lunes, 31 de enero de 2011

LIGA DA COSTA 21ª XORNADA: MALPICA 6 - CORME 1

SCD MALPICA: Suso, Charlie, Víctor, Iago (Casais min. 59), Marco (Gonzalo min. 62), Eloy, Marcos Amado, Neucha, David Blanco, Andrés (Ismael min. 56), Manu Pardo (Miguel Dourado min. 64).

CORME CF: Suso, (Javi min. 60), Adolfo, Martín, Pipo, Pandi, Felipe (Xavi min. 70), Alejo, Alejandro, Iago (Mauro min. 75), Lucas, Dani.

Árbitro: Fernando Rodríguez Rodríguez. Tivo unha actuación sen sobresaltos, pois o partido non tivo apenas accións polémicas. Sen embargo, na segunda metade equivocouse ó indicar penalti a prol do Corme por unha inexistente falta de Marcos Amado sobre Iago.

Ambiente e Incidencias: Tarde soleada na Pedra Queimada pero que foi empeorando a medida que pasaban os minutos, inclusive con choiva no treito final do encontro. Unhas 150 persoas na grada, cunha afección local que non deixou de animar durante os 90 minutos. Non houbo lesionados de consideración nin expulsados.

Goleadores: 1-0 min. 3: Xogada individual de Neucha dende a posición de extremo dereito, recorta a varios rivais en diagonal "ó estilo Messi" e dende o pico da área lanza un zurdazo que entre preto da escadra dereita. 2-0 min. 5: Internada de David Blanco pola esquerda, plántase ante Suso que despexa, pero o rexeite cáelle a Neucha que anota no segundo pao a pracer. 2-1 min. 19: Saque de esquina botado polo Corme, a defensa local despexa, pero no borde da área hai un rexeite caéndolle o esférico a Lucas que marca de tiro cruzado. 3-1 min. 39: Pase en longo sobre a área visitante, o gardameta Suso dubida quedando a media saída, tropeza con Pandi, quedando balón morto para que Neucha só teña que empuxala coa cabeza. 4-1 min. 50: Pase en profundidade cara David Blanco que se interna na área e bate a Suso de tiro raso coa perna esquerda. 5-1 min. 52: Penalti de Pandi sobre David Blanco que materializa Neucha de forte tiro. 6-1 min. 60: Man a man de David Blanco que dispara, o balón sae rebotado tras rexeitala o gardameta, caéndolle, de novo, a Neucha que marca a porta vacía.

Comentario: Partido fundamental para os intereses da SCD Malpica, pois despois da derrota en Muros atopábase a tan só cinco puntos dos postos de descenso, e recibía na Pedra Queimada a un rival directo, o Corme, conxunto que contaba con un punto menos que os malpicáns na táboa clasificatoria. Manuel Agilda, adestrador local, contaba coas seguintes ausencias: Viña, Martín (ámbolos dous lesionados de longa duración), Cheo (sancionado) e o gardameta xuvenil Víctor (mancado). Presumíase un encontro bonito, xa que ámbolos dous conxuntos se caracterizan polo bo trato de balón, pero apenas houbo emoción, pois ós cinco minutos os malpicáns xa contaban con dous goles de vantaxe tras un comezo fulgurante, acosando ó Corme no seu propio campo e chegando con moita facilidade ás inmediacións da área rival. Pero a medida que pasaban os minutos o partido entrou nunha fase algo máis nivelada, onde os visitantes aproveitaron certos desaxustes na presión local para estirarse algo máis en busca do gol, tendo unha boa ocasión por medio dun disparo de Iago que Suso mandou a corner tras unha gran intervención. Non obstante, cando o Malpica tiña paciencia e combinaba en curto, creáballe numerosos problemas a unha defensa visitante que se mostrou moi insegura durante a tarde de onte, pero non contou con claras oportunidades de gol, a excepción dun disparo de falta de Manu Pardo que saiu lambendo o longueiro.

Na segunda metade, os malpicáns non baixaron a intensidade, e sairon coa idea de cerralo partido para evitar posibles sorpresas, anotando tres goles en apenas un cuarto de hora. Nestes segundos 45 minutos o partido non tivo historia, pois o Malpica controlou completamente a posesión de balón, chegando con facilidade á área rival, tanto con balóns en profundidade como por medio de combinacións en curto, desbordando ós medios e defensas visitantes unha e outra vez. A medida que se achegaba o final, os locais baixaron "unha marcha" e limitáronse a controlalo tempo do partido ante un Corme que dou síntomas de cansancio. A pesar dos seis goles, o Malpica tivo varias oportunidades claras para marcar máis tantos: un cabezazo de Neucha que se estrelou no longueiro tras unha boa xogada entre David Blanco e Casais; un man a man de David Blanco; un rexeite tras un erro do gardameta Javi ó que non chega Miguel Dourado por pouco en boca de gol; etc. O Corme apenas cruzou o mediocampo, e só tirou entre os tres paos por medio dun penalti que lanzou Iago e atallou un fenomenal Suso.

Importante vitoria do Malpica que foi moi superior a un Corme que deu moi malas sensacións, e que lle permite ascender varios postos na clasificación (actualmente é oitavo), sumando a segunda vitoria consecutiva como local. Hai que resaltala espectacular inspiración de Neucha na tarde de onte, autor dun "repóker" de goles, algo pouco habitual nun campo de fútbol, que practicamente anotou todo o que tirou, e inclusive estivo preto de sumar un sexto gol se non chega a ser polo longueiro. Despois de lograla maior goleada no que vai de tempada, a SCD ten unha complicada saída a vindeira semana xa que xoga contra o Sofán.

domingo, 30 de enero de 2011

RESULTADOS DA 21ª XORNADA DA LIGA DA COSTA

Porteño 0 - Buño 3

Baio 0 - Camariñas 3

Ponteceso 1 - Club do Mar 1

San Lorenzo 4 - Muros 6

Malpica 6 - Corme 1

Esteirana 2 - Sofán 2

Fisterra 2 - Dumbría "B" 3

O Pindo 3 - Vimianzo 1

Castriz 2 - Carnota 1

lunes, 24 de enero de 2011

RESULTADOS DA 20ª XORNADA DA LIGA DA COSTA

Carnota 0 - Ponteceso 3

Club do Mar 1 - San Lorenzo 2

Muros 2 - Malpica 1

Corme 0 - Esteirana 1

Sofán 2 - Fisterra 0

Dumbría "B" 1 - O Pindo 0

Vimianzo 0 - Porteño 1

Buño 1 - Baio 1

Camariñas 1 - Castriz 0

LIGA DA COSTA 20ª XORNADA: MUROS 2 - MALPICA 1

MUROS SD: Ruzo, (Lupi min. 74), Gael, Iván, Teo (Dani min. 73), Mayuyo (Martín min. 88), David, Bibi, Miguel, Toni, Varito (Edu min. 90), Cexo, (Manu Dosil min.84).

SCD MALPICA: Suso, Charlie, Marcos Amado, Víctor, Iago, Ismael, Neucha, Casais (Miguel Dourado min. 46), Cheo, Manu Pardo, Eloy.

Árbitro: Juan Alberto Blanco Bravo. Estivo ben en líñas xerais, pero cometeu dous erros graves que poideron ter incidencia no marcador final: non sinalou penalti a prol do Muros por unhas claras mans do visitante Neucha, nin expulsou a un xogador do Muros por unha brutal entrada por detrás cometida sobre Cheo na segunda metade.

Ambiente e Incidencias: Pouco público no campo de Miraflores, con menos de 100 espectadores. Tarde despexada pero con moito frio. Non houbo cartóns vermellos. Os locais Teo e Ruzo retiráronse con sendos problemas físicos na segunda parte.

Goleadores: 1-0 min. 40: Falta preto do borde da área a favor do Muros que executa maxistralmente Miguel coa súa perna esquerda colándose o esférico preto da escadra esquerda da portería defendida por Suso que nada puido facer a pesar da súa estirada. 1-1 min. 49: Centro de Miguel Dourado dende a banda esquerda, a defensa do Muros logra despexar pero aparece Eloy no borde da área que fai o empate de tiro raso que se lle escapa entre as pernas a Ruzo. 2-1 min. 76: Centro dende a banda dereita do ataque local, hai unha serie de rexeites na área do Malpica, e o esférico cáelle a Toni que anota o gol da vitoria de tiro cruzado.

Comentario: Viaxaba a SCD Malpica a Muros coa ilusión de gañar nun dos campos que peor se lles da ós malpicáns nas últimas tempadas, e despois de gañarlle a semana anterior ó poderoso Club do Mar. Para tal tarefa, Manuel Agilda acumulaba as seguintes baixas: Martín, Viña, Marco (sancionado), Andrés (con problemas nun abductor), Víctor II (por un golpe) e David Blanco (baixa de última hora por unha gastroenteritis). Durante os primeiros 45 minutos o xogo directo foi o protagonista, pois o Malpica non logrou nunca sentirse cómodo co balóns nos pés, tendo posesións moi curtas e con escasas penetracións na área local. En cambio, nas ocasións nas que chegaron a altura de tres cuartos de campo abusaron en exceso da conducción individual. O Muros si lograba reter algo máis a posesión do esférico, pero enseguida buscaban o pase en longo para os seus rápidos atacantes. A pesar de non estar moi inspirados en ataque, os malpicáns apenas pasaron apuros defensivos, salvo en algunha xogada a balón parado e nun disparo de Miguel que saiu alto dende a frontal da área. A ocasión máis clara para o Malpica foi un disparo de Cheo dende a parte dereita da área que saiu demasiado cruzado ó comezo do encontro.

No segundo tempo, e a pesar de lograr empatar con rapidez, o Muros mostrouse superior á SCD, facéndose dono do balón e enviando constantemente pases que buscaban ás costas da defensa visitante. Ademais, as reducidas dimensións do campo de Miraflores provocaba que os numerosos saques de esquina e faltas botadas polos xogadores locais se convertesen en accións perigosas. O Malpica non logrou poñer en apuros á defensa local en case ningunha ocasión, mostrando pouco desborde e profundidade, excepto en algunha xogada de Cheo por banda dereita, pero sen tirar entre paos. O mellor xogador do encontro nestes segundos 45 minutos foi o gardameta Suso, que realizou varias paradas de mérito ante Cexo, Toni e Miguel, ademais de mostrase moi seguro nos balóns colgados. Tamén o local Bibi tirou ó pao. Sen embargo, no último minuto de encontro, o Malpica puido logralo empate por medio dun disparo de Eloy dende a frontal da área que saiu rozando a escadra dereita.

Mal encontro do Malpica na tarde de onte, onde non tiraron entre os tres paos con perigo en ningunha ocasión ó longo de todo o encontro (salvo no gol e coa colaboración do gardameta), onde se viron desbordados polos atacantes locais e con moi pouco claridade para combinar. Despois desta derrota os obxetivos deben cambiar, pois os postos de descenso están a tan só 5 puntos despois de acumular 5 derrotas nos últimos 6 partidos disputados. A vindeira semana, a SCD recibe na Pedra Queimada ó Corme, un rival directo.

viernes, 21 de enero de 2011

PREVIA

Vixésima xornada na Liga da Costa:

- Domingo día 23 de xaneiro, ás 16:00 horas: Muros - SCD Malpica, no campo de Miraflores.

lunes, 17 de enero de 2011

RESULTADOS DA 19ª XORNADA DA LIGA DA COSTA

Baio 1 - Castriz 0

San Lorenzo 1 - Carnota 0

Malpica 2 - Club do Mar 1

Esteirana 2 - Muros 0

O Pindo 3 - Sofán 1

Porteño 2 - Dumbría "B" 0

Fisterra 2 - Corme 3

Buño 0 - Vimianzo 0

Ponteceso 2 - Camariñas 1

LIGA DA COSTA 19ª XORNADA: MALPICA 2 - CLUB DO MAR 1

SCD MALPICA: Suso, Víctor, Marcos Amado, Marco, Iago, Eloy (Diego min. 93), Cheo (Gonzalo min. 92), Charlie, David Blanco (Miguel Dourado min. 83), Andrés, Manu Pardo (Ismael min. 70).

CLUB DO MAR: Borja, Fran Borrazás, Chori, Luis Lareo, Chechu, Alberto, Repi, Jacobo, Juan Lareo (Brais min. 61), Corral, Piñeiro.

Árbitro: Borja Sánchez. Moi boa labor a que desenvolveu na tarde de onte, aplicando o mesmo raseiro para os dous conxuntos, sen abusar das tarxetas e sen equivocarse en accións determinantes. O único "pero" foi o tempo que descontou na segunda metade, pois sumou sete minutos ó tempo reglamentario cando non houbo motivos para elo.

Ambiente e Incidencias: Gran entrada na Pedra Queimada, cunhas 250-300 persoas no campo, nunha tarde gris, sen choiva pero con vento moderado. Non houbo lesionados graves. O visitante Jacobo foi expulsado no minuto 83 por dobre amarela, a primeira por falta e a segunda por protestar. Mención especial merece o gran ambiente que houbo nas bancadas, coas afeccións de ámbolos dous conxuntos animando constantemente.

Goleadores: 1-0 min. 3: Saque de esquina botado por Cheo dende a esquerda que remata de cabeza David Blanco libre de marca á altura do punto de penalti. 1-1 min. 48: Boa xogada individual de Jacobo por banda esquerda, que penetra na área despois de desfacerse de dous rivais, e manda o "pase da morte" para que Corral anote a placer. 2-1 min. 66: Cheo colle o balón a altura de tres cuartos de campo na banda dereita, realiza unha fenomenal xogada individual sorteando a varios defensas e tira raso dende o borde da área coa perna esquerda saíndo o esférico axustado ó pao esquerdo de Borja.

Comentario: Despois da sorprendente derrota fronte ó colista, a SCD Malpica acumulaba catro derrotas seguidas, polo que o partido fronte ó Club do Mar (o primeiro como local neste 2011) supoñía unha ocasión inmellorable para gañar por fin a un dos equipos da zona alta da clasificación e romper coa mala xeira de resultados. Manuel Agilda contaba coas seguintes baixas: as habituais de Viña e Martín, Carlitos (por problemas nun xemelgo), e os sancionados Casais e Neucha. O encontro non podía comezar mellor para os intereses malpicáns, pois en apenas tres minutos xa se atopaban por diante no marcador, mostra do concentrados que saíron dende o primeiro minuto. Sen embargo, a medida que pasaban os minutos, o Malpica iba tendo cada vez menos posesión de balón ante un Club do Mar que dominaba a parcela ancha do campo, pero que non lograba profundizar. Os locais estiveron moi compactos sen balón, pero cando recuperaban o esférico apenas lograban combinar e abusaron dos balóns en longo. Apenas houbo oportunidades de gol nesta primeira parte, destacando por parte dos malpicáns unha xogada de David Blanco por banda esquerda pero o seu disparo (con pouco ángulo) desvíao Borja a córner e un tiro nunha posición forzada de Charlie dende a frontal. O equipo de Caión contou cunha ocasión moi clara tras un saque de falta, quedándolle o balón a Piñeiro no punto de penalti pero a súa volea marchou fóra por pouco.

O segundo acto comezou do mesmo xeito que o primeiro, cun gol ós tres minutos, pero esta vez foron os visitantes os que anotaron, na única ocasión que tiveron de xogada sen ser a balón parado. Se a intensidade foi a nota predominante durantes os primeiros 45 minutos, nesta segunda parte subiu ainda máis, con dous equipos que se entregaron completamente en busca da vitoria, pero cun Malpica que logrou ter máis o balón e que se foi impoñendo pouco a pouco, mostrándose sólido na parcela defensiva e facendo dano arriba, especialmente pola banda dereita e polo centro. Manu Pardo tentou en varias ocasións sorprende a Borja dende longa distancia, pero a pesar de que os disparon ían entre os tres paos, a envergadura do gardameta evitou que entrasen. Na recta final do encontro, Cheo disparou preto do longueiro e Miguel Dourado tivo un man a man ante Borja tras un pase en profundidade de Eloy, pero o seu disparo desviouno o porteiro nunha boa saída. O Club do Mar, que demostrou ser un equipo moi completo, mostrouse superior no xogo aéreo, pero só contou con dúas oportunidades de gol: un vaselina de Brais que supera a Suso pero que Iago despexa a córner, e un cabezazo dun dos centrais tras un saque de esquina que marcha alto.

Gran vitoria do Malpica ante o Club do Mar (3º clasificado), que lle serve para sumala primeira vitoria do ano e non meterse en problemas, pois en caso de derrota a distancia co descenso sería de cinco puntos a día de hoxe. Foi un partido de ti a ti entre ámbolos dous equipos, con moita intensidade pero con total deportividade, sen accións duras, e no que os malpicáns mostraron capacidade de reacción tras encaixalo empate nada máis comezala segunda metade. Importante triunfo que esperemos que lles de confianza e moral para afrontalos 15 partidos que quedan da segunda volta. O vindeiro partido da SCD será en Muros fronte ó equipo local.

lunes, 10 de enero de 2011

RESULTADOS DA 18ª XORNADA DA LIGA DA COSTA

Vimianzo 2 - Baio 4

Club do Mar 1 - Esteirana 0

Carnota 2 - Malpica 1

Muros 3 - Fisterra 1

Sofán 5 - Porteño 0

Dumbría "B" 3 - Buño 2

Corme 2 - O Pindo 2

Camariñas 4 - San Lorenzo 1

Castriz 0 - Ponteceso 1

LIGA DA COSTA 18ª XORNADA: CARNOTA 2 - MALPICA 1

UD CARNOTA: Pepu, Adrián (Pablo Beiro min. 61), Brea, Tono da Caixa, Pedro, David Castreje (Gabri min. 90), Nico, Miki Beiro (Andrés min. 71), Óliver (Demetrio min. 88), Nico Alvarado, Manuel Luís (Joselu min. 51).

SCD MALPICA: Suso, Charlie, Víctor, Marco, Iago, Ismael, Neucha, Cheo, M. Dourado (David Blanco min. 30), Eloy, Andrés (Casais min. 61).

Árbitro: Andrade Seoane. A pesar de ser un colexiado da Rexional Preferente, tivo unha actuación penosa na tarde de onte. Na primeira metade, e ainda co resultado de empate, non sinalou ningunha das tres penas máximas que lle reclamaron os malpicáns: unhas mans dun defensa do Carnota cando se tirou ó chan para despexar un centro coa cabeza, un agarrón sobre Cheo e unha patada a Miguel Dourado cando o dianteiro tentaba rematar no borde da área pequena (e que rematou co xogador malpicán lesionado). Ademais, o segundo gol do Carnota veu precedido por dúas faltas consecutivas cometidas por Nico. Tamén se equivocou ó indicar penalti sobre Neucha na segunda metade nunha acción na que o defensa local toca balón, quizáis para "compensar". Por outra banda, non tivo un criterio homoxéneo ó longo do encontro, pois se ben ó malpicán Casais lle mostrou cartón vermello (xusto) por unha patada sen balón por medio, ó carnotán Demetrio por unha acción similar só lle mostrou amarela.

Ambiente e Incidencias: Pouco púlico en Lombáns, con menos de 100 persoas no campo, nunha tarde soleada e cunha temperatura agradable para estar no mes de xaneiro. Por parte do Malpica foi expulsado Casais por cartón vermello directo (min. 69) tras unha patada sen balón de por medio e por parte do Carnota resultou expulsado Demetrio no min. 93 por doble amarela. Ademais, M. Dourado retirouse lesionado na primeira metade na anterior xogada mencionada.

Goleadores: 1-0 min. 31: Balón colgador por Miki Beiro sobre a posición de extremo esquerdo onde se atopa Óliver, que lle gaña as costas a Charlie, intérnase na área e empalma unha volea coa perna esquerda sen que o balón toque o chan que se cola polo segundo pao. 2-0 min. 42: Tras unha serie de varios rexeites na frontal da área visitante, o balón cáelle a Manuel Luís preto do punto de penalti que anota o segundo gol cunha fenomenal volea que entra pola escadra dereita da portería defendida por Suso. 2-1 min. 50: Neucha intérnase pola banda esquerda dentro da área, Adrián "vai ó chan" desviando o balón, pero o colexiado interpreta que derruba ó extremo malpicán. A pena máxima é materializada polo propio Neucha de forte tiro a media altura.

Comentario: Comezaba a segunda volta para o Malpica, que se tíña que desprazar ata Carnota para xogar contra o equipo local, conxunto que era o colista ata esta xornada. Os malpicáns non podían contar cos lesionados Viña e Martín, nin co sancionado Manu Pardo. O equipo adestrado por Manuel Agilda saiu cunha disposición táctica máis agresiva que en xornadas precedentes, consciente de que era preciso xerar máis ocasións de gol para rompela xeira de tres derrotas consecutivas que acumulaba a SCD. Así, os visitantes foron os claros dominadores da primeira metade, obrigando ó Carnota a xogar na súa metade do campo, e sumando oportunidades de gol pero que non se lograron materializar. A circulación de balón foi fluida, e creouse perigo tanto polas bandas como polo centro, ante unha defensa e porteiro locais que mostraron as súas carencias. Entre as ocasións (aparte das xogadas polémicas), destacaron as seguintes: unha xogada individual de Eloy que tras desfacerse de varios contrarios no borde da área tira frouxo ó estar desequilibrado; un disparo que saiu mordido de Neucha tras un centro raso de Cheo dende a banda dereita e o posterior rexeite que non logra anotar Dourado; un saque de falta botada por Neucha que Pepu despexa con apuros; e un saque de esquina botado por Cheo ó que Iago consegue chegar moi forzado no segundo pao e non logra marcar cando Pepu estaba xa batido. Polo que atinxe ó Carnota, só tentaba chegar a área de Suso mediante balóns longos pero que apenas facían perigo, e non tiraron entre os tres paos máis que en dúas ocasións, pero tiveron a fortuna de anotar dous golazos (o segundo, como xa se comentou, precedido de dúas claras faltas).

No segundo tempo, a tónica do encontro foi similar, cun Malpica volcado sobre a área do Carnota, ca defensa ainda máis adiantada, e tentando marcar de tódolos xeitos posibles para dárlle a volta ó marcador. Pronto acortaron distancias, pero cando máis estaban apretando en ataque, chegou a expulsión de Casais que facía todavía máis complicada a remontada. Sen embargo, os malpicáns non se viñeron abaixo, e seguiron sendo superiores inclusive cun xogador menos, pero pouco fútbol se puido ver, pois os locais comezaron a perder tempo constantemente e a cortalo xogo con accións merecedoras de tarxetas pero o colexiado non estaba moi pola labor. As oportunidades máis destacadas do Malpica foron un lanzamento alto de David Blanco tras revolverse moi ben dentro da área; un cabezazo de Charlie que saiu desviado tras un saque de esquina executado por Cheo; e un lanzamento de Neucha dende a parte esqueda da área que se machou fóra preto do primeiro pao. Os locais só crearon perigo por medio dun cabezazo de Nico tras un saque de falta bombeado pero que atallou Suso sen grandes dificultades.

Mala sorte para a SCD Malpica, tanto polas oportunidades que se fallaron (algo habitual na maioría dos encontros) como polo colexiado, que perxudicou (unha vez máis) gravemente ós malpicáns. O resultado de todo isto foi unha derrota inmerecida, ante un rival que apenas tirou a gol e que provoca que o Malpica sume catro derrotas consecutivas, polo que comeza a ser urxente comezar a gañar para non pasar apuros de aquí a final de tempada. Na vindeira xornada, o equipo de M. Agilda terá unha dura proba ante o Club do Mar de Caión (3º clasificado).

lunes, 3 de enero de 2011

RESULTADOS DA 17ª XORNADA DA LIGA DA COSTA

Dumbría "B" 0 - Vimianzo 1

Sofán 1 - Buño 2

Corme 1 - Porteño 1

Ponteceso 2 - Baio 1

Club do Mar 2 - Fisterra 2

Carnota 3 - Esteirana 1

Camariñas 2 - Malpica 0

Castriz 6 - San Lorenzo 0

Muros 3 - O Pindo 1

LIGA DA COSTA 17ª XORNADA: CAMARIÑAS 2 - MALPICA 0

CAMARIÑAS CF: Pombo, Josiño (Pesqui min. 61), Breo, Maikel, Ogando, Moriño, Brais, De la Sierra, Javi (Antelo min. 86), David (Mané min. 72), Juan o´Vello.

SCD MALPICA: Suso, Charlie, Víctor, Marco, Iago, Ismael, Cheo, Casais (Neucha min. 46), David Blanco, Andrés (M. Dourado min. 76), Manu Pardo.

Árbitro: Gallego Hernández. O seu maior "lunar" estivo á hora de sinalalos fóras de xogo do equipo local, pois houbo varios claros que xeraron ocasións moi perigosas pero non nos indicou. No tramo final do encontro, os malpicáns pediron penalti por un empurrón de Maikel sobre David Blanco cando o dianteiro encaraba a portería de local. No resto dos apartados si estivo acertado e pitou con personalidade.

Ambiente e Incidencias: Pouca xente nas gradas, cun cento de persoas aproximadamente nunha tarde fría e nubrada. Non houbo expulsados nin lesionados de gravidade.

Goleadores: 1-0 min. 32: Perda de balón do Malpica preto do mediocampo, o Camariñas realiza unha boa transición ofensiva que culmina cun pase co peito de Brais cara Juan o´Vello que lle gaña as costas á defensa malpicán e bate a Suso dende a posición de extremo dereito cun preciso tiro que peta na cruceta dereita antes de entrar. 2-0 min. 90: Xogada individual de Brais pola banda dereita, gaña a líña de fondo e cede atrás para que Mané no corazón da área anote o segundo gol cun disparo axustado que rebota no pao dereito da portería defendida por Suso e entra mansamente.

Comentario: Primeiro encontro do ano 2011 para a SCD Malpica, que lle tocaba visitalo campo dun dos equipos máis potentes da categoría (pois ocupan a segunda posición na táboa clasificatoria). Manuel Agilda, adestrador malpicán, sumaba as seguintes baixas: Viña (lesionado), Martín (lesionado) e Marcos Amado (sancionado). Comezou o partido bastante nivelado, cun Camariñas que dominaba a posesión do esférico pero cun Malpica coas líñas xuntas e que non pasou apenas apuros durante a primeira media hora, salvo nun disparo forte de Javi que rexeitou Suso. Sen embargo, cando recuperaban o balón apenas lograban combinar, e non creaban perigo nas inmediacións da área do Camariñas. A pesar desta circunstancia, os malpicáns tiveron unha inmellorable ocasión para adiantrase no marcador no minuto 30, pois David Blanco lanzou fóra nun man a man ante Pombo despois dun fenomenal pase en profundidade de Manu Pardo. Despois desta ocasión, o Camariñas si tivo máis profundidade, e ademais do gol, tivo dúas claras oportunidades antes do descanso: unha internada de Brais que supera a Suso no man a man pero Iago evita que o balón entre case na líña de gol e un disparo do mesmo Brais que rexeitou o pao (ainda que arrancou en fóra de xogo).

No segundo tempo, a superioridade física do Camariñas foi clave, pois se ben o Malpica tentou subir líñas e apretar un pouco máis para buscalo empate, os locais sempre mostraron unha gran intensidade, facéndose ca maioría dos rexeites e creando perigo coa velocidade e forza dos seus homes de ataque. O Malpica non foi capaz de desbordar polas bandas nin de facerse coa posesión de balón, salvo en contadas ocasións, e así apenas inquedou a Pombo. Os visitantes contaron con dúas oportunidades para empatar: un centro de Cheo dende a banda dereita que Neucha non logra rematar de cabeza coa portería valeira tras unha saída en falso de Pombo, e unha falta lateral botada por Manu Pardo que o gardameta local saca a corner con dificultades. Non obstante, os locais tiveron de novo un tiro ó pao de Brais tras pase de Juan (que volve a arrancar en fóra de xogo), unha vaselina do propio Juan que sae alto por pouco e un lanzamento de Mané que tamén marcha desviado.

En definitiva, terceira derrota consecutiva para a SCD Malpica, que non da síntomas moi positivos nas últimas xornadas, cunha falta alarmante de gol (nos últimos 5 encontros quedou en catro sen marcar) e con graves problemas ante os equipos máis fortes da liga (non logrou gañarlle a ningún dos 8 primeiros clasificados na primeira volta). Esperemos que o ano novo traia novos folgos ó plantel e que comecen a segunda volta en Carnota cunha vitoria para recuperar confianza no seu xogo.

domingo, 2 de enero de 2011

PRENSA

Reportaxe sobre a SCD Malpica no diario Depor Sport.