lunes, 29 de marzo de 2010

domingo, 28 de marzo de 2010

MALPICA 2 - BAIO 0

SCD MALPICA: Abraham, Víctor, Marcos Amado, Iago, Marco, Eloy, Neucha (Casais 61’), Cheo (Ismael 77’), David Blanco, Andrés, Charlie (Manu Pardo 65’).

CD BAIO: Martín, Andrés, Ramón (Canay 67’), Mario, José Antonio, Borja (Felipe 46’), Fermín, Martín Pérez, Jorge, Guillermo, Alberto.

Árbitro: Ferreño Presedo. Tivo unha actuación con dúas fases claramente diferenciables: durante a primeira metade non aplicou o mesmo raseiro ós dous equipos, castigando determinadas faltas con cartóns e outras similares deixándoas sen tarxeta; na segunda parte fíxose co control do encontro e estivo bastante ben nun partido onde tampouco houbo excesivas complicacións.

Goleadores: 1-0 (4’): Pase de Charlie a Eloy, éste entra na área rival sen oposición e bate de tiro cruzado ó gardameta Martín, anotando un bonito gol. 2-0 (57’): O dianteiro local David Blanco gáñalle a partida á despistada defensa visitante e consegue anotar cun disparo frouxo pero axustado ao pao esquerda da portería de Martín.

Ambiente e Incidencias: Partido que se disputou o sábado ás 17:00 horas. Boa entrada na Pedra Queimada, cunhas 150 persoas no campo. Non houbo expulsados nin lesionados de gravidade.

Comentario: A SCD Malpica recibía na Pedra Queimada ao perigoso Baio coa intención de distanciarse dun dos rivais que ten por detrás na clasificación (antes do encontro estaban separados por sete puntos) e seguir aspirando á terceira posición. Os locais contaban coa única baixa de Rancaño por motivos laborais. Non puido comezar mellor o partido para o Malpica, pois ós cinco minutos xa mandaba no marcador gracias ó gol de Eloy, feito que condicionou o posterior desenvolvemento dos acontecementos, xa que a partir de ahí os xogadores de Manuel Agilda puideron defender xuntos e buscala portería rival en perigosos contragolpes. Un Malpica que neste primeiro acto mantivo a contenda baixo control en todo momento, sen pasar apuros atrás e creando numerosas ocasións, aínda que non logrou facerse coa posesión do esférico. Destacan as oportunidades de Charlie cun disparo que se estrelou no longueiro e unha falta de Neucha que se marchou fóra por moi pouco. O Baio, pola súa parte, só creou perigo por medio de Borja (min. 38).

No segundo acto, os visitantes fixéronse co control do partido, pois acumulaban moita xente no mediocampo e a entrada de Felipe dóulle máis profundidade ó seu ataque. Non obstante, aínda que a posesión foi claramente do Baio, as mellores ocasións de gol estiveron nas botas dos xogadores malpicáns, que defenderon con moito orde e contragolpeaban con moitísimo perigo. As mellores oportunidades foron as seguintes: centro de Cheo dende a dereita que non atina a materializar Neucha no segundo pao (min. 53); disparo de Charlie dende dentro da área que sae desviado (min. 55); tiro cruzado de Eloy que sae fóra (min. 85); cabezazo de David Blanco a centro de Víctor que marcha alto (min. 90); e dous disparos de Manuel Pardo dende uns 45 metros que apiques estiveron de sorprender ao gardamenta visitante. O Baio, a pesar de subir líñas, non foi quen se marcar nin de crear moito perigo, aínda que si dispuxo de máis pegada que durante o primeiro período. Así, destacan dous tiros de Guillermo que detivo ben o porteiro local Abraham.

Confírmase a melloría da SCD Malpica despois do "batacazo" de Camariñas, pois nas últimas tres xornadas suma sete puntos e sen recibir ningún gol. Ademais, volveron a gañar na Pedra Queimada, feito que non se producía dende o 17 de xaneiro cando derrotaran ó San Lorenzo por 3-0. Quizáis o "punto flaco" nas últimas xornadas sexa a falta de puntería de cara á portería rival, pois xenéranse moitas ocasións pero transfórmanse poucas en proporción as que se crean (aínda que xa se sabe que o gol é cousa de "rachas"). O próximo encontro do Malpica será en Vimianzo despois da festividade de Semana Santa.

jueves, 25 de marzo de 2010

ENTREVISTA A MARTÍN PUENTE

Hoxe entrevistamos a Martín (19 anos), xogador fichado esta tempada pola SCD Malpica. A súa traxectoria resúmese sinxelamente, pois estivo dende os cinco anos nas categorías inferiores do Bergantiños.

Pregunta: ¿Qué tal te atopas no equipo?; ¿foi complicada a túa adaptación?

Resposta: Pois a verdade atópome xenial. Pensei que me iba ser moito máis difícil adaptarme pero hai un gran grupo de xente que fai que me sinta como se levase aquí toda a vida.

P: Non estás a contar con moitos minutos, pois xogas na posición onde hai máis competencia este ano (mediocentro), ¿cómo o estás a levar?

R: Si que hai moita competencia (risas), pero é unha competencia sana que fai que creza o nivel do equipo. Home, un intentao levar o mellor que pode aínda que non é sinxelo. Gustaríame disfrutar de máis confianza xa que senón é moi difícil demostrar o que un ten.

P: ¿Tíñas algunha referencia do Malpica antes de fichar?; ¿Qué foi o que máis te sorprendeu?

R: Pois non, a verdade e que vin un pouco a cegas (risas). Sen dúbida o que máis me sorprendeu foi o gran ambiente que se respira, hai moita confianza e risas entre a xente, e iso fai que a xente veña con ganas a entrenar, cando non ten reunións claro (risas).

P: ¿Cál foi o xogador/xogadores da Liga da Costa que máis te impresionaron?

R: Houbo un par deles do noso equipo que me impresionaron moito, aínda que nonos vou nombrar que se lle sube á cabeza (risas). Braulio do Zas quizáis que sexa o q máis me chamara a atención, pero penso que non hai moitos xogadores que sobresaian por enriba doutros.

P: ¿A qué pode aspiralo clube cando quedan só 6 xornadas?

R: Eu estou convencido de que imos quedar terceiros; eso si, senón nos relaxamos ou nos entra a "pájara" coma en Camariñas.

P: ¿Podes decirnos algo do que tes pensado facer para a próxima tempada?

R: Pois non pensei para nada niso, penso que aínda queda moita tempada por diante e gústame ir pouco a pouco, aínda que me gustaría continuar aquí xa que é o mellor grupo co que xoguei e para demostrar o que non estou podendo demostrar este ano.

Gracias a Martín por dedicarnos unha parte do seu tempo.

lunes, 22 de marzo de 2010

ENTREVISTA A MARCOS AMADO

Esta semana charlamos con Marcos Amado, xogador da SCD Malpica que cumple a súa segunda tempada no clube. Comezou a xogar nos xuvenís do Cabana, nos que estaría durante 5 anos (pois entrou no equipo sendo cadete); ó mesmo tempo, xogou ó fútbol sala nos xuvenís do Etitex nas ligas locais da Coruña (logo sería o A Vieira Ponteceso Fútbol Sala). Xa como modesto, estivo no Cabana e no Ponteceso (en dúas etapas), ademais de seguir xogando ó fútbol sala no Autos Pombo Cabana F.S., estando tres anos sen xogar por motivos laborais, para recalar posteriormente no Malpica.

Pregunta: Xa levas 2 tempadas no clube, ¿qué tal te atopas?

Resposta: A verdade é que moi ben, xenial diría, dende o primeiro día fun moi ben recibido no vestiario polos compañeiros e ademais deportivamente dende o primeiro día o míster confiou en min e adaptarse a un novo equipo e novos compañeiros se un xoga habitualmente é moito máis sinxelo.

P: ¿Qué aspectos foron os que máis te sorprenderon do equipo?

R: Para empezar a xuventude, xa que quitando aos veteranos Manu e Marco, que superan os trinta, o resto do equipo formao xente moi nova. E por outro lado, a calidade en xeral do equipo, quitando o denominado "muro" de Toni (xa entendedes todos) que só lle da para riba o resto do equipo intenta xogala, e en ocasións bastante ben para esta categoría na que xogamos, sen ir máis lonxe esta fin de semana en Castriz temos un bó exemplo.

P: Estás a xogar de lateral cando a túa posición habitual en anos atrás era a de volante, ¿en cál te sintes máis cómodo?

R: Sinceramente, máis cómodo xógase de interior xa que a responsibilidade defensiva é menor e os erros atrás nótanse máis. Arriba podes facer algún regate, de vez en cando algún goliño e aínda que perdas un balón non pasa nada, atrás é distinto. De todas formas a pesar de que ata que cheguei a Malpica non xogaba habitualmente no posto de lateral adapteime todo o ben que puiden e aínda que as veces cometo erros, estou contento nesta posición.

P: ¿Qué factores crees que foron os que provocaron que a tempada pasada fose tan mala?

R: Para empezar tivemos en certos momentos da liga moi mala sorte, cando xogabamos ben e controlabamos os partidos non gañabamos e incluso os perdíamos cando xa os tiñamos gañados. Despois as arbitraxes nalgúns partidos non foron xustas. Todo isto xunto coas lesións de compañeiros moi importantes para este equipo en gran parte da temporada fixeron que o ambiente no vestiario e na grada non fora o mellor. Con todo isto ao final da unión do grupo dentro do vestiario fixo que polo menos non perderamola categoría.

P: ¿Cómo velo equipo actualmente?

R: En xeral moi ben, só hai que ver a clasificación, para empezar o ambiente no vestiario é xenial, e iso é importantísimo cando todos vimos a divertirnos e non gañamos nada, máis ben perdemos (sobre todo cando encarga Andresiño). A xente nova aportou cousas moi positivas ao grupo, humildade, traballo e sobre todo compañeirismo, deportivamente non vou descubrir nin a Neucha nin a David (aínda que ultimamente nin de penalty), pero aínda que a Agilda no lle gusta que personalice quería falar dos Isma, Brais, Martín (todo velocidade), Carlos que son os que menos xogan e os que máis gañas lle poñen nos adestramentos. Diego e Abraham, que boísima tempada a dos dous, un porque sempre está ahí para todo o que faga falla (coma as brasileiras) e o outro para facerlle competencia (e non me refiro ao peso) ao bo de Toni e sentalo no banco de vez en cando.
Todo isto xunto co que xa habia fai que agora mesmo esteamos nunha posición cómoda na liga e podamos xogar sen a presión do ano pasado.

P: Hai dúas tempadas gañachela Copa da Costa co Ponteceso, ¿pensas que o Malpica pode ter algunha opción este ano?

R: Na miña opinión depende moito dos emparellamentos das primeiras roldas, se temos sorte nos cruces e nos libramos dos equipos de categoría superior xa teríamos moito gañado, despois penso que as diferenzas entre os equipos son mínimas e se as hai a partires dos cuartos de final cando nos campos empeza a haber máis xente do habitual minimizanse e pode pasar de todo.
Penso que podemos facer un bo papel (semis) aínda que hai equipos, 4 ou 5 diría eu, que son superiores.

Moitas gracias a Marcos pola súa colaboración (e a ver senón lle cae moito "vacile" nos adestramentos...).

CASTRIZ 0 - MALPICA 3

SD CASTRIZ: Ángel (Herrera 46’), Rubén (Martín 67’), Torreira (Álvaro 70’), Álex, Bruno, Jota, Noly, Koeman, Ovidio, Sebas (Víctor 82’), Dani.

SCD MALPICA: Toni, Alfredo II, Marcos Amado, Iago, Marco (Casais 70’), Rancaño (Charlie 53’), Neucha, Cheo, David Blanco, Andrés (Martín 81’), Manu Pardo (Eloy 53’).

Árbitro: Bruno Méndez. Unha das mellores arbitraxes da tempada nos partidos desputados polo Malpica, pois logrou controlalo partido perfectamente sen abusar das tarxetas e tivo o mesmo raseiro para os dous equipos durante todo o encontro. Ademais estivo moi valente á hora de indicar dous penaltis (claros) á favor dos malpicáns.

Goleadores: 0-1 (min. 62): Boa xogada colectiva da SCD Malpica que culmina David Blanco cun gran disparo pegado ó pao esquerdo da portería do Castriz dende o borde da área. 0-2 (min. 67): Golazo de falta de Neucha tras salvala barreira que se cola coma un obús pola escadra dereita da meta defendida por Herrera. 0-3 (min. 69): Penalti de Torreira sobre Cheo que o materializa Neucha de forte tiro centrado.

Ambiente e Incidencias: Pouca xente no remodelado campo de San Pedro (uns 50 afeccionados). O gardameta local Ángel foi sustituído no descanso por lesión. Non houbo expulsados. O partido estaba previsto para ás 17:15 do sábado día 20 de marzo, pero o árbirto encargado de dirixilo partido non se presentou e houbo que chamar a outro colexiado, provocando que o encontro comezase ás 18:00 horas, aproximadamente.

Comentario: Visitaba a SCD Malpica a un dos mellores equipos na Liga na segunda volta, o Castriz (sumaba 25 puntos dos últimos 36 en xogo). Para este encontro, o técnico Manuel Agilda contaba coa única baixa do defensa Víctor (de viaxe). Tra-la boa imaxe mostrada fronte ó Castriz, os malpicáns tentaban lograr unha vitoria para saír do pequeno bache en que se atopaban, pois contaban con dous empates en tres partidos. No primeiro período as forzas estiveron moi igualadas, e os dous equipos dispuxeron de varias ocasións de gol. Os visitantes, ben plantados no terreo de xogo, defendían con orde e creaban perigo polas bandas, pero a súa falta de acerto de cara a gol propiciou que o marcador non se movese nos primeiros 45 minutos, a pesar de dispor de tres claras ocasións: un remate de cabeza de Neucha atallado polo porteiro, un disparo dende fóra da área de Manu Pardo que topa co longueiro e un disparo de David Blanco que atrapa Ángel cando xa parecía batido nunha gran parada. Pola súa parte, o Castriz buscaba aproveitala velocidade dos seus xogadores de ataque con balóns á espalda da defensa e tamén creaba perigo nas xogadas a balón parado, destacando un cabezado ó longueiro de Dani.

No segundo tempo o partido so tivo un dono, a SCD Malpica, que controlou claramente a posesión do esférico e monopolizou, case por completo, as oportunidades de gol. O encontro pasouse a desenvolver na parcela do campo defendida polo Castriz gracias a un fútbol máis preciso e combinativo dos malpicáns, axudado pola frescura dos xogadores que entraron nesta segunda parte. A pesar de anotar tres goles, aínda puideron anotar algún máis, pois os azulóns desaproveitaron unha pena máxima (David Blanco lanzou alto) cando o resultado era todavía de empate a cero. O conxunto xalleiro veuse abaixo nos segundos 45 minutos, quizáis debido a un baixón físico ou de moral por encaixar tres goles en menos de 10 minutos, e apenas creou perigo sobre a meta defendida por Abraham (salvo algunha ocasión en xogadas de estratexia), pero en ningún momento puxo en dúbida a vitoria visitante.

En resumo, importante triunfo o colleitado polo Malpica que lle serve para subir dúas posicións na táboa clasificatoria (é sexto), para seguir aspirando á terceira plaza (está a tres puntos) e para confirmala recuperación (xa patente a semana pasa fronte ó Xallas) despois do "desastre" de Camariñas hai dúas xornadas. Ademais, a falta de seis xornadas, conseguen o obxetivo da tempada: a permanencia sen agobios, xa que lle sacan 21 puntos ó 15º clasificado, a Esteirana, que sería o último equipo en baixar supoñendo que, no peor dos casos, descendesen o Cee e o Ponteceso de Primeira Rexional. A vindeira semana, o conxunto adestrado por Manuel Agilda recibe ó perigoso Baio, que conta con Guillermo, o actual "pichichi" da categoría.

lunes, 15 de marzo de 2010

MALPICA 0 - XALLAS 0

SCD MALPICA: Toni, Víctor, Marcos Amado, Iago, Marco (Alfredo II 82’), Rancaño (Manu Pardo 65’; Eloy 69’), Neucha, Casais, David Blanco, Cheo (Ismael 81’), Charlie.

XALLAS CF: Chely, Ismael, Sergio Pose (José Ángel 79’), Álvaro, Lobo (Iván Forján 46’), Ricardo, Rubén, Pepe, Ventura, Toni (Carlos 71’), Jesús.

Árbitro: Sr. Ramos López. Moi desatinado xa que na primeira parte non sinalou dous claros penalis a favor da SCD Malpica, un cometido sobre David Blanco cando encaraba a portería rival e outro por unhas mans nun centro de Cheo. Ademais, durante todo o partido non foi quen de paralo xogo duro dos visitantes, especialmente nos balóns aéreos divididos, pois apenas sacou tarxetas amarelas.

Ambiente e Incidencias: Día despexado pero cun vento moderado. Boa entrada na Pedra Queimada, cuns 125 espectadores. O mediocentro malpicán Manu Pardo foi sustituído ó pouco de entrar no terreo de xogo ó quedar conmocionado por un balonazo na cabeza. Non houbo expulsións.

Comentario: Recibía a SCD Malpica na Pedra Queimada a un dos dous candidatos a gañala liga, o Xallas (2º clasificado a catro puntos do Zas). O equipo malpicán chegaba a este encontro despois de sair goleado a semana pasada en Camariñas, pero coa intención de dar outra imaxe ante a súa afección. Manuel Agilda podía contar con tódolos xogadores do plantel, a excepción de Andrés (por viaxe). As dúbidas que o equipo suscitara a xornada pasada quedaron disipadas dende o primeiro minuto, pois os locais entraron no partido con moita intensidade e concentración, sabedores de que senón xogaban ó 100% pouco terían que facer ante tan potente rival. O Malpica presionou moi ben, xuntando as liñas en poucos metros e tratando de combinar cando recuperaban o esférico, axudado polo vento a favor. Durante esta primeira parte, os locais disfrutaron de varias ocasións clarísimas de gol, dúas nas botas de David Blanco (en sendos mans a mans) e outra de Casais que disparou alto tras plantarse só ante Chely. Pola súa banda, o Xallas tentaba chegar mediante balóns longos para aproveitala velocidade e técnica dos seus atacantes, pero só contou cunha ocasión clara nos primeiros 45 minutos mediante un cabezazo que marchou fóra por pouco.

Na segunda metade, e co vento en contra, os azulóns apenas disfrutaron de oportunidades de gol ante un Xallas que pasou a selo dominador do encontro, axudado polo seu poderío físico e co mediocentro Toni como canalizador do xogo ofensivo, aínda que sempre abusando do xogo directo. Sen embargo, o Malpica continuou defendendo ben, sen pasar excesivos apuros. Aínda así, os visitantes tiveron varias oportunidades gol, sobre todo nos pés de Ventura, pero o porteiro malpicán Toni tivo unha tarde inspirada e evitou que o gol subira ó marcador. A SCD contou coa derradeira ocasión, xa no desconto, que culminou cun disparo de Neucha tras un xogada persoal, pero que saiu fóra.

Meritorio empate do Malpica que logrou neutralizalo potente ataque xalleiro (é o conxunto que máis golea, con 64 goles a favor), pero non foi quen de anotalas claras ocasión de gol das que disfrutou no primeiro acto (ademais dos dous penaltis que se "tragou" o colexiado). Tamén hai que recoñecela superioridade do Xallas na segunda metade, polo que o empate pódese considerar como xusto, aínda que deixa un sabor "agridulce" nos malpicáns pois que fixeron méritos máis que suficientes para ir con vantaxe ao descanso. A vindeira semana a SCD viaxa ata Castriz, quizáis o conxunto máis en forma na segunda volta, tentando buscar unha vitoria que lle permita seguir nos postos altos da táboa clasificatoria.

jueves, 11 de marzo de 2010

ENTREVISTA A ABRAHAM VARELA

Hoxe falamos con Abraham, outra das incorporacións da SCD Malpica para a presente tempada e que se desenvolve na posición de porteiro. Ademais destaca pola súa xuventude, pois conta con 20 anos. O seu periplo como futbolista pode resumirse nas seguintes etapas: benxamín e alevín de 1º ano: Santa Margarita (era xogador de campo); alevín de 2º e infantil de 1º: Oseiro; infantil de 2º: Arteixo; cadete de 1º: Oseiro; cadete de 2º e xuvenil de 1º: Arteixo; xuvenil 2º: Montañeros (División de Honra); xuvenil de 3º: Brexo Lema; actualmente, xa como modesto, milita no Malpica.

Pregunta: O adestrador semella que está rotando o posto de porteiro divindo os minutos entre Toni e mais ti, ¿qué che parece?

Resposta: O feito de ser porteiro é unha complicación, xa que non acepta rotacións, como por exemplo un lateral, que en calquera momento podera xogar de central. Por sorte a Liga é moi longa e o entrenador estánnos a dar oportunidades aos dous porteiros ante toda clase de rivais (tanto da zona baixa coma da alta da táboa) e intentado que os dous xoguemos o máximo posible. E mentras non aparezca ningún tipo de contratempo (lesións, sancións, etc...) paréceme a mellor opción de que tanto Toni coma eu, poidamos disfrutar do futbol.

P: ¿Cómo foi a túa adaptación á SCD Malpica?

R: Pois a chegada tardía ao conxunto dificultou un pouco as cousas, xa que ao principio atopábame un pouco perdido, polo feito de que non coñecía a ninguén, nunha plantilla xa formada e cerrada. A medida que avanzaban as xornadas a cousa foi mellorando. Actualmente síntome coma un xogador máis do clube e da plantilla. E agradezco en especial a xente coma Toni, Alfredo ou Ranki que foron os primeiros en "falarme" e axudarme á total adaptación ao equipo.

P: ¿Qué elemento/elementos consideras como os máis positivos do equipo en xeral?

R: Creo que o elemento que máis salta á vista e o bo ambiente que hai na plantilla. Nunca verás a ningún xogador faltarlle ó respeto ou levantarlle a voz a outro por cometer un erro. E ainda que parezca moi básico, non en todas as plantillas se cumpre iso.

P: ¿Qué foi o que, tanto positiva coma negativamente, máis te sorprendeu da Liga da Costa?

R: Pois positivamente sorprendeume a cantidade de afeccionados que se desplazan aos campos. En anteriores equipos nos que estiven, poucas veces se pasaron dos 100 espectadores, so en casos especiais, como finais de copa ou en fases de ascenso. A verdade e que se o tempo acompaña, cousa que este ano non pasou sempre, xamais olvidarei Lira (risas), a xente vai aos campos de fútbol, e agradecese bastante. Pola contra, o que menos me gustou, sen dúbida, son os desplazamentos longos que houbo que facer, e os que aínda nos quedan.

P: ¿Crees que o equipo pode superar este pequeno "bache" de xogo que está a sufrir nas últimas xornadas?

R: Non o creo, estou seguro de que sairemos del. Todos os equipos teñen algún bache na temporada, e a nos tocounos agora. Espero que este domingo fronte ó Xallas cambie esta racha para ben, xa que temos equipo e xogadores cunha calidade para poder quedar entre os 4 primeiros.

P: Por último, ¿podes avanzarnos algo sobre o teu futuro para a vindeira tempada?

R: Sinceramente, nin eu o sei. De principio teño un acordo verbal co Universidade para volver para alí, pero isto do futbol da moitas voltas, e nunca se sabe onde podes acabar. Se aparece unha boa oferta sera cuestión de escoitala, e decidir sobre o que sera mellor para min.

Moitas gracias a Abraham pola atención prestada.

lunes, 8 de marzo de 2010

CAMARIÑAS 6 - MALPICA 1

CAMARIÑAS CF: Rubén, Pesqui, Ogando, Antelo, Maikel, Moriño (Nico 69’), Brais (Iago 75’), De la Sierra (Ismael 46’), Javi, David (Breo 52’), Gerardo (David Correo 66’).

SCD MALPICA: Toni, Víctor, Marcos Amado (Casais 55’), Alfredo II (Carlitos 55’), Iago, Eloy (Ismael 64’), Neucha, Cheo, David Blanco, Rancaño (Martín 64’), Charlie.

Árbitro: Sr. Yáñez Muiño. Non tivo unha gran actuación, pois concedeu o segundo gol dos locais en fóra de xogo e non foi quen de impor a súa autoridade en ningún momento, a pesar de que non foi un partido bronco.

Goleadores: 1-0 (14’): Balón perdido polos visitantes á altura do mediocampo, pase en profundidade cara David que aproveita a súa velocidade para plantarse ante Toni e batelo de vaselina. 2-0 (20’): Brais recibe só en á altura de tres cuartos de campo, envía o balón en profundiade a Javi e este cédelle o balón a Gerardo para que anote a porta baldeira en presumible fóra de xogo. 3-0 (24’): Xogada de Javi pola banda esquerda, gaña a liña de fondo e envía o balón ó segundo pao onde aparece Gerardo libre de marca para marcalo seu segundo gol. 4-0 (60’): Ogando bota unha falta dende a banda esquerda do ataque local, o esférico chégalle a Ismael que remacha no segundo pao sen apenas oposición. 5-0 (64’): Saque de esquina a prol do Camariñas remachado cun forte disparo de Ismael dende a frontal da área. 5-1 (76’): Gran xogada de Cheo por banda dereita, despois de desfacerse de varios rivais envíalle un centro perfecto a David Blanco que fai o gol da honra visitante cun preciso cabezazo. 6-1 (83’): Falta a favor do Camariñas no borde da área botada por Maikel rematada por Breo de cabeza ante a indecisión da defensa e porteiro malpicáns.

Ambiente e Incidencias: Un cento de afeccionados en Hermanas Patiño. Tarde moi fría e nubrada. Foron sustituídos os locais David e Moriño con molestias físicas. Non houbo tarxetas vermellas.

Comentario: Tratátabase, a priori, dun encontro que medía a dous equipos cun nivel similar (so estaban separados por un punto na táboa clasificatoria) e moi atractivo, pero dende o primeiro minuto se puido comprobar que non ía a sela tarde dos malpicáns. Manuel Agilda non podía contar para este encontro con Marco e Manuel (ámbolos dous por sanción), Andrés (de viaxe) nin Brais (por asuntos académicos). Dende o pitido inicial quedou claro que era a "cara b" da SCD Malpica a que tocaba ver nesta 26ª xornada da Liga da Costa, pois en ningún momento dos primeiros 45 minutos logrou estar cómoda no terreo de xogo nin soubo contrarrestalo xogo camariñán. O desorde táctico, había moita distancia entre liñas, e a falta de chispa (parecía que os locais andaban cunha marcha máis) provocou que a presión en mediocampo fose inexistente e a aparición dunha gran cantidade de espacios que foron moi ben aproveitados polos atacantes locais. A pesar disto, e de que o xogo en ataque tampouco era fluído, o Malpica tivo algunha boa ocasión de gol na primeira metade, sobre todo mediante sendos disparos de Neucha e de David Blanco.

No segundo acto, a SCD adiantou liña e xogou en menos metros de campo, logrando presionar moito mellor e pasando menos apuros defensivos, pois o xogo desenvolveuse maioritariamente na parcela do campo ocupada polo Camariñas. Sen embargo, a efectividade local nesta parte foi, practicamente, do 100% (aínda que o dianteiro Javi marrou un penalti por mans de Iago que detivo Toni), aproveitando ben as xogadas a balón parado, un dos puntos flacos do Malpica nas últimas xornadas. Por outra banda, puidose ver un certo cambio de actitude dos visitantes, o que unido a unha menor distancia entre liñas, fixo que recuperasen o balón máis preto da portería do Camariñas permitindo crear unha maior sensación de perigo, aínda que non contou con oportunidades claras de gol.

Mala imaxe mostrada pola SCD Malpica en Hermanas Patiño na tarde de onte, especialmente na primeira parte, mostrando unha certa irregularidade nos últimos partidos, combinando encontros (ou partes de encontros) boas con outros partidos nos que falta ambición. Non obstante, a pesar do duro correctivo que sufriron, os xogadores non deben caer no pesimismo, senón aprender dos erros cometidos, darse conta de que sen a actitude necesaria calquera equipo che gaña (e se se trata dun dos equipos punteiros te golea) e pensar que a vindeira semana hai outro partido, nada máis e nada menos que contra o Xallas (2º clasificado), o que supón unha doble oportunidade: primeiro para cambialo sabor de boca deixado fronte ó Camariñas e, segundo, para "vengala" derrota sufrida na primeira volta en Santa Comba (4-1) e seguir aspirando á 3ª plaza.

miércoles, 3 de marzo de 2010

ENTREVISTA A DIEGO CASAIS

Esta semana falamos con Diego Casais, unha das novas fichaxes da SCD Malpica para esta tempada 2009-2010 e un dos xogadores máis novos da plantilla (só conta con 19 anos). A súa traxectoria futbolística resúmese sinxelamente, pois desenvolveuse no Bergantiños na sua integridade: nada máis e nada menos que 14 anos.

Pregunta: ¿Qué tal te estás a atopar nesta tempada, a primeira na SCD Malpica?

Resposta: Ben, a verdade e que bastante ben. Estou contando con máis minutos dos agardados e a relación cos compañeiros e co entrenador é moi boa. Foime moi sinxelo adaptarme.

P: ¿Qué aspecto ou aspectos foron os que máis te sorprenderon do clube?

R: O gran ambiente que hai en todo o equipo, e o trato recibido tanto do entrenador como da directiva.

P: É a túa primeira experiencia na Liga da Costa, ¿que opinión che merece ata o momento esta Liga?

R: Esta liga estáme sorprendendo pola gran igualdade que hai, apartando o Zas e o Xallas que van un pouco por encima. Tamén se reciben demasiadas patadas! (risas).

P: Xa a nivel persoal, ¿estás contento xogando de volante dereito ou sénteste máis cómo de lateral?

R: Non me importa xogar de lateral ou de interior, pero estou mais cómodo de interior, teño menos responsabilidade defensiva (risas).

P: ¿Pensabas en ter tanto protagonismo no equipo xa dende o inicio da tempada?

R: Non, claro. Foi un salto de categoría e non pensaba en disfrutar de tantos minutos.

P: ¿Ves o equipo con posibilidades reais de loitar polo 3º posto ou pensas que a actual clasificación é algo circunstancial?

R: A pesar de que o obxetivo do equipo era salvar a categoría, penso que temos equipo para pelexar pola liga, aínda que os últimos empates na casa restáronnos posibilidades. Aínda quedan moitos puntos en xogo.

Dende este blog dámoslle as gracias a Casais pola súa atención e desexámoslle todo o mellor para o futuro na SCD.

lunes, 1 de marzo de 2010

MALPICA 1 - MUROS 1

SCD MALPICA: Toni (Abraham 86’),Víctor, Marcos Amado, Iago, Marco, Manu Pardo (Ismael 86’), Neucha (Brais 91), Casais, David Blanco, Andrés (Charlie 59’), Rancaño (Martín 89’).

MUROS SD: Rubén, Iván (Adán 73’), Paqui, Teo, Gael, Álvaro, Brais (Gelo 69’), Edu (Manu 63’), Quico, Bibi (Pesco 77’), Sexo.

Árbitro: Melián Otero. Ben na primeira metade, pero na segunda complicouse o encontro e non soubo impoñer a súa autoridade ante as constantes protestas dos xogadores de ámbolos dous equipos. Non indicou un penalti a prol dos locais por unhas mans claras na área muradana.

Goleadores: 1-0 (75’): Balón bombeado sobre a área visitante tras un saque de falta de Víctor dende o medio do campo, e no forcexeo por lograr cabecealo esférico, o visitante Teo agarra a Charlie impedíndolle o remate. A pena máxima é transformada por Neucha. 1-1 (90+4): Saque de esquina a prol do Muros botado por Sexo dende a banda esqueda rematado por Gael, nun gran cabezazo que toca no poste antes de entrar na meta malpicán.

Ambiente e Incidencias: Unhas 100 persoas na Pedra Queimada. Tarde sen choiva e con lixeiro vento. Non houbo expulsados. Tiveron que ser sustituidos por lesións musculares o visitante Iván e o porteiro local Toni.

Comentario: Visitaba a Pedra Queimada o Muros, unha das "bestias negras" da SCD Malpica nas últimas tempadas. Os locais non podían contar con Alfredo II (por motivos persoais), nin cos sancionados Eloy e Cheo. O encontro comezaba moi ben para os xogadores de Manuel Agilda, xa que saíron moi enchufados ó encontro e foron os claros dominadores da primeira metade, sobre todo durante os 30 minutos iniciais, tentando combinar con rapidez para aproveitalas deficiencias defensivas do Muros, aínda que as mellores ocasións chegaron por medio de disparos lonxanos de Neucha (en dúas ocasións, unha de falta) e outro de Manu Pardo, ademais dunha clara oportunidade de Rancaño tras unha xogada individual dentro da área que culmina cun disparo que sale rozando o pao esquerdo da portería defendida por Rubén. Cando se aproximaba o descanso, o Muros comezou a apretar algo máis, pero apenas creou perigo, pos os locais presionaban ben no mediocampo e a defensa mostrábase segura cando tiña que intervir. Non obstante, cabe destacala ocasión de Quico no min. 40.

No segundo acto, o partido nivelouse, e o fútbol de toque e control desapareceu, pois foi gañando protagonismo o xogo en medio campo e con pouca profundidade, ademais de aumentalas imprecisións. A SCD tentou buscala portería contraria con pases en profundidade, aproveitando a maior velocidade dos seus atacantes, pero a pesar de chegar con perigo á área visitante, non foi quen de marcar (salvo de penalti); mentres que no aspecto defensivo continuou sen problemas serios. Destaca unha ocasión de Neucha a centro de Charlie, un "pase da morte" de Neucha que non atopou rematador e un man a man que David Blanco non soubo definir ante rubén tras un gran pase de Ismael. Pola súa parte, o Muros subíu líñas e acumulou máis xente en ataque, especialmente tra-lo gol local, pero non contou con ningunha oportunidade de gol clara.

Partido que deixa un mal sabor de boca, non só polo empate no min. 95, se non que polo visto o desenrolo do partido pódese decir que a SCD Malpica deixou escapar dous puntos ante un Muros que está moi por debaixo do nivel amosado o ano pasado cando quedou subcampión. A pesar de que sone a tópico, onte cumpriuse o dito de que quen perdoa acábao pagando. Tra-la desputa da 25ª xornada da Liga da Costa, o Malpica queda situado con 43 puntos, empatado na terceira posición co Sofán, Castriz e San Lorenzo. A vindeira semana, os azulóns desprázanse a Camariñas para xogar ante un dos mellores conxuntos da competición.