 min. 64: O malpicán Casais intenta intenta tocar para Víctor pero o seu pase é interceptado por Pablo Muíño que entra na área, anotando a pracer tras regatear a Iago e a Suso. 2-3 min. 94: Balón colgado sobre a área do equipo visitante, Ismael peina, quedándolle o esférico a Neucha que marca coa dereita dende o punto de penalti.

Crónica: Tra-la mala imaxe mostrada a semana pasada en Sofán, a SCD Malpica regresaba á Pedra Queimada, onde ultimamente viña conseguindo resultados positivos, coa intención de logralos tres puntos e de melloralo xogo das últimas xornadas. O rival era o Dumbría "B", un recén ascendido pero que se confirma como a revelación da liga. No Malpica eran baixas os habituais Viña e Martín, aos que había que engadir as de Marco e Marcos Amado (ámbolos dous por motivos persoais). O partido comezou con alternativas e ocasións para os dous conxuntos: para o Malpica dúas internadas de David Blanco que penetra na área tras sendos envíos de Manu Pardo pero na primeira delas o seu tiro sae desviado por pouco e na segunda saélle frouxo e párao Anxo sen problemas. Polos visitantes, destacaron un tiro escorado de Pablo Muíño que tras regatear a Suso tira desviado e un remate do mesmo protagonista que despexa Suso. Sen embargo, tras estes 15-20 primeiros minutos iniciais de "toma e daca", o Malpica fíxose co control do xogo, tentando sair co balón dende atrás e combinando ben en tódalas parcelas do campo. Na parte defensiva, estiveron máis atentos aos balóns en longo e non pasaron máis dificultades. Os malpicáns tiveron varias ocasións para marcar, sobretodo por medio dun disparo lonxano de Manu Pardo que sacou Anxo con moitas dificultades e nun centro de Neucha dende a esquerda ao que David Blanco non chega pero que estivo a punto de introducir na súa portería un defensa visitante. Pero cando parecía que se ía chegar co 1-0 ao descanso, na prolongación chegou o empate, feito que quizáis marcou o partido.

No segundo tempo, o equipo adestrado por Manuel Agilda continuou coa mesma líña mostrada nos primeiros 45 minutos, con moita posesión de balón e tocando ben a altura de tres cuartos. Así, pronto chegaron as oportunidades nun centro de Miguel Dourado dende a banda dereita que remata Neucha libre de marca pero moi forzado no segundo pao e que saiu fóra; e un forte disparo de Eloy dende o pico dereito da área que sae rozando o primeiro pao. Sen embargo, na primeira aproximación do Dumbría logran poñerse por diante no marcador. A pesar de que a remontada semellaba máis sinxela coa expulsión de Anxo (que obligaba ao equipo visitante a ter que poñer de porteiro a un xogador de campo con 30 minutos por xogar), un erro na circulación de balón propiciou o 1-3 ao pouco de reanudarse o encontro tra-la trifulca anteriormente comentada. A partir de aquí, os últimos 25 minutos de encontro foron un "querer e non poder" por parte do Malpica, que monopolizou a posesión e encerrou ao Dumbría no seu campo, pero non tiveron a claridade para encontrar ocos na poblada defensa, e non contaron con grandes ocasións a pesar da súa superioridade numérica, salvo unha falta botada por Neucha que saiu alta e nun cabezazo con pouca potencia de Charlie que remata sen oposición un saque de esquina. O Dumbría "B" encerrouse atrás, creando perigo en contragolpes por medio dos seus rápidos atacantes, pero que sen lograr culminar.

Nova derrota da SCD Malpica, que está inmersa nunha mala xeira de resultados dende finais do ano pasado: acumula 7 derrotas nos derradeiros 9 encontros. Ademais, encaixaron por primeira vez tres goles nun mesmo encontro en todo o que vai de tempada. O aspecto positivo foi a mellora no xogo, especialmente na primeira metade, pero que non serviu para gañar. Agora mesmo, o descenso está a 7 puntos, pero convén ir gañando partidos para evitar posibles apuros a final de tempada, tendo a mellor ocasión o vindeiro fin de semana, pois visitan ao Vimianzo, colista e con só 2 vitorias en 23 encontros.

lunes, 7 de febrero de 2011

RESULTADOS DA 22ª XORNADA DA LIGA DA COSTA

Carnota 0 - Camariñas 2

Club do Mar 1 - Castriz 2

Muros 0 - Ponteceso 3

Corme 3 - San Lorenzo 1

Dumbría "B" 2 - Esteirana 0

Vimianzo 2 - Fisterra 3

Buño 1 - O Pindo 1

Porteño 1 - Baio 1

Sofán 2 - Malpica 0

LIGA DA COSTA 22ª XORNADA: SOFÁN 2 - MALPICA 0

SOFÁN SD: Álex, Roberto Souto, Juan Rabuñal, Juanjo, Alberto Pensado, Alemán, Adrián (Miniño min.79), Pizo, Jacobo (Luisito min.61), Mario Casal, Bertín (David Pensado min.72).

SCD MALPICA: Suso, Charlie, Marcos Amado, Marco, Víctor, Andrés, Neucha, Cheo (Eloy min.13), David Blanco, Manu Pardo (Miguel Dourado min.65), Ismael, (Casais min.56).

Árbitro: Grañas Martínez. A pesar de traer malos recordos para o Malpica, na tarde de onte estivo correcto en líñas xerais, nun encontro no que non houbo dureza nin grandes xogadas polémicas. Sen embargo, os malpicáns reclamaron penalti por unhas mans de Juanjo tras un centro de David Blanco preto do descanso.

Incidencias: Boa entrada no Carral, cunhas 150 persoas no campo nunha tarde soleada e cunha temperatura moi agradable. O extremo malpicán Cheo tivo que ser sustuído ao pouco de comezalo encontro por un pinchazo nos isquiotibiais da perna esquerda. Non houbo expulsados.

Goleadores: 1-0 min.9: Tras unha serie de rexeites na banda esquerda do ataque sofanista, Adrián asiste a Bertín para que o dianteiro controle no pico da área, drible a un defensa visitante e anote de tiro raso cruzado axustado ao pao dereito da portería defendida por Suso. 2-0 min.93: Balón en longo cara David Pensado que controla en posición de extremo dereito, entra na área e centra para Luisito que se atopaba na frontal da área pequena, este deixa pasalo balón enganando a Suso e o balón cólase na portería a pesar de que Charlie intenta despexalo.

Crónica: A pesar de que o Sofán ten un dos mellores equipos da categoría durante as últimas tempadas, para os malpicáns son un dos rivais contra os que acostuman sacar bos resultados, e con esa intención viaxaban, conscientes de que unha vitoria acercábaos á parte alta da clasificación. Manuel Agilda podía contar con case toda a plantilla, a excepción de Carlitos e dos habituais Viña e Martín (lesionados para toda a tempada). O partido non podía comezar peor para a SCD Malpica, pois ós poucos minutos lesionábase Cheo e tamén encaixaban o primeiro gol. Ademais, os malpicáns non deixaron boas sensacións neste primeiro acto, pois apenas lograban dar dous ou tres pases seguidos con criterio, non conseguiron gañalos numerosos balóns disputados (as dimensións do terreo de xogo provoca moito fútbol directo e balóns divididos) e non foron quen de disparar entre os tres paos máis que a balón parado. Por se fose pouco, eran constantes os resbalóns, pois todos xogaron con tacos de goma cando as condicións do terreo de xogo non eran moi propicias para elo. Polo que atinxe ó Sofán, coa tranquilidade que otorga ir por diante no marcador, mostrouse coma un conxunto moi ordeado e sólido no xogo aéreo, e apenas pasou dificultades defensivas mentres que en ataque buscaba facer perigo buscando, sobretodo, a Bertín (o seu máximo goleador). As ocasións foron poucas para o Malpica, destacando unha falta lateral botada por Neucha que despexou Álex e unha volea de David Blanco dende a frontal da área que saiu moi alta (ámbalas dúas accións tiveron lugar a poucos minutos do descanso). O Sofán, a pesar de levalo peso do encontro, tampouco tivo moitas oportunidades de gol, destacando dúas claras: unha xogada de Bertín pola dereita tras un saque en longo de Álex pero o seu centro paséase pola área visitante sen atopar rematador, e un cabezazo de Jacobo que saiu preto da portería malpicán.

No segundo período a tónica foi semellante á da primeira parte, co fútbol directo como protagonista. A pesar de ir por detrás no marcador, a SCD Malpica non dou a sensación de poder logralo empate, pois seguían as imprecisións e en ataque non lograron desbordar. O Sofán continuou moi serio, sen grandes "florituras", pero buscando crear perigo mediante contragolpes. Non obstante, a entrada de Luisito deulles un plus de calidade e de tranquilidade cando o balón pasaba polos seus pés, asociándose moi ben cos seus compañeiros de ataque. Co paso dos minutos, os malpicáns estiráronse un pouco, agora con dous dianteiros, pero non tiveron profundidade nin conseguiron poñer en dificultades á defensa local. A mellor ocasión para o conxunto costeiro foi unha falta botada por Neucha, que rexeita Álex con dificultades quedando o esférico morto no punto de penalti, pero ningún xogador malpicán atinou a tirar. Non obstante, a oportunidade máis clara nestes segundos 45 minutos estivo nun cabezazo de Mario que rexeitou ó longueiro tras un centro dende a banda dereita.

En resumo, mal encontro da SCD Malpica en case tódolos aspectos, mostrando unha alarmante falta de profundidade (non tiraron entre os tres paos con perigo, salvo a balón parado) e con moitas imprecisións en tódalas parcelas do campo, ante un Sofán que tampouco demostrou nada espectacular. Preocupante xeira de resultados para o conxunto de Manuel Agilda como visitante: dos últimos 6 partidos xogados a domicilio, só suman un empate, con 5 derrotas consecutivas e con só 2 goles a favor. A vinderia semana, a SCD recibe ó Dumbría "B", un equipo recén ascendido pero que se está a confirmar como unhas das revelacións da tempada (marchan na 7ª plaza a só tres puntos do terceiro clasificado).

viernes, 4 de febrero de 2011

PRENSA

O diario Depor Sport entrevista a Neucha, xogador da SCD Malpica, gran protagonista da pasada xornada da Liga da Costa ó anotar 5 goles ante o Corme. Aquí se pode ler.